Read Kaqchikel Ester 1 Bible Online

Ester 1 - Kaqchikel bible

Ester 1

¹Xk'oje' k'a jun achin rubini'an Asuero, ri xok rey pa ruwi' k'iy ruwach'ulew ri xubini'aj Medo-Persia, ri k'o 127 nima'q taq ruwach'ulew chupan. Y nitiker-pe pa relebel-q'ij rik'in ri ruwach'ulew India y ri pa qajbel-q'ij napon k'a pa ruwach'ulew Etiopía.

²Y ri tinamit ri akuchi niq'aton-wi-tzij rija' ja ri tinamit Susa, y ri tinamit ri' kan chajin jebel y sutin-rij rik'in tz'aq.

³Y xbanatej k'a, chi chupan ri rox juna' richin ri ruq'atbal-tzij, chi xuben jun nimalej nimaq'ij chike konojel ri e tata'al, ri nima'q taq samajela', ri e aj-raqen kichin ri aj-labal y ri e aj-raqen pa kiwi' ri nima'q taq ruwach'ulew.

⁴Re jun nimaq'ij re' xyaloj waqi' ik' y rokik ri' xq'alajin chikiwech konojel ri e royon ronojel ri rubeyomel, ri ruk'ojlen y ri nimalej uchuq'a' ri k'o pa ruq'a'.

⁵Toq xetane' chire re jun nimaq'ij re', ri rey xuben jun chik nimaq'ij richin wuqu' q'ij, chuwa-jay chire ri rachoch. Xeroyoj k'a konojel ri winaqi'; nitiker-el kik'in ri k'o kiq'ij ri ek'o chiri' pa tinamit Susa, y k'a kik'in ri relik taq samajela' ri e yuqul pa samaj.

⁶Xuwiq k'a ri ruwech ri ruwa-jay rik'in peraj tzieq, seq, rex y raxroj ri kan janila jebel yetzu'un. Y ri peraj tzieq ri' e tzeqel rik'in argolla ri e banon rik'in saqipueq chuwech kolo' ri e banon rik'in lino q'eqq'oj-keq nitzu'un. Y ri kolo' ri' e ximil chikiwech ri pilar ri ek'o chiri'. Y ri pilar e banon rik'in abej mármol. Chuqa' ri ch'aket ri ek'o chiri' ronojel e banon rik'in q'anapueq y saqipueq. Ri ruwa-jay banon rik'in tz'ajtz'eq abej, ri banon rik'in mármol seq, y rik'in ch'aqa' chik jalajoj ruwech jebejoj taq abej keq, seq y raxroj yetzu'un.

⁷Keri' chuqa' ronojel ri qumbel vino ri ek'o chiri' e banon rik'in q'anapueq, y ronojel jalajoj kibanikil. Y ri vino kan pa ruk'iyal k'a k'o chiri' achi'el ri rubeyomel ri rey.

⁸Y ri rey xubij k'a chi chikijujunal ri winaqi' ri ek'o chupan ri nimaq'ij ri', tikiqumu' ri vino ri xa janipe' nikirayij; y man jun tiq'aton kichin, ni man jun tibanon chire jun chi kan tuqumu' ri vino ri'.

⁹Y chupan ri q'ij ri', k'o jun reina ri rubini'an Vasti, y rija' xuben jun chik nimaq'ij pa rachoch ri Asuero, ri rachijil, kik'in konojel ri ixoqi' ri ek'o.

¹⁰Toq xapon ri ruwuq q'ij, ri rey kan janila nikikot ri ránima roma k'iy vino ruqumun-qa, y roma ri' xeroyoj ri e wuqu' rusamajela' eunuco*f1* ri kibini'an Mehumán, ri Biztá, ri Harboná, ri Bigtá, ri Abagtá, ri Zetar y ri Carcás, y xubij chike chi

¹¹kebe richin nibekik'ama' ri reina Vasti, y tukusaj-pe ri ru-corona, richin keri' konojel ri achi'a' y ri e tata'al xtikimey roma kan jebejoj ok rubanik.

¹²Xebe k'a ri eunuco chuk'amik ri reina achi'el xbix-el chike. Y toq xe'apon akuchi k'o-wi ri reina, rija' xa man xrajo' ta xpe y man xunimaj ta rutzij ri rey. Roma ri' ri rey xyakatej janila royowal.

¹³Y xuteq k'a koyoxik ri achi'a' ri e aj-na'oj ri kan ketaman ri nubij ri pixa', richin yeruk'ulubej; roma ri chiri' ri e rey kan nikiben-wi achi'el nikibij ri achi'a' ri kan ketaman ri pixa'.

¹⁴Y ri achi'a' ri', ja ri Carsená, ri Setar, ri Admata, ri Tarsis, ri Meres, ri Marsená y ri Memucán. Ja e wuqu' aj-na'oj re' ri ek'o más naqaj chire ri rey, y rije' e tata'al richin ri ruwach'ulew Medo-Persia.

¹⁵Y ri Asuero xuk'utuj k'a chike y xubij: ¿Achike k'a nubij ri pixa' pa ruwi' ri reina Vasti, roma man xunimaj ta nutzij toq xinteq ruk'amik, koma ri eunuco? ¿Achike k'a niqaben wakami?, xcha'.

¹⁶Y ri Memucán xubij k'a chire ri rey y chike ri e waqi' chik tata'al: Man xaxe ta chawech rat rey xmakun-wi ri reina Vasti, xa kan chikiwech konojel e tata'al y chikiwech konojel tinamit richin re ruwach'ulew ri ek'o pan aq'a',

¹⁷roma ri rubanobal re reina re' xtikak'axaj ri ch'aqa' chik ixoqi', y rije' xtikiqasaj ruq'ij ri kachijilal y xa xtikinataj chi rat rey Asuero xateq royoxik ri reina Vasti y rija' man xpe ta chawech.

¹⁸Ri ixjayilonela' kichin ri e tata'al richin ri ruwach'ulew Medo-Persia kan xtikinatala' k'a re banobel re' chike ri kachijilal. Y jari' k'a toq xtipe oyowalen chikikojol rije'.

¹⁹Roma ri', wi rat rey niqa' chawech, tatz'ibaj k'a jun wuj ri akuchi nubij-wi chi ri Vasti man reina ta chik. Y tikanox chik k'a jun ruk'exel ri más nimey-tzij chuwech rija'. Y re wuj re' kan xtik'oje' jantape' chukojol ri pixa' qichin roj ri oj richin ri ruwach'ulew Medo-Persia.

²⁰Y ri pixa' ri xtaya' rat, kan xtitalux k'a chupan chijun ri qaruwach'ulew. Y toq ri ixoqi' xtikak'axaj re' kan xtikinimaj k'a kitzij ri kachijilal, stape' k'o kiq'ij o maneq kiq'ij; xcha' ri Memucán.

²¹Y ri rey Asuero y ri tata'al ri ek'o chiri' kan utz k'a xkak'axaj ri xubij ri Memucán. Y kan keri' k'a xbanatej.

²²Ri rey xubij k'a el chupan ri wuj ri xutz'ibaj chi konojel achi'a' kan kow kepa'e' pa kiwi' ri e aj pa kachoch. Re wuj re' xtz'ibex k'a pa kich'abel ronojel tinamit richin ri ruwach'ulew Medo-Persia, richin keri' konojel niq'ax chikiwech; y re wuj re' xetaqalox k'a pa ronojel taq tinamit.