Read Kaqchikel Ex 21 Bible Online

Ex 21 - Kaqchikel bible

Ex 21

¹Ri Jehová xubij chire ri Moisés: Ja pixa' re' ri xtachojmirisaj ri rukusaxik chikiwech ri awinaq:

²Wi ta rix niloq' jun isamajel, ri xa iwinaq, waqi' k'a juna' xkixrusamajij. Jak'a chupan ri ruwuq juna', xtitotej-el y kan man jun k'a ri k'o chi xtutoj kan chiwe.

³Wi k'a ruyon toq xok-pe iwik'in, kan ruyon k'a xtibe, jak'a wi k'o rixjayil toq xpe iwik'in, kan xtibe k'a rachibilan ri rixjayil.

⁴Wi ja ri rajaw xya'on ri rixjayil y re ixoq re' xek'oje' ta ral alaboni' o xtani', ri ixoq y ri ral xkek'oje' kan rik'in ri kajaw, y ri achin kan ruyon k'a xtitotej-el.

⁵Rik'in juba' ri achin ri' nubij ta: Yin kan ninwajo' yik'oje' kan rik'in ri wajaw y chuqa' ninwajo' yik'oje' kan rik'in ri wixjayil y kik'in ri walk'ual; xa man ninwajo' ta chi nuyon yitotej-el, nicha' ta.

⁶Jari' toq ri rajaw xtuk'uaj ri achin ri', richin chi niberuq'alajirisaj kan chikiwech ri to'onela'. Y k'ari' rija' xtutz'araba-apo ri ruxikin ri rusamajel chuwech ri che' ri chapayon ri ruchi' ri jay, o chuwech ri tz'alem richin ri ruchi-jay, richin nuwop rik'in jun ch'ich' ri is-is rutza'n. Jare' k'a ri xtok retal chi re achin re' xyuqe' kan pa samaj rik'in richin jantape'.

⁷Wi k'o jun achin nuk'ayij-el ri rumi'al richin chi niyuqe' pa samaj, re xten re' man xtitotej ta el toq nitz'aqet ri waqi' juna', achi'el yetotej-el ri achi'a'.

⁸Y wi re xten re' xa man xtikir ta xuch'ek ri rajaw y roma ri' ri rajaw xa man xuben ta chi xok rixjayil, achi'el ri xuch'ob pa nabey, ri xten xa xtitotej-el. Jak'a ri achin ri xloq'on man ruk'amon ta chi nuk'ayij chik el chire jun chik achin ri nipe juk'an chik tinamit, roma xa man utz ta xuben chi xuq'ol ri xten.

⁹Y wi ta jun achin nuloq' ta jun xten richin nuya' chire ri ruk'ajol richin nok rixjayil, kan achi'el rumi'al tubana' chire.

¹⁰Y wi ta jun chik achin nuloq' jun xten richin nok rixjayil, man ruk'amon ta chi numalij ri nabey rixjayil chi man ta chik nutzuq, man ta nuya' rutziaq y man ta chik nik'oje' rik'in.

¹¹Y wi re achin re' man ta nuya' ruway, rutziaq y man ta nuben chi k'a rixjayil na, ri loq'on ixoq kan k'o k'a chi nibe chaq keri' y kan man jun k'a xtutoj kan.

¹²Wi k'o ta jun wineq nuch'ey jun chik wineq y ri xch'ay xa niken, ri xbanon, xtikamisex chuqa'.

¹³Jak'a wi k'o ta chik jun wineq ri xa maneq pa ránima richin nuben kamik y nukamisaj ta jun wineq, roma xa kan xapon ri q'ij richin niken, ri xbanon ri kamik utz chi niberewaj-ri' ri akuchi ri xtinbij-wi yin.

¹⁴Wi k'o jun wineq nukamisaj jun rachpochel roma keri' xpe pa ránima roma kan janila royowal chirij y k'ari' niberewaj-ri' chirij ri nuporobal, kan tibewelesaj-pe ri chiri' y tikamisaj.

¹⁵Wi k'o ta jun alk'ualaxel yeruch'ey ta ri rute-rutata', re' kan tikamisex.

¹⁶Chuqa' wi k'o jun wineq nreleq'aj-el jun chik wineq y ruk'ayin chik el o k'a k'o na rik'in toq nichap, kan tikamisex k'a.

¹⁷Chuqa' wi k'o ta jun alk'ualaxel nroyoj itzel pa ruwi' rute' o rutata', re' kan tikamisex.

¹⁸Chuqa' wi ek'o ta e ka'i' achi'a' yech'ayon-ki', y jun chike rije' nusok ta ri rachpochel rik'in abej o rik'in k'olon-q'a' y man niken ta, xaxe nuyabij;

¹⁹toq re wineq re' xtiyakatej y nibiyaj-el rik'in ri ruch'ame'y, ri xsokon richin, xa man jun xtrejqalej, xaxe k'a k'o chi xtutoj ri jampe' q'ij ri man xtisamej ta. Chuqa' xtutoj ri aq'omanik ri xtiban chire.

