Read Kaqchikel Ester 9 Bible Online

Ester 9 - Kaqchikel bible

Ester 9

¹Keri', xapon ri q'ij oxlajuj chire ri ik' Adar, y jari' toq k'o chi nibanatej ri pixa' ri ruya'on kan ri Amán pa rubi' ri rey pa kiwi' ri winaqi' judío, toq ri e etzelanel kichin ri judío koyoben chi ja rije' yek'oje' pa kiwi'; jak'a xa man keri' ta xbanatej, roma xa ja ri judío ri xek'oje' kan pa kiwi' rije'.

²Konojel ri winaqi' judío xkimol k'a ki' pa taq kitinamit chupan ronojel ri nima'q taq ruwach'ulew ri ek'o pa ruq'a' ri rey Asuero, richin nikiben oyowal kik'in ri e etzelanel kichin. Y kan man jun k'a ri nitikir ta nupaba-ri' chikiwech rije', roma ri xibinri'il xapon yan kik'in ri winaqi' ri man e judío ta.

³Y konojel k'a tata'al, ri nima'q taq samajela', ri e aj-raqen kichin ri aj-labal y ri e aj-raqen pa kiwi' ri nima'q taq ruwach'ulew xa xjunamatej-kiwech kik'in ri winaqi' judío richin xekito', roma xkik'en rukiy ri Mardoqueo,

⁴roma rija' xok jun nimalej aj-raqen chupan ri q'atbel-tzij richin ri rey Asuero, y ri runimirinen q'ij-q'ij beneq pa jotol. Roma ri' ri rutzijol xtalutej pa ronojel nima'q taq ruwach'ulew.

⁵Keri' ri winaqi' judío xkiben kik'in ri e etzelanel kichin ri achike xkajo' rije'. Xekichop chi espada xekikamisaj y xekik'is jumul.

⁶Xaxe chiri' pa Susa xekikamisaj 500 achi'a'.

⁷Chuqa' xekikamisaj ri e lajuj ruk'ajol kan ri Amán, ri kibini'an: Parsandata, Dalfón, Aspata, Porata, Adalías, Aridata, Parmasta, Arisai, Aridai y ri Vaizata. Xekikamisaj kan, jak'a ri kibeyomel man xkichop ta el.

¹¹Y chupan k'a ri q'ij ri', xq'alajirisex chuwech ri rey ri kajlabal ri kaminaqi' chiri' pa Susa.

¹²Y toq xretamaj re', xubij chire ri reina Ester: Ri awinaq judío xekikamisaj yan e 500 achi'a' wawe' pa Susa, y chuqa' ri e lajuj ruk'ajol kan ri Amán. ¿Janipe' kami k'a ri e kikamisan chik chupan ronojel tinamit chire ri nuq'atbel-tzij yin? Wakami k'a tabij chuwe achike chik nawajo', y ri xtabij kan xtibanatej k'a, xcha' ri rey chire.

¹³Y ri reina Ester xubij: Wi kan wilon utzil awik'in, taya' k'a q'ij chike ri nuwinaq richin chua'q xkekitzeqeba' ri kich'akul ri e lajuj ruk'ajol kan ri Amán, xcha'.

¹⁴Ri rey xubij k'a chi keri' tibanatej. Xuteq k'a rubixik chi ketzeqebex ri kich'akul ri e lajuj ruk'ajol kan ri Amán chiri' pa Susa. Y kan keri' k'a xbanatej.

¹⁵Chuqa' chupan ri q'ij kajlajuj chire ri ik' Adar, ri judío ri ek'o chiri' pa Susa xkimol chik k'a ki', y xekikamisaj chik e 300 achi'a', jak'a ri beyomel kan man xkik'uaj ta.

¹⁶Jak'a ri ch'aqa' chik winaqi' judío ri ek'o pa ronojel tinamit richin ri nima'q taq ruwach'ulew ri ek'o pa ruq'a' ri Asuero, xkimol-ki' ri q'ij oxlajuj richin xekikamisaj ri e etzelanel kichin. Y xekikamisaj k'a e 75,000 achi'a', jak'a ri beyomel kan man xkik'uaj ta. Y chupan ri q'ij kajlajuj, xe'uxlan k'a, xenimaq'ijun y kan janila xekikot.

¹⁸Jak'a ri judío ri ek'o chiri' pa Susa, rije' xkimol-ki' ri q'ij oxlajuj y kajlajuj, richin xekikamisaj ri e etzelanel kichin, y k'a ja ri q'ij wolajuj ri xe'uxlan y xenimaq'ijun y kan janila xekikot.

