Read Kaqchikel Ex 33 Bible Online

Ex 33 - Kaqchikel bible

Ex 33

¹Ri Jehová xch'on chik k'a jun bey rik'in ri Moisés y xubij chire: Kabiyin y ke'ak'uaj-el ri tinamit ri xawelesaj-pe pan Egipto k'a chupan ri ruwach'ulew ri nusujun kan chike ri Abraham, ri Isaac y ri Jacob, toq xinbij chi chike ri kijatzul ninya-wi kan.

²Yin kan xtinteq k'a el ri nu-ángel chiwech rix richin yixruyuqej y xkenwelesaj k'a el chiwech ri winaqi' ri ek'o chiri': Ri cananeo, ri amorreo, ri heteo, ri ferezeo, ri heveo y ri jebuseo.

³Xkixruyuqej k'a toq xkixapon chupan ri ruwach'ulew ri akuchi niwachin-wi ronojel ruwech tiko'n. Jak'a yin kan man xkibe ta chik iwik'in roma xa kan ix winaqi' ri kan man niqasaj ta iwi'. Man xa roma ri' kixink'is rokik ichapon bey, xcha' ri Jehová.

⁴Y toq ri winaqi' xkak'axaj ri kow taq ch'abel ri xubij ri Jehová, kan janila k'a xebison y man jun ri xukusan ta jebelej taq tzieq y ri wiqobel ri yekikusala'.

⁵Keri' k'a xkiben ri winaqi', roma ri Jehová kan xunabeyajisaj yan k'a rubixik chike. Xa kan xbix yan k'a chike roma ri Moisés chi rije' xa e jun tinamit ri man nikiqasaj ta ki'. Y wi ri Jehová nik'oje' chikikojol, kan pa jun ti ramaj yeruk'is konojel. Y chuqa' chi tikelesaj ronojel ri jebelej taq tzieq chikij y ri wiqobel ri yekikusala'. Y ri Jehová xtunojij na ri achike xtuben kik'in.

⁶Ri winaqi' kan keri' k'a xkiben, kan xaxe toq xe'el-el ri chiri' rik'in ri juyu' Horeb, ri chuqa' nibix Sinaí chire. Kan xekelesala-el chikij ri jebelej taq tzieq y ri wiqobel ri yekikusala'.

⁷Y ri Moisés kan xuben k'a achi'el ri rubanon-pe, chi k'a nej-el juba' chire ri akuchi ek'o-wi-qa, chiri' xberupaba-wi ri jay ri banon rik'in tzieq. Y re jay re', jay richin molojri'il ri xubij chire. Y xabachike k'a ri nikanon richin ri Jehová, kan k'o k'a chi napon k'a akuchi k'o-wi ri jay ri'.

⁸Ronojel k'a mul toq ri Moisés nibe chupan ri jay ri', kan konojel k'a winaqi' yeyakatej y yebepa'e-pe ri chuchi' taq kachoch ri banon rik'in tzieq. Y konojel k'a kitzuliben ri Moisés k'a toq nok na chupan ri jay richin molojri'il.

⁹Kan xaxe k'a nok-apo ri Moisés chupan ri jay ri', jari' toq niqaqa-pe ri sutz' pa'el chikaj y nik'oje' chuchi' ri jay ri' y ri Jehová nitzijon k'a rik'in ri Moisés.

¹⁰Toq ri winaqi' nikitz'et chi ri sutz' pa'el chikaj y k'o chiri' chuchi' ri jay ri', jari' toq chikijujunal yexuke' chuchi' ri kachoch y nikichop nikiya' ruq'ij ri Jehová.

¹¹Ri Jehová y ri Moisés kan nikitzu' k'a ki' toq yetzijon, kan achi'el toq jun wineq nitzijon rik'in jun rachibil. Y toq ri Moisés tzijowineq chik kan rik'in ri Jehová, nitzolin k'a ri akuchi ek'o-wi-qa. Jak'a ri Josué, ri to'onel richin ri Moisés, kan jantape' k'o chiri' chupan ri rachoch ri Dios.

¹²Ri Moisés xubij k'a chire ri Dios: Jehová, rat xabij chuwe richin ninwelesaj-el re tinamit wawe' y kan man abin ta k'a chuwe ri achike ri xtateq-el wik'in richin yiruto' y chuqa' nabij chi kan awetaman nuwech jebel y awetaman chuqa' ri nubi'. Y nabij chi yin kan wilon-wi utzil chawech.

¹³Y wi kan qitzij k'a chi wilon utzil chawech rat, nink'utuj utzil chawe chi xtak'ut ta chinuwech ri niqa' chawech, richin chi rik'in ri' yin xtinwetamaj k'a awech jebel y jantape' ta xtinwil utzil chawech rat. Yin ninbij k'a chawe chi toqaqa chi'ak'u'x, chi re winaqi' re' kan atinamit rat, xcha' ri Moisés.

¹⁴K'ari' ri Jehová xubij chire ri Moisés: Kan xkibe k'a awik'in, richin chi man k'ayew ta xtana' y kan xtik'oje' ri uxlanen awik'in, xcha'.

¹⁵Y ri Moisés xubij chik k'a: Wi rat xa man yabe ta qik'in, man k'a taben chiqe chi yojel-el re wawe'.

¹⁶Roma wi rat xa man xkabe ta qik'in, xa man xtetamex ta chi yin y ri atinamit qilon utzil chawech. Jak'a wi kan xkabe qik'in xtiq'alajin k'a chi kan oj atinamit y kan ja k'a rat ri at ch'arayon-pe qichin chikikojol ri ch'aqa' chik tinamit, ri ek'o chuwech re ruwach'ulew, xcha' ri Moisés chire.

¹⁷Y ri Jehová xubij chik chire ri Moisés: Yin kan xtinben k'a ronojel ri xabij yan qa chuwe, roma kan awilon chik utzil chinuwech yin y jebel wetaman awech, xcha'.

¹⁸Xeri' ri Moisés xuk'utuj k'a chire ri Dios: Wakami k'a taya' q'ij chuwe richin chi yitikir ta nintz'et ri ak'ojlemal, xcha' ri Moisés.

¹⁹Jari' toq ri Jehová xubij chire ri Moisés: Wakami k'a xkiq'ax y rat kan xtawetamaj nuwech chi yin kan in utz wi y xtinq'alajirisaj ri nubi' chawe. Roma yin kan ninjoyowaj-wi ruwech ri ruk'amon richin ninjoyowaj ruwech y ninpoqonaj ruwech ri ruk'amon richin ninpoqonaj ruwech.

²⁰Jak'a chirij ri rurayibel ri Moisés, ri Dios xubij: Kan man xtinya' ta q'ij chawe chi rat xkinatz'et, roma kan man jun wineq ri nitz'eton wichin y nik'ase' ta kan.

²¹Y ri Dios kan jari' toq xubij chire ri Moisés: Tatzu', wawe' k'o jun abej y k'o akuchi utz yapa'e-wi-pe wik'in.

²²Toq xtiq'ax k'a ri nuk'ojlemal chawech, xkatinkusaj-apo chupan re jul re k'o chupan re abej re'. Y yin xtintz'apej k'a awech rik'in ri nuq'a' y xtinwelesaj k'a ja toq in q'axineq chik el.

²³Y toq yin welesan chik el ri nuq'a', jari' toq rat xtatz'et k'a el xaxe chik ri wij; roma ri nuwech kan man jun k'a tz'eteyon, xcha' ri Jehová.