Read Kaqchikel Neh 2 Bible Online

Neh 2 - Kaqchikel bible

Neh 2

¹Yin in rusamajel k'a ri rey Artajerjes, y ri nusamaj jak'a ri ninpej vino chire rija'. Y jun q'ij chupan ri ik' Nisán, toq yin ninpej-apo ri vino richin ninjech-apo chire, rija' xutz'et ajk'a chi yin yibison y man jun bey in rutz'eton ta keri'.

²Y roma ri' ri rey xuk'utuj chuwe: ¿Achike k'a abanon? La yatzu'un nuk'ut chi k'o ak'uluwachin, roma rat xa man at yawa' ta y kan janila nibison ri awánima, xcha'. Y toq ri rey keri' xubij chuwe, kan janila xinxibij-wi' chuwech.

³Y yin kere' k'a xinbij chire ri rey: Kan xkak'ase' ta k'a jantape' rat rey. ¿Achike ta k'a roma man ta xtibison ri wánima toq ri nutinamit ri akuchi e muqul chuqa' ri aj pa rachoch ri nata' wuluwik wakami y ri tz'alem richin ri ruchi' ri tz'aq e k'atineq roma ri q'aq'?, xicha' chire.

⁴Y jari' toq ri rey xubij chuwe ri achike nitikir yirutobej. Jari' toq yin xink'utuj chire ri aj-chikajil Dios, richin yiruto'.

⁵Y xinbij k'a chire ri rey: Xa ta utz chawech rat y xa ta ri asamajel qajineq ta chawech, nink'utuj k'a utzil chawe chi taya' q'ij chuwe richin chi yibe k'a pa Judá, k'a chupan ri tinamit akuchi e muqul-wi ri wati't-numama', richin ninyek chik q'anej ri tinamit, xicha' chire.

⁶Y rija' xubij chuwe: ¿Jampe' k'a ri nabebana' ta y jampe' xkatzolin-pe? Y toq xinbij chire jampe' ninbenbana', kan xqa' k'a chuwech ri rey y xuya' k'a q'ij chuwe richin xibe, y ri rixjayil tz'uyul k'a apo xeruxikin.

⁷Y chuqa' xinbij chire ri rey: Xa ta utz nuben chawech rat, nitz'ibex ta el jun wuj chike ri aj-raqen pa ruwi' ri ruwach'ulew ri ek'o juk'an chire ri raqen-ya' Éufrates, akuchi nik'utux-wi-el chi tikiya' q'ij richin yiq'ax-el richin yinapon k'a pa Judá.

⁸Y chuqa' naya' ta el jun wuj chuwe richin ninya' chire ri Asaf ri nichajin ri k'echelaj ri awichin rat, richin tuya' juba' che' chuwe richin ninkusaj chire ri ruchi-jay richin tobel, ri ruchi' ri tz'aq richin ri tinamit y chuqa' richin ri jay akuchi xkik'oje-wi yin, xicha' chire. Y ronojel k'a ri xink'utuj chire ri Artajerjes, kan xuya' chuwe, roma ri loq'olej ruq'a' ri Jehová xuya' pa nuwi'.

⁹Y chuqa' rija' xeruteq-el wik'in achi'a' ri yech'oke' chirij kiej y achi'a' ri nima'q taq kiq'ij ri ek'o pa kiwi' ri aj-labal. Y toq xojapon kik'in ri aj-raqen pa kiwi' ri ruwach'ulew ri ek'o pa qajbel-q'ij chire ri raqen-ya', xinjech-apo ri wuj chike ri e rutz'iban-el ri rey.

¹⁰Jak'a toq xkak'axaj re', ri Sambalat aj-Horón y ri Tobías aj-raqen aj-Amón. Rije' man xqa' ta chikiwech, roma yin xinapon richin yento' ri nuwinaq israelita.

¹¹Xinapon k'a pa Jerusalem y toq q'axineq chik oxi' q'ij,

¹²xiyakatej k'a el chaq'a' yin y ka'i-oxi' achi'a' wik'in, y man jun achoq chire xinbij-wi ri xuya' ri Dios pa wánima ri k'o chi xtinben chiri' pa Jerusalem. Y kan xaxe k'a yin ri in ch'okol-el chirij kiej.

¹³Xojel k'a el chuchi' ri tinamit ri napon-qa kojol juyu' y xojbe akuchi k'o ri ralaxbel-ya' ri rubini'an Dragón, y k'a chuchi' ri toribel q'ayis. Chiri' xqatzu' k'a chijun ri tz'aq ri tzaqineq. Keri' chuqa' ri ruchi' xeruk'is q'aq'.

¹⁴Xinik'o chuchi' ri ralaxbel-ya' ri akuchi nuyek-wi ri ruya' ri rey, y chiri' k'a xinya' kan ri nukiej roma man xtikir ta xq'ax.

¹⁵K'a q'equ'm na xibe-q'anej akuchi niq'ax ri ko'ol raqen-ya', chiri' k'a xintz'et ri tz'aq, y xitzolin-el akuchi ri in peteneq-wi.

¹⁶Ri aj-raqen richin ri rey man xinkinabej ta akuchi xibe-wi yin, chuqa' man xinkinabej ta achike xinbenbana' yin chiri'. K'a man jajun tinbij chike ri sacerdote, ni chike ri tata'al, ni ta chike ri aj-raqen, ni ta ri ch'aqa' chik nuwinaq, ni ri e aj samaj richin ri rey.

¹⁷Ri jun chik q'ij, xinbij k'a chike: Rix nitz'et chi ojk'o pa jun ruk'ayewal: Ri Jerusalem wuluwik wakami y ronojel ri ruchi' xeruk'is q'aq'. Kixanpe y kinito' y qapaba' chik q'anej jun bey ri tz'aq, richin man chik tiqaya' q'ij richin chi yojkik'ixbisaj ri e etzelanel qichin, xicha'.

¹⁸Jari' toq xinq'alajirisaj chike chi ri qa-Dios kan janila rutzil ruya'on pa nuwi', y keri' chuqa' ri ch'abel ri rubin-pe ri rey Artajerjes chuwe. Y toq rije' xkak'axaj re ch'abel re', jari' toq xkibij chi yeyakatej richin nikipaba-q'anej. Y keri' xkitun ri kuchuq'a' richin xkiben ri samaj ri'.

¹⁹Jak'a toq xkak'axaj ri Sambalat, ri Tobías y ri Guésem. Xojkitze'ej, xojkiyojobej, y xkibij k'a chiqe: ¿Achike chik k'a ri niben rix? ¿Rix kan niwajo' yixyakatej chirij ri rey Artajerjes?, xecha'.

²⁰Jak'a yin xinbij chike: Ri Dios ri rajaw ri kaj, ja rija' ri xtibanon chi utz xtibe chiqawech y roj ri oj rusamajela' xqojyakatej y xtiqayek k'a q'anej re Jerusalem. Jak'a rix kan man xkixilon ta, ni ta xtiq'et-tzij y kan man xkixnatex ta chik wawe', xicha' k'a chike.