²⁰Y wi k'o ta jun achin nuch'ey chi che' jun rusamajel, stape' ixoq o achin y niken chuwech, kan xtiqaqa ri rutojbalil pa ruwi'.

²¹Jak'a wi xtik'ase' na chik jun ka'i' q'ij, kan man xtiqaqa ta ri rutojbalil pa ruwi', roma kan k'o ruq'a' chire roma ruloq'on.

²²Wi ek'o e ka'i' achi'a' ri yech'ayon-ki', y chaq k'ate' nikimej jun ixoq yawa' chik y roma ri' re ixoq re' nuben-el tzaqonik y wi man jun ta chik ri achike xuk'uluwachij rija', ri aj-ch'a'oj xaxe k'a xtutoj ri xtuk'utuj ri rachijil ri ixoq y ri xtikiq'et ri q'atoy taq tzij pa ruwi'.

²³Jak'a wi ri ixoq xa niken, ri aj-ch'a'oj kan xtikamisex chuqa',

²⁴roma ri nelesan runaq'-ruwech jun wineq xtelesex chuqa' runaq'-ruwech ri xbanon, ri nelesan rey jun wineq xtelesex chuqa' rey rija', ri nelesan ruq'a' jun wineq xtelesex chuqa' ruq'a' rija', ri xtelesan raqen jun wineq xtelesex chuqa' raqen rija',

²⁵ri xtik'aton richin jun wineq keri' chuqa' xtiban chire rija', ri xtisokon richin jun wineq xtisok chuqa' rija' y ri xtikajin richin jun wineq kan xtikajix chuqa' rija'.

²⁶Wi k'o jun xtuch'ey ri rusamajel, wi achin o ixoq y kan nupaxij jun runaq'-ruwech, k'o chi nuya' q'ij chire richin nitotej-el, roma jare' ri nuch'ek-el pa ruk'exel ri jun runaq'-ruwech.

²⁷Y wi k'o jun xtuch'ey ri rusamajel y nrelesaj jun rey, k'o chi nuya' q'ij chire richin nitotej-el, roma jare' ri nuch'ek-el pa ruk'exel ri jun rey.

²⁸Wi k'o jun bóyix nutoq' jun achin o jun ixoq, y kan nukamisaj, re bóyix re' kan xtikamisex chi abej, y man nitij ta ri rutijul, y ri rajaw ri bóyix man jun xtiban chire.

²⁹Jak'a wi ri bóyix kan nitoq'on y ri rajaw kan retaman y man rik'in ri' kan risq'open y nukamisaj ta jun achin o jun ixoq, k'o k'a chi yekamisex chi abej chi e ka'i', ri bóyix y ri rajaw.

³⁰Jak'a wi ri e rach'alal ri wineq ri xken-el pa ruq'a' ri bóyix, xa méro ri nikik'utuj chire ri rajaw ri chikop ri', rija' kan k'o k'a chi nutoj ri janipe' méro ri nik'utux chire, richin nukol ri ruk'aslen rija'.

³¹Y kan ja chuqa' ruchojmilal re' ri nukusex, wi ri bóyix nukamisaj ta chi uk'a' jun ala' o jun xten.

³²Wi k'o jun bóyix nukamisaj ta chi uk'a' jun samajel ri yuqul pa samaj, stape' achin o ixoq, xtitoj k'a kablajuj onza saqipueq chire ri rajaw ri samajel ri' y ri bóyix xtikamisex chi abej.

³³Wi k'o jun wineq relesan kan ruwi' jun pozo richin ya' o nuk'ot-qa jun jul y man nutz'apej ta kan ruwi' ri jul ri' y nitzaq ta qa jun bóyix o jun bur chupan,

³⁴ri rajaw ri pozo o ri jul, k'o chi xtutoj chire ri rajaw ri chikop ri xken y nok kan richin rija' ri ruch'akul ri chikop.

³⁵Wi k'o jun achin k'o jun rubóyix y nutoq' ta ri rubóyix ri rachpochel y k'ari' niken ta, ri bóyix ri xbanon ri kamik kan xtik'ayix k'a y ri rajel kan xtich'ar chikiwech chi e ka'i' rajaw ri bóyix y ri ruch'akul ri bóyix ri xken, chuqa' xtich'ar chikiwech chi e ka'i'.

³⁶Jak'a wi ri rajaw ri bóyix ri xbanon ri kamik, xa kan retaman chi kan keri' nuben ri rubóyix y kan man xuchajij ta, kan xtuya' k'a ri rubóyix pa ruk'exel ri bóyix ri xken, y ri ruch'akul ri bóyix ri xken xtok richin rija'.