¹⁹Konojel ri ch'aqa' chik judío ri ek'o pa ronojel tinamit y ri kokoj taq tinamit ri man e sutin ta kij chi tz'aq, rije' yenimaq'ijun ri q'ij kajlajuj chire ri ik' Adar. Rik'in janila kikoten xenimaq'ijun; xkibanala' nima-wa'in y xesipalon chikiwech rije'.

²⁰Ri Mardoqueo xutz'ibaj k'a el ronojel re' chuwech jun wuj, y xutaqala-el chike konojel ri ruwinaq ri ek'o pa nima'q taq ruwach'ulew ri ek'o pa ruq'a' ri rey Asuero.

²¹Y xubij-el, chi konojel ri judío k'o chi nikinimaq'ijuj ri q'ij kajlajuj y wolajuj chire ri ik' Adar ronojel juna'.

²²Y ri q'ij ri', jari' toq ri judío xekik'is konojel ri e etzelanel kichin. Ri ik' ri' kan richin k'a bis, raqoj-chi'ij y q'axo'n; jak'a pa ruk'exel ri' xa xok ik' richin kikoten y richin nimaq'ij toq xekibanala' nima'q taq wa'in, xesipalon chikiwech-qa rije', y chuqa' xekiyala' sipanik chike ri man jun k'o kik'in.

²³Y ri winaqi' judío kan xkiben k'a achi'el ri xutz'ibaj ri Mardoqueo.

²⁴Ri ánima Amán, ri etzelanel kichin konojel ri winaqi' judío, kan xuch'ob k'a richin ta xeruk'is, y kan xuya' pa sakinik richin xucha' ri q'ij richin yerukamisaj.

²⁵Jari' k'a toq ri reina Ester xapon chuwech ri rey, toq xubij chi titz'ibex chuwech jun wuj, ronojel ri etzelal ri xuch'ob ri Amán chikij ri judío, xa kan chirij k'a rija' tiqaqa-wi, y chi titzeqebex rija' y ri e lajuj ruk'ajol.

²⁶Ri q'ij toq xenimaq'ijun rubini'an Purim. Re bi'aj re' peteneq rik'in ri ch'abel Pur, ri nel chi tzij sakinik. Roma ronojel ri xubij ri wuj ri xutz'ibaj ri Mardoqueo y ri xkitz'et ri ch'aqa' chik winaqi' judío, y ri xkiq'axaj rije',

²⁷ri winaqi' judío xkijikiba' ri nimaq'ij ri'. Y xkiya' kitzij chi keri' xtikiben chi wiq chi tanaj, y kan keri' chuqa' ri winaqi' ri ek'o chikikojol ri xe'ok kiwinaq rije'. Y ri nimaq'ij ri' kan ja ri q'ij kajlajuj y wolajuj chire ri ik' Adar ri nikinimaq'ijuj.

²⁸Y kan xok k'a jun pixa', chi re q'ij re' kan ninatex koma konojel winaqi', y ninimaq'ijux koma chi wiq chi tanaj xabakuchi ek'o-wi. Keri' ri q'ij richin ri Purim kan man jun bey xtimestex koma ri judío, y ri kijatzul.

²⁹Chirij ri' ri reina Ester, rumi'al kan ri Abihail, xutz'ibaj jun ruka'n wuj richin nujikiba' ri ruchojmilal ri nubij chupan ri nabey wuj pa ruwi' ri nimaq'ij Purim. Y ri Mardoqueo kan xuto' k'a chubanik re wuj re'.

³⁰Y ronojel re wuj re' xtaq chike konojel ri winaqi' judío ri ek'o chupan ri e 127 nima'q taq ruwach'ulew ri ek'o pa ruq'a' ri rey Asuero. Y re wuj re' ruk'uan ch'abel richin uxlanibel-k'u'x, y ri ch'abel ri' kan qitzij wi,

³¹richin chi xjikibex kan re q'ij re' richin Purim. Chuqa' ri Mardoqueo y ri reina Ester xkiya' kan pa kiwi' ri kiwinaq jun chik ruchojmilal pa ruwi' ri meway y ri bis.

³²Y ri pixa' ri xuya' ri reina Ester pa ruwi' ri q'ij Purim, kan xtz'ibex k'a kan chupan jun wuj.