Read Kaqchikel Neh 4 Bible Online

Neh 4 - Kaqchikel bible

Neh 4

¹Toq ri Sambalat xrak'axaj chi roj yojtajin richin niqapaba' chik q'anej ri tz'aq, rija' janila xyakatej royowal y rik'in janila retzelal xtze'en chiqij.

²Y xch'on k'a kik'in ri e rachibil y kik'in ri aj-labal aj-Samaria y xubij: ¿Achike k'a yetajin chubanik re tzalatzeq y nakaneq taq israelita re'? ¿Nikich'ob rije' chi roma nikisuj kamelabel, xtikik'is ri samaj pa jun q'ij? ¿Nikich'ob rije' chi chukojol ri rupoqolajul y ruchajul ri xek'at yan yebe'el chik pe abej richin nikichojmirisaj ri tz'aq?, xcha'.

³Y ri Tobías ri aj-Amón k'o k'a apo chunaqaj rija', y xubij: Re tz'aq re yetajin chupabaxik rik'in abej, titz'eta' na pe toq xtipe jun ti utiw y niq'ax pa ruwi', jujik nuwulaj kan, xcha'.

⁴Jak'a yin Nehemías xich'on rik'in ri Dios y kere' xinbij: Tawak'axaj, rat ri at qa-Dios roj, roma man jun qejqalen niban chiqe. Roma ri' tabana' chi xtiqaqa ta k'a pa kiwi' rije' ri ketzelal, y xtimajtej ta k'a ri k'o rejqalen chuwi' kiq'a' koma ri e etzelanel kichin y xke'uk'uex k'a el pa tijoj-poqonal pa jun chik ruwach'ulew.

⁵Man taya' q'ij chi nik'is choj keri' ri kimak, ri xojkiyojobej y xojkiyoq' chikiwech ri winaqi' y xyakatej koyowal chiqij roj ri yojpaban-q'anej ri tz'aq, xicha'.

⁶Roj kan chi'anin xqapaba-q'anej nik'aj chire ri rupalen ri tz'aq, roma kan rik'in uchuq'a' xojsamej.

⁷Jak'a toq ri Sambalat, ri Tobías, ri achi'a' aj-Arabia, ri aj-Amón y ri aj-Asdod xkak'axaj chi ri tz'aq xa xechojmirisex yan, y chuqa' ronojel ruchi' ri tinamit nitz'apetej yan, jari' toq xyakatej janila koyowal.

⁸Y konojel k'a rije' xkich'ob richin yeyakatej chiqij y nokibana' oyowal qik'in y nikiwulaj jun bey chik ri Jerusalem.

⁹Jari' toq roj xqak'utuj chire ri qa-Dios. Y koma rije' k'o chi xeqaya' chajinela' chi paq'ij chi chaq'a' richin chi xojkichajij chikiwech ri yojetzelan.

¹⁰Y ri wachibil ri ye'eran abej xkibij chuwe chi xk'is yan qa ri kuchuq'a' y ri tz'aq wuluwik k'a janila k'iy, y man yetikir ta chik nikipaba-q'anej.

¹¹Y ri e etzelanel qichin xkich'ob chi roj man niqak'axaj ta ni man yeqatz'et ta chi rije' nikajo' ye'ok-pe chiqakojol roj richin xqojkikamisaj y xtikiben chi re samaj re' xtitane' kan.

¹²Y xbanatej k'a chi ri qachibil ri ek'o chikikojol ri yojetzelan xkibij chiqe k'iy mul, chi ri e etzelanel qichin xqojkikamisaj xabakuchi yojsamej-wi.

¹³Roma ri' xinbij k'a chike ri ach'alalri'il chi kek'oje' chupan ri tinamit, rik'in ri ki-espada, kum y rute-ch'ab y tikichajij ri akuchi k'a e teq'el na.

¹⁴Toq xentz'et yan ronojel re', xinbij k'a chike ri e tata'al, ri e aj-raqen y chike ri ch'aqa' chik winaqi': Man tixibij-iwi' chikiwech. Toqaqa k'a chi'ik'u'x chi ri qa-Dios, rija' kan nim wi y kan k'o rukiy chikiwech konojel winaqi'. Roma ri' tiqatija' qaq'ij koma ri qami'al-qak'ajol, ri qixjayilal y konojel ri ek'o pa qachoch, xicha' chike.

¹⁵Toq ri e etzelanel qichin xketamaj chi roj qanaban chik qi', y ri qa-Dios xuwulaj chikiwech ronojel ri kich'obonik, qonojel roj xojtzolin chik richin xqaben chik q'anej jun bey ri qasamaj rik'in ri tz'aq.

¹⁶Kan chupan k'a ri q'ij ri' ri nik'aj chike ri achi'a' yesamej, y ri nik'aj chik, yechajin rik'in ri kikum, rik'in ri kitobal y rik'in ri rute-ch'ab. Y ri aj-raqen nikikuqubala' k'a kik'u'x ri winaqi' aj-Judá,

¹⁷ri yepaban-q'anej ri tz'aq, ri ye'eran ronojel ri nik'atzin, pa jujun kiq'a' kik'uan ri espada.

¹⁸Y konojel k'a ri yepaban-q'anej ri tz'aq, chikijujunal k'o ri ki-espada pa ruximibal ri kipan, y keri' yesamej. Y ri nixupun ri trompeta pa'el-apo wik'in yin.

¹⁹Y xinbij chike ri e aj-raqen, ri e tata'al y ri ch'aqa' chik richin ri tinamit: Ri samaj kan janila nim y roma ri' roj qach'aron-qi' chirij ri tz'aq, y yalan k'a nej qakojol.

²⁰Roma ri' xabakuchi k'a ixk'o-wi toq xtiwak'axaj chi niq'ajan ri trompeta, kan timolo' k'a pe iwi' qik'in, y ri qa-Dios, ja rija' xtibanon ri oyowal pa qak'exel roj, xicha'.

²¹Roma ri' qonojel k'a niqachop samaj toq kan man jani nel-pe ri q'ij y yojtane' k'a toq yeq'alajin chik pe ri ch'umila'. Y ri nik'aj chike ri qachibil kik'ualon k'a ri kikum.

²²Jari' chuqa' toq xinbij chike ri nuwinaq y ri kisamajela' chi ri waran tiban wawe' chupan ri tinamit, richin yechajin qik'in chaq'a', y ri paq'ij yesamej.

²³Pa ruwi' k'a ronojel re', ri qatziaq kan jantape' k'a k'o chiqij, y man niqelesaj ta, xa kan xaxe k'a toq yojatin niqelesaj chiqij keri' xinben yin, ri wach'alal, ri nusamajela', y ri e chajinela'.