Read Kaqchikel Ex 26 Bible Online

Ex 26 - Kaqchikel bible

Ex 26

¹Ri wachoch xtikiben k'a rik'in lajuj peraj kemon tzieq. Ri peraj tzieq ri' xkeban k'a rik'in ri betz' lino ri jebel rubatz'ixik, ri raxroj, ri q'eqq'oj-keq y keq yetzu'un. Y chuwech k'a ri' xtitz'is kiwachibel querubín y kan jebejoj ok rutz'isik xtiban chike.

²Ronojel ri peraj tzieq k'o chi junan; xtikiya' k'a wuqu' jaj rik'in nik'aj raqen y jun jaj rik'in jun q'a'aj ri ruwech.

³Xkekiq'o' k'a ri wo'o' peraj tzieq, richin xa jun nuben y keri' chuqa' xtikiben chike ri wo'o' chik peraj tzieq.

⁴Y chikichi' ri ka'i' nimalej taq peraj tzieq ri', ri pa kipalen, xkekitz'is k'a k'an ri k'o pa kichi'. Ri k'an ri' k'o chi raxroj yetzu'un y jare' ri xkek'atzin richin yetun ri ka'i' nimalej taq tzieq ri'.

⁵Ri kawineq lajuj taq k'an ri k'o pa kichi', xkekitz'is chikichi' ri ka'i' nimalej taq peraj tzieq ri'. Kan junan k'a kikojol xtikiben chike ri taq k'an ri', richin chi kan nikik'ul-ki' jebel.

⁶Chuqa' xtaben chi tikibana' kawineq lajuj chapbel-tzieq rik'in q'anapueq, y rik'in re' xkekitun ri ka'i' nimalej taq peraj tzieq richin chi xa jun nuben.

⁷Chuqa' xtaben chi tikibana' julajuj peraj tzieq, ri xtikiben rik'in rusumal tzuntzun. Y k'ari' xkekiq'o' richin yekitun y jari' ri xtikiya' pa ruwi' ri wachoch.

⁸Ronojel re peraj tzieq re' k'o chi junan; xtikiya' waqxaqi' jaj raqen y jun jaj rik'in jun q'a'aj ri ruwech.

⁹Wo'o' k'a peraj tzieq ri yeq'o'ox y xa jun niban chike y keri' chuqa' niban chike ri waqi' chik peraj tzieq. Re tzieq re' k'o chi nikiya' pa ruwi' ri wachoch y ri ruchi' ri tzieq ri' xtitzeqe-qa chuwech ri wachoch.

¹⁰Chuchi' ri jun nimalej peraj tzieq ri q'o'on, ri pa rupalen, xkekitz'is k'a kawineq lajuj taq k'an ri k'o pa kichi' y keri' chuqa' xtikiben chuchi' ri jun chik nimalej peraj tzieq ri q'o'on chuqa'.

¹¹Chuqa' xtabij chike chi tikibana' kawineq lajuj chapbel-tzieq, rik'in ri q'enq'oj-pueq y rik'in re' xtikitun ri ka'i' nimalej taq peraj tzieq richin chi xa jun ri nuben.

¹²Ri nik'o ruwi' chire ri raqen ri nimalej tzieq ri k'o pa ruwi' ri wachoch, k'o chi nikijik'-qa juba' chirij chire ri wachoch, richin junan rutza'n nitzeqe' kan ri chirij y ri chuwech.

¹³Ri rutza'n ri nitzeqe' kan ri chirij-qa ri wachoch ka'i' q'a'aj y keri' chuqa' ri chuwech. Jari' k'a ri raqen ri yetzeqe-qa pa chi ka'i' rutza'n, richin nikikuch.

¹⁴Y chuqa' xtaben chi keban ka'i' chik nimalej kuchubel-ruwi' ri wachoch; ri jun xtiban rik'in rusale'y achij karne'l ri kaqarisan rik'in aq'om, y ri jun chik xtiban rik'in kisale'y chikopi' ri nibix tejón chike.

¹⁵Tabana' k'a chi keban utzilej taq marco richin jari' ri ye'ukusex richin nipabex-q'anej ri wachoch y keban rik'in ri che' acacia.

¹⁶Chikijujunal k'a ri marco ri', ka'i' jaj rik'in oxi' q'a'aj kaqen y oxi' q'a'aj kiwech.

¹⁷Chikijujunal k'a ri marco ri' xkekiya' kaka' q'atabel chike, richin chi nikiyuqela-ki'. Keri' k'a ri rubanik xtikibanala' chike chikijujunal ri marco ri'.

¹⁸Richin ri pa xokon chire ri wachoch xtiban k'a juwineq marco.

¹⁹Xkekiben k'a kawineq kich'okolibal ri marco ri' y xkekiben rik'in saqipueq. Jun marco k'o chi ka'i' ruch'okolibal. Y ri ch'okolibel ri' yebe chuxe' ri akuchi nikitun-wi-ki' ri marco.

