Read Kaqchikel Ex 10 Bible Online

Ex 10 - Kaqchikel bible

Ex 10

¹Ri Jehová xubij k'a chire ri Moisés: Kabiyin chik jun bey rik'in ri rey, roma yin in banayon chi rija' y ri aj-raqen kikowirisan ri kánima, richin chi tikitz'eta' na ri nima'q taq nubanobal ri richin jun retal chikiwech rije'.

²Y richin chi rix nitzijoj chuqa' chike ri iwalk'ual y chike ri iwiy-imam, ronojel re xinben yin re wawe' pan Egipto. Ri nima'q taq nubanobal richin retal, richin chi rix kan tiwetamaj chuqa' chi ja yin Jehová, xcha'.

³K'ari' ri Moisés y ri Aarón xebe rik'in ri rey y xkibij chire: Ri Jehová ri qa-Dios roj israelita nubij: ¿K'a janipe' k'a xtaqasaj-awi' chinuwech? Taya' q'ij chire ri nutinamit richin nel-el wawe' richin chi yiberusamajij.

⁴Roma wi man xtaya' ta q'ij richin nel-el, ri chua'q, yin xkenteq-pe sak' chijun re aruwach'ulew.

⁵Y ri chikopi' ri' kan xtikiq'equmarisaj ri ruwi' chijun ruwach'ulew, y kan man xtiq'alajin ta pe ri ulew. Y ri chikopi' ri' xtikik'is rutijik ronojel ri tiko'n, ri xkolotej kan pa ruq'a' ri saqboch y xtikik'is chuqa' ronojel ri ruxaq che' ri xebejotayin yan pe.

⁶Xtikinojisaj k'a rupan ri awachoch rat, ri rupan ri kachoch ri aj-raqen y ri rupan ri kachoch konojel ri winaqi' aj-Egipto. Y re' kan man jun bey k'a tz'eton, koma ri ate-atata' y koma ri awati't-amama', jampe' e oqawineq re wawe', xcha'. Y toq ri Moisés xuk'is kan rubixik re', xupiskolij-el-ri' y xbe.

⁷Xeri' ri aj-raqen ri ek'o rik'in ri rey xkibij chire: ¿K'a jampe' k'a xtitane' chuya'ik ruk'ayewal pa qawi' re achin re'? Xa kan más utz taya' q'ij chike richin yebe y nibekisamajij ri ki-Dios. ¿Kan man natzu' ta k'a chi re qaruwach'ulew xa kan nik'is yan roma ronojel ruk'ayewal ri qajineq pa ruwi'?, xecha'.

⁸Roma ri' ri rey xuteq koyoxik jun bey chik ri Moisés y ri Aarón, y xubij chike: Wakami más utz kixbiyin, y tibesamajij ri Jehová ri i-Dios, xaxe tibij chuwe ri achike ri k'o chi yebe, xcha'.

⁹Y ri Moisés xubij: K'o chi yojbe qonojel chi ak'uala', chi rijita'q, ri qami'al-qak'ajol y chuqa' ri qawej. Yojbe richin nibeqanimaq'ijuj y nibeqabixaj rubi' ri qa-Dios, xcha' ri Moisés.

¹⁰Jari' toq ri rey xubij: Stape' kan k'o ri Jehová ri i-Dios iwik'in, ¿nich'ob rix chi xtinya-el q'ij chiwe richin xke'ik'uaj ri iwixjayilal y ri iwalk'ual? Ni, roma yin ninna' chi rix k'o ri nich'ob chi niben.

¹¹Man keri' ta xtibanatej, xaxe ri achi'a' utz yebe richin nibekisamajij ri Jehová. Wi kan jari' ri niwajo' chi niben, xcha' ri rey. Y xeri' xe'elesex-pe ri chiri'.

¹²K'ari' ri Jehová xubij chire ri Moisés: Tayaka' la aq'a' pa ruwi' ri ruwach'ulew Egipto richin ye'ojopojo' ri sak' y kan xtikik'is k'a ronojel ri man xk'is ta pa ruq'a' ri saqboch, xcha' ri Jehová.

¹³Y keri' ri Moisés xutzeqej ri ruch'ame'y pa ruwi' ri Egipto, y ri Jehová xuben chi xpe jun nimalej kaq'iq' pa relebel-q'ij chire ri ruwach'ulew. Ri kaq'iq' ri' xuben jun q'ij y jun aq'a' y ri nimaq'a' ruka'n q'ij, ri kaq'iq' e ruk'amon k'a pe ri sak'.

