Read Kaqchikel Ex 36 Bible Online

Ex 36 - Kaqchikel bible

Ex 36

¹Roma ri' ri Besalel y ri Oholiab y ri ch'aqa' chik achi'a' ri ya'on ketamabal roma ri Jehová, richin chi yetikir nikiben ronojel ri samajibel richin ri rachoch ri Dios ri richin molojri'il. Rije' kan xtikiben k'a ri samaj ri kan achi'el ri rubin chik ri Jehová, xcha' ri Moisés.

²Xeri' ri Moisés xeroyoj ri Besalel y ri Oholiab y konojel ri achi'a' ri kik'ulun na'oj chuwi-ruq'a' ri Jehová, richin nikiben ronojel ruwech samaj, rik'in ri rayibel ri k'o kik'in.

³Jak'a rije' xa chuwi-ruq'a' chik ri Moisés xkik'ul-wi, ronojel ri sipanik ri xkiya' ri israelita richin nichapatej ri samaj, ri richin ri rachoch ri Dios ri xtiban rik'in tzieq. Ri winaqi' kan rik'in k'a ronojel kánima xkiya' ri sipanik ri'. Y kan keri' k'a nikiben ronojel nimaq'a'.

⁴Xeri' ri achi'a' ri yetajin chubanik ri rachoch ri Dios, xkiyala' kan ri kisamaj, richin xebe rik'in ri Moisés,

⁵y xbekibij chire: Ri sipanik ri nikik'en-pe ri winaqi', kan xq'ax yan ruwi' chire ri nik'atzin chire ronojel ri samaj ri xubij ri Jehová chi k'o chi niban, xecha'.

⁶K'ari' ri Moisés xuteq rubixik chike ri ruwinaq y xubij-el: Man jun chik tik'amon-pe sipanik richin ri rachoch ri Dios, xcha'. Keri' kan xeq'at k'a ri winaqi' richin man xkik'en ta chik pe ri sipanik.

⁷Roma kan k'iy chik k'o richin niban ronojel ri samaj y k'a k'iy na ri xa man xtukusex ta.

⁸Konojel k'a ri más ketamabal chikiwech ri ch'aqa' chik achi'a', ri e cha'on richin ri samaj, jari' ri xebanon ri rachoch ri Dios. Xban k'a rik'in lajuj peraj tzieq kemon, ri banon rik'in lino batz'in y ri betz' raxroj, q'eqq'oj-keq y keq y chuwech re' xban kiwachibel querubín y jak'a ri aj-kem ri más ketaman ri xebanon.

⁹Ronojel k'a ri peraj tzieq junan xban chire, xya'ox wuqu' jaj rik'in nik'aj raqen y jun jaj rik'in jun q'a'aj ruwech.

¹⁰Wo'o' k'a peraj tzieq ri xq'o'ox y xa jun xban chire y keri' chuqa' xban chire ri wo'o' chik peraj.

¹¹Chuchi' k'a ri jun nimalej peraj tzieq ri q'o'on, ri pa rupalen, xekitz'is k'a taq k'an ri k'o pa kichi' y keri' chuqa' xkiben chuchi' ri jun chik nimalej peraj tzieq ri q'o'on chuqa'.

¹²Xetz'is k'a kawineq lajuj taq k'an ri k'o pa kichi', chikichi' ri ka'i' nimalej taq peraj tzieq ri'. Kan junan k'a kikojol xban chire ri taq k'an ri xetz'is-qa, richin chi xkik'ul-ki' jebel.

¹³Chuqa' xkiben kawineq lajuj chapbel tzieq rik'in q'anapueq y kik'in re' xetun-wi ri ka'i' nimalej taq peraj tzieq richin chi xa jun rubanik xuben ri ruwi' ri rachoch ri Dios.

¹⁴Chuqa' xkiben julajuj peraj tzieq ri rik'in rusumal tzuntzun y xekitun richin xkiya' pa ruwi' ri jay ri'.

¹⁵Chi julajuj peraj tzieq ri' e junan; xya'ox waqxaqi' jaj kaqen y jun jaj rik'in jun q'a'aj ri kiwech.

¹⁶Wo'o' peraj xekiq'o' y xa jun xkiben chire y ri waqi' chik chuqa' xekiq'o' y xa jun chuqa' xuben.

¹⁷Xekitz'is k'a kawineq lajuj taq k'an ri k'o pa kichi', chuchi' ri jun nimalej peraj tzieq y chuqa' xkitz'is chik kawineq lajuj taq k'an ri k'o pa kichi' chuchi' ri jun chik nimalej peraj tzieq.

¹⁸Chuqa' xkiben kawineq lajuj chapbel-tzieq, rik'in q'enq'oj-pueq y rik'in re' xekitun ri ka'i' nimalej taq peraj tzieq ri', richin chi xa jun rubanik xuben ri ruwi' ri jay.