²⁰Richin ri pa xaman chire ri wachoch xtikiben chuqa' juwineq marco.

²¹Y xkekiben chuqa' kawineq kich'okolibal y xkekiben rik'in saqipueq. Kaka' chuqa' ch'okolibel ri yebe chuxe' jun marco.

²²Richin ri pa qajbel-q'ij, ri chirij-qa chire ri wachoch xtikiben waqi' marco.

²³Chuqa' xtikiben chik ka'i' marco richin chi jeri' ri xkepabalox ri pa taq rutza'n-el chire ri wachoch, ri nitzu'un ri pa qajbel-q'ij.

²⁴Re ka'i' marco re' kow k'a xkek'oje' ri pa jotol y ri pa xulan-qa. Ri pa kitza'n-qa, ri pa xulan, kow xkek'oje' chupan ri kich'okolibal y ri pa jotol, kow xkek'oje' roma k'o jun argolla ri xtichapo kichin, ri chiri' ri pa ka'i' rutza'n chire ri wachoch.

²⁵Y keri', ri pa qajbel-q'ij chire ri wachoch, chi ronojel xtuben k'a waqxaqi' marco y waqlajuj kich'okolibal ri e banon rik'in saqipueq. Kaka' ch'okolibel, kichin chikijujunal ri marco.

²⁶Xtikiben chuqa' wo'o' che' ri e banon rik'in che' acacia y re' xkek'atzin richin xkeq'e'e' chikij ri marco, richin kow yek'oje'. Y jare' ri xkekikusaj ri pa xaman chire ri wachoch.

²⁷Xtikiben k'a wo'o' chik che' ri richin pa xokon chire ri wachoch, wo'o' chik ri richin ri pa qajbel-q'ij chire ri wachoch, ri nitzu'un kela' akuchi k'o-wi ri palou.

²⁸Ri che' ri nibe pa nik'aj chike ri marco, nim raqen, roma numej ri jun rutza'n k'a pa jun chik rutza'n.

²⁹Ronojel k'a marco xkeq'olix rik'in q'anapueq y chuqa' xkekiben argolla rik'in q'anapueq, richin chi chiri' yeju'ux-wi ri che'. Y re che' re' e q'olin chuqa' rik'in q'anapueq.

³⁰Keri' xtipabex-q'anej ri wachoch yin ri banon rik'in tzieq, achi'el rubanik ri xink'ut chawech pa ruwi' ri juyu'.

³¹Tabana' k'a chuqa' chi tiban jun peraj tzieq, richin tasbel rupan ri wachoch. Tiban k'a rik'in betz' lino ri jebel rubatz'ixik, ri raxroj, ri q'eqq'oj-keq y keq nitzu'un. Y chuwech k'a ri' xtitz'is kiwachibel querubín y kan jebejoj ok rutz'isik xtiban chike.

³²Y re tzieq tasbel re' xkeruk'uaj taq rutzeqebal ri e banon rik'in q'anapueq richin xketzeqe' pa kiwi' kaji' pilar ri e banon rik'in che' acacia y q'olin kij rik'in q'anapueq. Re pilar re' xkepabex pa kiwi' ch'okolibel ri banon rik'in saqipueq.

³³Rije' kan xtikitzeqeba' k'a ri tzieq tasbel ri', rik'in ri taq rutzeqebal y ri chirij-apo chiri' xtikiya-wi ri káxa ri q'alajirisabel richin ri tununri'il. Ri tzieq tasbel, jari' ri xtik'oje' chukojol ri loq'olej y ri janila loq'olej chire ri wachoch.

³⁴Y xtikiya' k'a ri tz'apebel ruwi' ri káxa ri q'alajirisabel richin ri tununri'il, ri k'o chiri' pa janila loq'olej chire ri wachoch.

³⁵Jak'a ri pa loq'olej chire ri wachoch, chuwech-apo ri tzieq tasbel, chiri' xtikiya-wi ri mesa richin ri kaxlan-wey, ri pa xaman chire ri wachoch y ri candelabro xtik'oje' pa xokon.

³⁶Richin ri pan okibel chire ri wachoch xtikiben k'a chuqa' jun peraj tzieq y re' xtiban rik'in ri betz' lino ri jebel rubatz'ixik, ri raxroj, ri q'eqq'oj-keq y keq nitzu'un. Y xkekitz'is k'a retz'aba'l ruwech ri peraj tzieq ri'.

³⁷Chuqa' xtikiben taq rutzeqebal ri tzieq ri' rik'in q'anapueq, xkekiben wo'o' pilar rik'in che' acacia y xkekiq'olij rik'in q'anapueq. Y chuqa' xkekiben wo'o' kich'okolibal ri pilar ri' rik'in q'enq'oj-pueq.