¹⁴Y ri janila chi sak' ri' xe'oqaqa pa ruwi' chijun ri ruwach'ulew Egipto. Kan xeqaqa k'a pa ronojel ulew chijun ri ruwach'ulew ri'. Kan man jun bey k'a k'uluwachitajineq ta keri', ni man jun bey chuqa' chik xtibanatej.

¹⁵Kan xkinojisaj ruwi' ri ulew chijun ri ruwach'ulew, kan xq'equmatej ruwi' ri ulew koma ri sak'. Xkik'is k'a el ronojel ri kolotajineq kan pa ruq'a' ri saqboch, ri tiko'n pa taq juyu', ri kiwech ri che'. Ni xa ta juba' chik rex ri xk'oje' kan chike ri che'.

¹⁶Jari' toq ri rey chi'anin xuteq koyoxik ri Moisés y ri Aarón y xubij chike: Wakami ximakun chuwech ri Jehová ri i-Dios y chuqa' chiwech rix.

¹⁷Xa rik'in ta chik re jun bey re' nikuy ta numak, y tik'utuj chire ri Jehová ri i-Dios chi trelesaj pa nuwi' re jun nima-ruk'ayewal re', roma re' xa kan richin kamik, xcha'.

¹⁸Ri Moisés xel k'a pe rik'in ri rey, y kan jari' xch'on rik'in ri Jehová.

¹⁹Y ri Jehová kan chi'anin k'a xujel rubey ri kaq'iq' y xuben chi ja chik ri pa qajbel-q'ij xbek'ulun-wi-pe y xeruk'uaj-el konojel ri sak' y xeberuya' kan k'a chupan ri Kaqa-Palou y kan man jun chik k'a sak' xk'oje' kan pan Egipto.

²⁰Jak'a ri Jehová kan xuben chi ri rey xukowirisaj chik k'a ri ránima. y man xuya' ta q'ij richin xe'el-el ri winaqi' israelita.

²¹Xeri' ri Jehová xubij chik chire ri Moisés: Tayaka' ri aq'a' chikaj richin chi tiqaqa jun nimalej q'equ'm pa ruwi' chijun ri Egipto; q'equ'm ri xa kan tikirel richin chi nichap, xcha'.

²²Ri Moisés keri' xuben y xpe k'a jun nimalej q'equ'm pa ruwi' chijun ri Egipto y keri' xuben oxi' q'ij.

²³Man jun k'a xtz'eton ruwech ri rachpochel, y chi oxi' q'ij man jun xsilon-el ri akuchi ek'o-wi toq xq'equmer. Jak'a ri tinamit ri akuchi ek'o-wi ri winaqi' israelita kan k'o saqil kik'in.

²⁴Y k'ari' ri rey xuteq royoxik ri Moisés y xubij chire: Kixbiyin y tibesamajij ri Jehová. Ke'ik'uaj ri iwixjayilal y chuqa' ri iwalk'ual, xaxe ri iwawej ke'iya' kan, xcha' ri rey chire.

²⁵Jak'a ri Moisés xubij chire ri rey: Wi keri', ja rat ri k'o chi yaya'on chiqe ri chikopi' richin kamelabel, richin chi jari' ri niqaporoj chuwech ri Jehová ri qa-Dios.

²⁶Wi rat naya' q'ij chiqe richin yojbe, k'o chi yeqak'uaj ri qawej; ni ta ri kixk'eq ri qawej xkeqaya' ta kan. Roma chikikojol ri qawej xkeqak'en-wi ri xtiqasuj richin niqaya' ruq'ij ri Jehová ri qa-Dios. Y kan k'a xqojapon na, k'ari' xtiqetamaj ri achike xkek'atzin chiqe richin niqaya' ruq'ij ri Jehová, xcha'.

²⁷Jak'a ri Jehová kan xukowirisaj chik jun bey ri ránima ri rey, y man xuya' ta q'ij richin xebe.

²⁸Chuqa' ri rey xubij chire ri Moisés: Katel-el chinuwech, roma man ninrayij ta chik yatintzu'. Ri q'ij toq xkatoqaqa chik wawe' chinuwech xkaken, xcha' ri rey chire.

²⁹Kan jari' toq ri Moisés xubij: Utz ri xabij. Roma yin kan man jun bey chik xkinoqaqa wawe' chawech, xcha'.