¹⁹Y chuqa' xkiben jun chik nimalej kuchubel-ruwi' rachoch ri Dios rik'in rusale'y achij karne'l ri kaqarisan rik'in aq'om. Y ri ruk'isibel tas kuchubel-ruwi' ri jay ri', xkiben rik'in kisale'y ri chikopi' ri nibix tejón chike.

²⁰Chuqa' xkiben ri utzilej taq marco richin ri rachoch ri Dios y re' xkiben rik'in che' acacia.

²¹Chikijujunal k'a ri marco ri', xya'ox ka'i' jaj rik'in oxi' q'a'aj ri kaqen y oxi' q'a'aj kiwech.

²²Chikijujunal k'a ri marco ri' xkiben kaka' q'atabel chike, richin chi xkiyuqela-ki'. Keri' k'a ri rubanik xkiben chike chikijujunal ri marco ri richin ri rachoch ri Dios.

²³Richin ri pa xokon chire ri rachoch ri Dios xkiben k'a juwineq marco.

²⁴Xekiben k'a kawineq kich'okolibal ri marco ri' y rik'in saqipueq xeban-wi. Jun marco k'o chi xuk'uaj ka'i' ruch'okolibal. Y ri ch'okolibel ri' xebe chuxe' ri akuchi xkitun-wi-ki' ri marco.

²⁵Richin ri pa xaman chire ri rachoch ri Dios xban chuqa' juwineq marco.

²⁶Y xekiben chuqa' kawineq kich'okolibal y xekiben rik'in saqipueq. Kaka' chuqa' ch'okolibel ri xebe chuxe' jun marco.

²⁷Richin ri pa qajbel-q'ij, ri chirij-qa chire ri rachoch ri Dios xekiben waqi' marco.

²⁸Chuqa' xekiben chik ka'i' marco richin chi jeri' ri xepabalox ri pa taq rutza'n-el chire ri rachoch ri Dios.

²⁹Y re ka'i' re' xtun pa jotol rik'in jun argolla y ri chuxe' rik'in ri kich'okolibal y keri' xban chire ri pa ka'i' rutza'n chire ri wachoch.

³⁰Waqxaqi' k'a marco ri xeya'ox pa taq rutza'n chire ri rachoch ri Dios, rik'in waqlajuj ch'okolibel, kaka' k'a kich'okolibal chikijujunal ri marco.

³¹Chuqa' xekiben wolajuj baloj taq che' ri banon rik'in che' acacia; wo'o' yek'atzin richin yeq'e'e' chirij ri marco ri yek'oje' pa xaman chire ri jay ri',

³²y ri wo'o' chik baloj taq che' ri yek'atzin ri juk'an chik y ri wo'o' chik ri yek'atzin richin ri marco ri yek'oje' chirij-qa, ri pa qajbel-q'ij chire ri jay.

³³Y jun chike ri baloj che' nik'oje' pa nik'aj chikij ri marco, nitiker-pe pa jun rutza'n k'a pa jun chik rutza'n.

³⁴Ronojel k'a ri marco xeq'olix kij chi q'anapueq y chuqa' xekiben argolla rik'in q'anapueq, richin chi chiri' yekiju-wi ri baloj taq che' chupan. Re baloj taq che' re' kan e q'olin chuqa' kij chi q'anapueq.

³⁵Chuqa' xkiben ri tzieq tasbel rupan ri jay ri' y xkiben rik'in betz' lino ri jebel batz'in, raxroj, q'eqq'oj-keq y keq xkiben chire. Y chuwech k'ari' xkitz'is kiwachibel querubín y kan jebejoj ok rutz'isik xkiben chike.

³⁶Y re' xtzeqebex rik'in tzeqebel-tzieq ri e banon rik'in q'anapueq, xkitzeqeba' chuwech ri kaji' xata't ri e banon rik'in che' acacia y e q'olin kij chi q'anapueq. Pa ruwi' ri' kan xekiben chuqa' kich'okolibal ri xata't y xekiben rik'in saqipueq.

³⁷Chuqa' xban ri jun chik peraj tzieq richin nutz'apej ruchi' ri jay ri' y re' xban rik'in lino ri jebel batz'in, y xukusex ri betz' raxroj, q'eqq'oj-keq y keq, xban retz'aba'l ruwech y kan jebejoj ok rutz'isik xban chire.

³⁸Chuqa' richin nitzeqebex re jun peraj tzieq re', xekiben wo'o' xata't, rik'in retz'aba'l ruwi' y xeq'olix kij rik'in q'anapueq. Chuqa' xekiben achi'el k'an ri xebe chikikojol ri xata't. Xekiben tzeqebel-tzieq rik'in q'anapueq. Y xekiben kich'okolibal ri xata't rik'in q'enq'oj-pueq.