Read Kaqchikel Ex 34 Bible Online

Ex 34 - Kaqchikel bible

Ex 34

¹Ri Jehová xubij chik k'a chire ri Moisés: Ke'achoyo' ka'i' tz'alem taq abej junan kik'in ri xenjech chawe ri pa nabey y xtintz'ibaj chik k'a chikiwech ri abej ri', ri ch'abel ri xintz'ibaj chikiwech ri abej ri xe'apaxij.

²Tachojmirisaj k'a awi' richin chi chua'q nimaq'a' yan, xkajote' k'a el pa ruwi' ri juyu' Sinaí, richin yatapon-q'anej chinuwech.

³Kan man jun k'a wineq tibe awik'in, ni kan man jun chik tijote-el chawij. Chuqa' kan man jun k'a karne'l, ni bóyix keyuq'ux chuxe-apo ri juyu', xcha' ri Jehová.

⁴Y ri Moisés xeruchojmirisaj k'a el ri ka'i' tz'alem taq abej, kan achi'el kibanik ri e ka'i' nabey. Xyakatej nimaq'a' yan y xjote-q'anej pa ruwi' ri juyu' y xeruk'uaj-el ri ka'i' tz'alem taq abej, achi'el xubij ri Jehová chire.

⁵Y ri Jehová kan xqaqa k'a pe chupan ri sutz' y xk'oje' junan rik'in ri Moisés y xuq'alajirisaj ri rubi' chuwech.

⁶Y jari' toq ri Jehová xq'ax k'a el chuwech ri Moisés y xubij: ¡Ja yin Jehová! ¡Jehová jari' ri nubi'! Ri kan in joyowanel y koch'onel y man chi'anin ta k'a nipe woyowal y kan janila nim ri nujoyowanik y kan ninben ri ninbij.

⁷Ri nujoyowanik yin kan xtik'oje' k'a kik'in ri winaqi' ri yepe chi wiq chi tanaj, richin jantape'. Yin kan ninkuy k'a ri itzel taq kibanobal, ri kiyakatajinenri'il y ri kimak. Chinuwech yin, ri yebanon etzelal kan k'o chi nikik'ul ri rutojbalil roma ri kimak. Ri rutojbalil ri kimak ri tata'aj, kan xkerumej ri kalk'ual, ri kimam, ri xikin-kimam y ri kalk'ual ri kixikin-kimam, xcha' ri Jehová.

⁸Ri Moisés kan xaxe k'a xrak'axaj keri', kan jari' xxuke-qa, xuqasaj-ri' k'a pan ulew, richin xuya' ruq'ij ri Jehová.

⁹Y xeri' ri Moisés xubij chire ri ajaw: Wi qitzij chi wilon utzil chawech, tabana' utzil jo' qik'in, stape' re atinamit kan man nuqasaj ta ri' chawech. Kan takuyu' k'a ri itzel taq qabanobal, takuyu' ri qamak y tabana' chiqe chi kan yojok-wi atinamit, xcha' ri Moisés.

¹⁰Y ri Jehová xubij chik chire ri Moisés: Wakami k'a, yin xtinbenbana' chik rutzil jun tununri'il iwik'in. Chuqa' chikiwech ri awinaq kan xkenben k'a meyel taq banobel, ri kan man jun bey e banatajineq ta ri pa taq tinamit ri ek'o chuwech re ruwach'ulew. Kan konojel k'a ri winaqi' kichin ri tinamit ri ek'o-pe chi taq inaqaj, xtikimey ri nimalej nusamaj yin Jehová y kan xtikimey k'a ri xtinbenbana' iwik'in rix.

¹¹Kan tibana' k'a ronojel ri xinbij chiwe chupan re jun q'ij re', y yin kan xkenwelesaj k'a el ri winaqi': Ri amorreo, ri cananeo, ri heteo, ri ferezeo, ri heveo y ri jebuseo.

¹²Tichajij-iwi' richin chi man niben jikibel-tzij richin niya' itzij chike ri winaqi' ri ek'o chiri' ri akuchi xkixapon-wi, richin chi man ye'ok jun pikbel pan ik'aslen y nikiben chiwe richin yixtzaq.

¹³Xa kan xtiyojola' k'a el ri kiporobal y xke'iwulaj-el ri wachibel e paban y kan xtichoy k'a el ri ki-dios Asera.

¹⁴Man tiya' ruq'ij jun chik dios, roma yin Jehová kan man niqa' ta chinuwech chi niya' ruq'ij jun chik dios chinuwech yin.

¹⁵Kan man titun-iwi' kik'in ri winaqi' ri ek'o chupan ri ruwach'ulew ri akuchi xkixapon-wi. Roma ri q'ij toq rije' xtikiya' ruq'ij ri ki-dios y xtikisuj kamelabel chuwech, jari' toq xkixkoyoj. Y rix kan xkixbe k'a, roma man xkixtikir ta xtibij chike chi man yixbe ta. Y keri', rix xtibetija' ri xa xkisuj yan chuwech ri ki-dios.

¹⁶Y toq rix xke'ik'en-apo ri kimi'al rije' richin chi ye'ik'uluba' kik'in ri ik'ajol rix; toq ri xtani' ri' xtikiya' kiq'ij ri ki-dios, xa kan xtikiben chike ri ik'ajol chi tikibana' chuqa' keri'.

¹⁷Man k'a ke'iben ch'aqa' chik dios ri e banon rik'in ch'ich' ya'erisan pa q'aq'.

