Read Kaqchikel Ester 8 Bible Online

Ester 8 - Kaqchikel bible

Ester 8

¹Chupan ri q'ij ri', ri rey Asuero xusipaj chire ri reina Ester ri rachoch ri ánima Amán, ri etzelanel kichin ri winaqi' judío. Y ri reina Ester xuq'alajirisaj k'a chuwech ri rey chi ri Mardoqueo y rija' kan kach'alal-ki', y roma ri' ri Mardoqueo xberuk'utu-ri' chuwech ri rey.

²K'ari' ri rey xuya' chire ri Mardoqueo ri retz'aba'l ruwi-ruq'a' ri richin kan ri Amán. Chuqa' ri Ester xujech pa ruq'a' ri rachoch kan ri Amán richin chi ja rija' ri nik'oje' pa ruwi'.

³Chirij ri', ri Ester xapon chik jun bey rik'in ri rey, y xuqasaj-qa-ri' k'a chiraqen, y kan janila k'a xoq' chuwech y xuk'utuj utzil chire richin tuyojo' ri rubanon kan ri Amán, ri etzelanel kichin ri ruwinaq judío.

⁴Ri rey xuya' k'a apo ri rutza'n ri ru-cetro chire ri Ester, y roma ri' rija' xyakatej-q'anej richin xpa'e' chuwech ri rey,

⁵y xubij: Wi yin wilon utzil awik'in, y wi rat niqa' chawech, y wi pa ruchojmilal nawak'axaj ri ninbij, y wi kan qitzij yinawajo'; tatz'ibaj k'a el jun wuj y tabij-el chupan chi tiyoj ri rubanon kan ri Amán ri ruk'ajol ri Hamedata, y rijatzul kan ri Agag. Roma rija' xutz'ibaj kan jun wuj y xubij kan chupan richin yojruk'is qonojel roj ri oj judío, ri ojk'o pa taq tinamit chire ri ruwach'ulew ri ek'o chuxe' ri aq'atbel-tzij rat rey.

⁶Y wakami, ¿achike xtinben yin richin xtinkoch' ronojel ri ruk'ayewal ri xtipe chikij ri nuwinaq, roma xkek'is k'a konojel rije'?, xcha'.

⁷Ri rey Asuero xubij k'a chire ri reina Ester y chuqa' chire ri Mardoqueo: Yin xinya' chawe rat Ester, ri rachoch kan ri Amán. Chuqa' yin xinbij chi xtzeqebex ri Amán roma xrajo' xujeluj ruq'a' pan iwi' rix judío.

⁸Jak'a jun wuj ri kan ruk'uan ri retal ri q'atbel-tzij ri k'o chuwi-nuq'a' yin, kan man xtiyoj ta chik jumul. Wakami k'a, yin ninya' q'ij chiwe chi titz'ibaj chike ri iwinaq judío, ri utz nuben chiwech rix. Y tiya' k'a el retal rik'in ri q'atbel-tzij ri k'o chuwi-nuq'a' yin, xcha'.

⁹Xeri' xe'oyox konojel ri tz'ibanela' richin ri rey chupan ri q'ij juwineq oxi', richin ri rox ik', ri nibix Siwan chire. Y ronojel ri ruchojmilal ri xuya' ri Mardoqueo, xtz'ibatej-el chike ri judío, konojel ri tata'al, ri nima'q taq samajela', ri e aj-raqen kichin ri aj-labal y ri e aj-raqen pa kiwi' ri 127 nima'q taq ruwach'ulew; ri nitiker-el pa relebel-q'ij chire ri ruwach'ulew India, y napon k'a pa qajbel-q'ij chire ri ruwach'ulew Etiopía. Y xtz'ibex-el pa ronojel ch'abel, y xetaqalox-el chike konojel ri tinamit ri'.

¹⁰Ri wuj ri' xtz'ibex-el pa rubi' ri rey Asuero y xtz'apex-el-rij rik'in ri retal ri ruq'atbal-tzij ri k'o chuwi-ruq'a' ri rey. Y ri xe'uk'uan-el ri wuj ri', xech'oke-el chikij kiej ri kan janila yebiyin, richin xbekiya' ri rutzijol chi'anin.

¹¹Chupan ri wuj ri', nubij chi ri rey xuya' q'ij chike ri judío chi xabakuchi ek'o-wi, tikimolo-ki' richin nikito-ki' y keyakatej chikij ri winaqi' ri nikajo' yekamisan kichin. Xuya' k'a q'ij chi kekikamisaj ri winaqi' ri'; chi achi'a', chi ixoqi' y chi ak'uala'; y tikiwulaj ri kitinamit. Y ja ri judío ri kek'oje' kan pa ruwi' ri kibeyomel ri winaqi' ri'.

¹²Ronojel re' k'o chi niban pa jun q'ij chupan ronojel ri nima'q taq ruwach'ulew ri ek'o pa ruq'a' ri Asuero, y ri q'ij ri cha'on ja ri q'ij oxlajuj, chire ri ik' kablajuj ri nibix Adar chire.

¹³Re jun wuj re' kan xq'alajirisex k'a chi kan jun pixa' ri xuya' ri rey, y xtitalux pa ronojel tinamit y ronojel nima'q taq ruwach'ulew, richin keri' ri winaqi' judío xtikinaba-ki' ri q'ij ri' richin yeyakatej chikij ri etzelanel kichin.

¹⁴Ri e ya'ol rutzijol xekich'okolibej-el kiej ri janila yebiyin richin chi'anin xkik'uaj-el ri utzilej rutzijol ri xuya-el ri rey, y re' xtalutej chupan chijun ri tinamit Susa.

¹⁵Ri Mardoqueo xel k'a pe pa rachoch ri rey, rukusan-pe rutziaq ri nikikusaj ri rey y ri nitzu'un ri tzieq raxroj y seq, y ruq'un jun ko'ol raqen tzieq ri banon rik'in lino q'eQ'oj nitzu'un, y chuqa' rukusan jun jebelej corona ri banon rik'in q'anapueq. Y konojel k'a ri winaqi' ri ek'o chiri' pa Susa xkireq k'a kichi' roma kikoten.

¹⁶Y ri winaqi' judío kan janila k'a kikoten y nim ruwaq'ijaj y ch'uch'ujil ri xuk'en-pe chike.

¹⁷Ri rutzijol ri' xapon pa ronojel nima'q taq ruwach'ulew, y ronojel ri tinamit, y roma ri' ri winaqi' judío kan janila xekikot, y xekibanala' nima'q taq wa'in y xenimaq'ijun. Y chirij re' e k'iy winaqi' ri man e judío ta xa xjunamatej-kiwech kik'in ri judío, roma rije' kan k'o-wi kikiy.