Read Kaqchikel Ex 27 Bible Online

Ex 27 - Kaqchikel bible

Ex 27

¹Chuqa' tikibana' jun porobel richin nisuj kamelabel, rik'in ri che' acacia. Ri raqen ri porobel jun jaj rik'in ka'i' q'a'aj y kan keri' chuqa' ri ruwech, jak'a ri rujotolen xaxe nik'aj jaj.

²Ri pa taq rutza'n ri porobel ri' tikibana' k'a kan jujun kiwachibel uk'a'. Re kiwachibel uk'a' re' y ri porobel kan kich'akulan k'a ki'. Y xtikiq'olij kij rik'in ri q'enq'oj-pueq.

³Ronojel ri xke'ukusex chire ri porobel, k'o chi yeban rik'in ri q'enq'oj-pueq, achi'el ri k'ulbel-chaj, ri chapbel-q'aq', ri chapbel-ti'ij, ri nima'q taq leq, ri jik'bel-ti'ij y ri akuchi nik'oje-wi ri racheq-q'aq'.

⁴Chuqa' xtikiben jun k'arak'ik ch'ich' rik'in q'enq'oj-pueq y xtikiya' chupan ri porobel. Y chuqa' xtikiben kaji' argolla rik'in q'enq'oj-pueq y xtikiya' jujun pa taq ruxikin ri pa taq rutza'n.

⁵Xtikiya' k'a ri k'arak'ik ch'ich' ri' chupan ri porobel y oxi' q'a'aj xtik'oje' kan chukojolil ri ruwi' ri ulew rik'in ri ch'ich' ri'.

⁶Chuqa' xkekiben baloj rik'in che' acacia y re' xkekiq'olij rik'in q'enq'oj-pueq.

⁷Re baloj re' xkekiju-el chupan ri argolla ri ek'o pa taq ruxikin ri porobel, toq k'o chi nitelex-el.

⁸Ri porobel k'o chi nikiben rik'in tz'alem y wokowik rupan; kan achi'el rubanik ri xink'ut chawech ri pa ruwi' ri juyu'.

⁹Chuqa' xtikiya' kan jun ruwa-jay ri nusutij-rij ri wachoch. Roma ri' ri pa xokon chire ri ruwa-jay ri' xkekitzeqeba' peraj tzieq richin nikitz'apej rij ri ruwa-jay. Ri peraj tzieq ri' k'o chi banon rik'in betz' lino ri jebel batz'in y ri raqen juwineq wuqu' jaj.

¹⁰Richin ri chiri' pa xokon xkekiben juwineq xata't y ri kich'okolibal y xkekiben rik'in ri q'enq'oj-pueq. Ri xata't ri' xtikik'uaj k'a tzeqebel tzieq y k'an banon rik'in saqipueq, ri yebe chikikojol ri xata't.

¹¹Y ri pa xaman chire ri ruwa-jay kan xtuk'uaj chuqa' ri peraj tzieq ri nutz'apej-rij ri ruwa-jay, ri banon rik'in betz' lino ri jebel batz'in y juwineq wuqu' jaj ri raqen, chuqa' xtuk'uaj juwineq xata't y ri kich'okolibal. Ri xata't ri' xtikik'uaj k'a tzeqebel tzieq y ri k'an banon rik'in saqipueq, ri yebe chikikojol ri xata't.

¹²Chuqa' ri pa qajbel-q'ij chire ri wachoch xtikitzeqeba' jun peraj tzieq, ri k'o oxlajuj jaj rik'in nik'aj raqen. Re' xtutz'apej rij ri ruwa-jay y richin ri' xtikiben lajuj xata't y lajuj kich'okolibal.

¹³Chuqa' ri pa relebel-q'ij chire ri ruwa-jay, ri akuchi nibek'ulun-wi-pe ri q'ij, xtikiya' k'a oxlajuj jaj rik'in nik'aj ri ruwech.

¹⁴Ja ri chiri' k'a xtiban wi oken y pa jun chike ri ruxikin ri akuchi xtik'oje-wi ri okibel, xtikitzeqeba' k'a jun peraj tzieq ri kaji' jaj rik'in jun q'a'aj raqen. Ri peraj tzieq ri' nitzeqe' pa kiwi' oxi' xata't, ri e tikil pa kiwi' ri kich'okolibal.

¹⁵Y ri pa jun chik ruxikin ri akuchi xtik'oje-wi ri okibel, xtikitzeqeba' k'a jun chik peraj tzieq ri kaji' chuqa' jaj rik'in jun q'a'aj raqen. Ri peraj tzieq ri' nitzeqe' pa kiwi' oxi' xata't, ri e tikil pa kiwi' ri kich'okolibal.

¹⁶Ri ruchi' ri akuchi xtiban-wi-apo oken ri chuwa-jay, chiri' k'a xtikitzeqeba' jun peraj tzieq, ri wo'o' jaj rik'in ka'i' q'a'aj raqen, ri banon rik'in betz' lino ri jebel rubatz'ixik, ri raxroj, ri q'eqq'oj-keq y ri keq yetzu'un y kan jebejoj ok rutz'isik ri retz'aba'l ri xtiban chire. Chuqa' xtikiben kaji' xata't y kaji' ruch'okolibal richin nitzeqebex re tzieq re'.

¹⁷Ronojel ri k'an ri yebe chikikojol ri xata't y ri tzeqebel tzieq ri yebe chikij ri xata't, k'o chi yeban rik'in saqipueq y ri kich'okolibal ri xata't yeban rik'in q'enq'oj-pueq.

¹⁸Ri ruwa-jay juwineq wuqu' jaj raqen y oxlajuj jaj rik'in nik'aj ri ruwech. Jak'a ri peraj tzieq ri nitz'apen rij ri ruwa-jay, jun jaj rik'in jun q'a'aj ri rujotolen. Ri peraj tzieq ri' xtiban rik'in lino batz'in y ri kich'okolibal ri xata't xkeban rik'in q'enq'oj-pueq.

¹⁹Ronojel ri samajibel ri yek'atzin chire ri wachoch rachibilan ri ch'ich' ri simej kitza'n, ri yek'atzin richin yebajix pan ulew, richin chi jari' ri kow yechapo ri wachoch, ronojel re' xkeban rik'in q'enq'oj-pueq.

²⁰Tabij chike ri awinaq chi tikik'ama-pe aceite jebel ch'ajch'oj, aceite richin olivo ri yitz'on y jari' ri xtikiya' chupan ri taq candil ri yebe pa ruwi' ri candelabro.

²¹Ja ri Aarón y ri e ruk'ajol ri xke'ilin-apo ri candil ri yetzije' chuwech ri Jehová, toq niqaqa ri q'ij k'a ri nimaq'a' richin ri jun chik q'ij. Re candelabro re' xtik'oje-pe re juk'an chire ri peraj tzieq ri tasayon rupan ri wachoch, ri k'o-pe chuwech ri káxa richin tununri'il. Y re' kan jun pixa' ri richin jantape' y kichin ri iwijatzul ri xkepe chi wiq chi tanaj.