¹⁸Kan xtichajij k'a ri nimaq'ij richin ri kaxlan-wey ri maneq ch'amilej-q'or rik'in; wuqu' k'a q'ij xtitej ri kaxlan-wey ri', kan achi'el ri nubin chik chiwe, kan xtinimaq'ijuj k'a chupan ri ik' Abib, roma ja ik' ri' toq xixel-pe pan Egipto.

¹⁹Konojel ri nabey taq al alaboni', e wichin yin y keri' chuqa' ri e nabey taq kal ri iwawej, ri e achija' chike ri wákix y ri karne'l.

²⁰Jak'a ri nabey kal ri taq bur k'o chi nikol y niya' jun alaj achij karne'l chuwech y wi man xtikol ta, kan xtiq'upij k'a ri ruqul. Kan xke'ikol k'a konojel ri nabey taq al alaboni'. Kan man jun k'a xtapon chinuwech yin, wi man jun ruk'uan-apo chuwe.

²¹Waqi' k'a q'ij xkixsamej y chupan ri ruwuq q'ij kan xkixuxlan k'a, roma ri' chupan ri ruq'ijul ri tikoj y ri ruq'ijul ri q'atoj kan k'o chuqa' chi yixuxlan chupan ri ruwuq q'ij.

²²Chuqa' xtinimaq'ijuj toq napon ri kawineq lajuj q'ij, xtinimaq'ijuj toq napon ri ruq'ijul richin niq'et ri nabey taq ruwech ri i-trigo y chuqa' xtinimaq'ijuj toq napon ri ruq'ijul richin nik'ol ronojel ruwech ri itiko'n.

²³Kan konojel k'a achi'a' ri e awinaq rat, nik'atzin chi ye'oqaqa chupan re oxi' nimaq'ij re', chupan jun juna', richin ye'oqaqa chinuwech yin Jehová ri ajaw, ri Dios richin ri Israel.

²⁴Roma yin kan xkenwelesaj k'a el ri e etzelanel iwichin y kan xtinnimirisaj k'a ri iruwach'ulew, roma ri' kan maneq chik k'a winaqi' ri xkerayin ri iruwach'ulew. Y rik'in ri keri', rix kan yixtikir yixapon-q'anej chinuwech yin Jehová, chupan chi oxi' nimaq'ij ri niban pa jun juna'.

²⁵Toq nisuj k'a ri kik' richin jun kamelabel, man titun-pe junan rik'in xabachike ri ruk'uan ch'amilej-q'or. Chuqa' toq niben ri natabel richin ri solbelri'il chiri' pan Egipto, ri ti'ij richin ri kamelabel, wi xa man nik'is ta, man tiyek kan richin ri ruka'n q'ij.

²⁶Xtik'uaj k'a chupan ri wachoch yin, ri Jehová ri i-Dios, ri nabey jebelej taq ruwech ri itiko'n. Y ri rutijul jun ti alaj tzuntzun, man jun bey tiroqowisaj chupan ri tz'umaj ri richin ri rute'.

²⁷Xeri' ri Jehová xubij chire ri Moisés: Ke'atz'ibaj k'a re ch'abel re', roma rik'in re ch'abel re' nubanon ri nujikibel-tzij awik'in rat y kik'in ri awinaq, xcha' ri Dios.

²⁸Ri Moisés xk'oje' k'a chiri' rik'in ri Jehová pa ruwi' ri juyu' kawineq q'ij y kawineq aq'a', y kan man jun k'a wey xutej, ni man jun ya' xuqum. Y rija' xutz'ibaj k'a chuwech ri tz'alem taq abej, ri lajuj pixa'.

²⁹K'ari' ri Moisés xqaqa-pe pa ruwi' ri juyu' y ruk'amon-pe ri ka'i' tz'alem taq abej ri', ri niq'alajirisan ri rutzij ri Dios; y ri Moisés, kan man runaben ta k'a chi ri ruwech kan niyik'lun roma kan xch'on rik'in ri Jehová.

³⁰Toq ri Aarón y ri ch'aqa' chik israelita xkitz'et ri Moisés y xkitz'et ri ruwech chi kan niyik'lun, kan janila xkixibij-ki' richin xejel-apo rik'in.

³¹Jak'a ri Moisés xa xeroyoj richin kejel-apo rik'in. K'ari' ri Aarón y ri e tata'al kichin ri israelita xejel k'a apo rik'in y ri Moisés kan xtzijon k'a kik'in.

³²K'ari' xejel chuqa' apo konojel ri winaqi' richin ri tinamit y ri Moisés xuq'alajirisaj chikiwech ronojel ri xubij-pe ri Jehová chire, ri pa ruwi' ri juyu' Sinaí.

³³Y toq ri Moisés xtane' chi ch'owen kik'in ri ruwinaq, jari' toq xukuch ri ruwech rik'in jun tzieq.

³⁴Ronojel k'a mul toq ri Moisés nok-apo richin nich'on rik'in ri Jehová, kan nrelesaj k'a ri tzieq chuwech y nukusaj chik jun bey toq nel-pe ri chiri' chuwech ri Jehová. Y ronojel k'a ri nibix-pe chire roma ri Jehová, rija' nuq'alajirisaj chikiwech ri ruwinaq.

³⁵Ri winaqi' kan nikitz'et k'a chi ri ruwech ri Moisés kan niyik'lun, y ri Moisés kan nukuch chik k'a ri ruwech rik'in ri tzieq y k'a toq nok chik na apo richin nich'on rik'in ri Jehová, k'ari' nrelesaj chik jun bey.