Read Kaqchikel Ex 2 Bible Online

Ex 2 - Kaqchikel bible

Ex 2

¹Chupan k'a ri q'ij ri' xk'oje' k'a jun achin chikikojol ri rijatzul kan ri Leví, rija' k'ulan k'a rik'in jun ixoq ri junan kati't-kimama'.

²Re ixoq re' xyawej kan chirij jun chik ti ral, y toq xalex ri ak'ual xutz'et chi ti ala' y kan janila ti jebel ok, y roma ri' xrewaj oxi' ik'.

³Jak'a toq man xtikir ta chik xrewaj ri ti ak'ual, rija' xuben ruchojmil jun ti chakech, y richin man niq'ax ta ya' chupan, xuq'olij-el rik'in asfalto y q'ol, y k'ari' xuya-el ri ak'ual chupan, y xberuya' kan chuchi' ri raqen-ya' Nilo, chukojol pop ri k'iyineq-pe chupan ri ya'.

⁴Y ri ti rana' ri ti ak'ual ri', xk'oje' kan nej richin nunachaj-apo achike xtik'uluwachitej rik'in ri ti ruxibal.

⁵Y ri rumi'al ri rey xbe-qa chuchi' ri raqen-ya' ri' richin nibe'atin, e rachibilan-el jun tzobaj xtani' ri e rusamajela'. Y rokik ri xtani' ri' yebiyajilan chuchi' ri ya', jari' toq rija' xutz'et ri jun ti chakech chukojol ri pop ri'. Y jari' xuteq jun chike ri e rusamajela' ri e beneq chirij richin xberuk'ama-pe ri ti chakech.

⁶Toq ri rumi'al ri rey xujeq ruwi' ri ti chakech, xutz'et chi k'o jun ti ak'ual chupan y re ti ak'ual re' noq'. Jari' toq re xten re' xujoyowaj ruwech y xubij: Re ak'ual re' jun chike ri ak'uala' hebreo, xcha'.

⁷Jari' toq ri ti rana' ri ti ak'ual xubij chire ri rumi'al ri rey: ¿Nawajo' chi ninkanoj-pe jun ixoq israelita richin chi nuya' rutz'um re ak'ual re', richin nuk'iytisaj chawech?, xcha' chire.

⁸Y ri rumi'al ri rey xubij chi tiberukanoj-pe. Y ri ti xten kan ja ri rute' ri ak'ual xberoyoj-pe.

⁹Y ri rumi'al ri rey xubij chire: Tak'uaj re ak'ual re' y tak'iytisaj-pe chinuwech y yin xkatintoj, xcha'. Ri te'ej xuk'uaj k'a el ri ak'ual y xuk'iytisaj.

¹⁰Y toq ri ak'ual kan nim chik, jari' toq xberuya' kan chire ri rumi'al ri rey, y re xten re' kan ral xuben chire y xubij: Roma pa ruwi' ya' xinwelesaj-wi-pe, roma ri' xtubini'aj Moisés, xcha'.

¹¹Y toq q'axineq chik k'iy juna', toq ri Moisés kan achin chik, k'o k'a jun q'ij xbe richin chi xeberutz'eta' ri e ruwinaq israelita, y xutz'et chi kan janila nikitej poqon pa samaj. Xutz'et chuqa' chi jun aj-Egipto janila nuch'ey jun chike ri ruwinaq.

¹²Jari' toq rija' kan k'ulan xtzu'un y xutz'et chi man jun nitz'eton-pe, xukamisaj ri aj-Egipto y xumuq kan pa sanayi'.

¹³Ri ruka'n q'ij xbe chik jun bey chikitz'etik ri ruwinaq y jari' toq xerutz'et chi e ka'i' ruwinaq yech'ayon-ki', y ri Moisés xch'on rik'in ri nich'ayon y xubij: ¿Achike roma nach'ey la awachpochel?, xcha' chire.

¹⁴Y ri achin ri' xubij: ¿At achike k'a rat? Rat man at tata'al ta y man at q'atoy-tzij ta chi nachojmirisaj oyowal ri yebek'ulun-pe chiqakojol ¿O xa nawajo' yinakamisaj achi'el xaben chire ri aj-Egipto?, xcha' chire ri Moisés. Jari' toq ri Moisés kan janila xuxibij-ri' y xubij-qa: Xa xnabetej yan ri xinben, chi xinkamisaj ri jun aj-Egipto, xcha-qa.

¹⁵Toq ri rey xretamaj ri xuben ri Moisés, jari' toq xuteq rukanoxik richin chi tikamisex; jak'a ri Moisés xa xanimej-el chuwech ri rey y xbe k'a pa ruwach'ulew rubini'an Madián, y toq xapon xbetz'uye' k'a chuchi' jun pozo.

¹⁶Y ri chiri' pa Madián k'o k'a jun sacerdote rubini'an Jetro ri ek'o wuqu' rumi'al. Re xtani' re' e kik'uan k'a ri rukarne'l ri kitata' y k'o chi nikelesaj na ri ya' y nikinojisaj ri juku' richin ye'uk'ya' ri karne'l.

¹⁷Jak'a ri ch'aqa' chik yuq'unela' xepe y xekoqotaj-el ri xtani' ri chiri', y toq xutz'et ri Moisés chi keri' xban chike ri xtani' ri', xeruto' y xuya-el kiya' ri kikarne'l.

¹⁸Y toq xetzolin rik'in ri kitata', rija' xubij chike: ¿Achike xiben-pe, achike roma chi'anin xixtzolej-pe wakami?, xcha'.

¹⁹Rije' xkibij: K'o jun achin aj-Egipto xojruto' chikiwech ri yuq'unela', k'ari' xrelesaj ri ya' pa qak'exel, y xuya' kiya' ri qakarne'l, xecha'.

²⁰Y ri kitata' xuk'utuj chike ri rumi'al: ¿Akuchi k'o-wi ri achin ri'? ¿Achike roma xiya' q'ij richin xk'oje' kan? Ja tibewoyoj y tisuju' ruway richin niwa'.

²¹Y keri' toq ri Moisés kan xqa' chuwech richin xk'oje' kan chiri' pa rachoch ri achin ri'. Y toq ik'owineq chik juba' q'ij, ri Jetro xuya' k'a jun chike ri rumi'al chire richin nok rixjayil. Ri xten ri' rubini'an Séfora.

²²Y rija' xralaj k'a jun ak'ual ti ala', ri Moisés xunojij-qa y xubij: Re ak'ual re' xtubini'aj Guersón,*f1* roma yin xa in q'axel chupan jun chik ruwach'ulew, xcha'.

²³Toq q'axineq chik k'iy q'ij, ri rey richin Egipto xken. Man rik'in ri' ri winaqi' israelita kan k'a yejilon na roma ri ilinri'il ri k'o pa kiwi' y xech'on k'a rik'in ri Dios. Y rija' kan xrak'axaj k'a ri kich'abel, roma kan janila nikitej poqon chupan ri ilinri'il ri'.

²⁴Y ri Dios kan xrak'axaj k'a ri kijiloj rije', y kan k'o k'a chi yeruto' roma keri' ri jikibel-tzij ri rubanon ojer, kik'in ri Abraham, ri Isaac y ri Jacob.

²⁵Ri Dios kan xerutzu-pe ri winaqi' israelita y rija' kan xujoyowaj k'a kiwech.