Read Kaqchikel Ex 37 Bible Online

Ex 37 - Kaqchikel bible

Ex 37

¹Ri Besalel xuben k'a ri káxa rik'in che' acacia y ri retabal ri xuya', ja ri wo'o' q'a'aj rik'in nik'aj raqen y ri ruwech xuya' oxi' q'a'aj y ri rujotolen xuya' oxi' q'a'aj.

²Y xuq'olij rik'in q'anapueq ri jebel ch'ajch'oj, ri chirij y ri chupan, xuben k'a retz'aba'l chijun ri ruchi' rik'in q'anapueq.

³Xuben chuqa' kaji' argolla rik'in q'anapueq ya'erisan pa q'aq' y xuyala' ri pa taq rutza'n ri chiri' pa taq ruxikin ri káxa, ka'i' k'a argolla ri xbe juk'an y ka'i' ri juk'an chik.

⁴Y xuben chuqa' ri baloj taq che' nima'q kaqen rik'in che' acacia, y xuq'olij kij rik'in q'anapueq.

⁵Y re baloj taq che' re' xeruk'owisaj chupan ri argolla ri xeruya' pa taq ruxikin ri káxa y re' nik'atzin richin uk'uabel ri káxa.

⁶Chuqa' xuben ri tz'apebel ruwi' ri káxa, ri niya'on kuyubel-mak. Re' xuben rik'in q'anapueq ri jebel ch'ajch'oj, wo'o' q'a'aj rik'in nik'aj raqen y oxi' q'a'aj ruwech xuben chire.

⁷Y pa ruwi' ri tz'apebel ri', ri pa taq rutza'n xeruben jujun kiwachibel querubín ri nikitzu-ki'. Rik'in k'a q'anapueq xeruben-wi y xuben kutzil rik'in bajibel.

⁸Ri jun querubín xuya' pa jun rutza'n ri tz'apebel-ruwi' y ri jun chik xuya' ri pa jun chik rutza'n y re' kan kich'akulan k'a ki' rik'in ri tz'apebel-ruwi' ri káxa.

⁹Ri jun ruwachibel querubín xuben k'a chire chi k'o-apo chuwech ri jun y ri jun chik k'o pe chuwech re jun re'. Xuben chike chi kirik'on-apo ri kixik' chikiwech, richin nikimatzej ruwi' ri tz'apebel. Y xuben chuqa' chike chi rije' yetzu'un-qa pa ruwi' ri tz'apebel.

¹⁰Y chuqa' ja ri Besalel ri xbanon ri mesa y xukusaj che' acacia, ri raqen xuya' wo'o' q'a'aj y ri ruwech ka'i' q'a'aj y ri rujotolen oxi' q'a'aj.

¹¹Y chijun re mesa re' xuya' q'anapueq chirij y xuben jun retz'aba'l ri ruchi' rik'in q'anapueq.

¹²Y chuqa' xban-q'anej jun ti ruchi' y ri jun chik retz'aba'l ri ruchi' rik'in q'anapueq y re' xjote-q'anej oxi' ruwi' q'a'aj.

¹³Rija' xuben kaji' argolla rik'in q'anapueq ya'erisan pa q'aq' y xeruya' ri pa taq ruxikin, ri akuchi e tikil-wi ri kaji' raqen.

¹⁴Ri argolla ri' kan chuxe-ok ri ruchi' ri mesa xeruya-wi, richin yeju'ux ri baloj taq che' chupan richin uk'uabel ri mesa.

¹⁵Ri baloj taq che' ri', ri e uk'uabel ri mesa, xeruben rik'in che' acacia y xuq'olij-kij chi q'anapueq,

¹⁶y junan rik'in ri mesa xeruben ri leq lik'ileq, ri pajbel, ri pichel y ri k'ojelibel richin vino, ronojel re' rik'in q'anapueq jebel ch'ajch'oj xeruben-wi.

¹⁷Y chuqa' ja ri Besalel ri xbanon ri candelabro rik'in q'anapueq ri jebel ch'ajch'oj, y achi'el rubanik jun ti che' almendro xuben chire. Y re' xuben rutzil rik'in jun bajibel. Xuben ri ruch'okolibal, ri raqen, ri ruq'a', ri taq rusi'j y ronojel ri retz'aba'l. Kan ronojel k'a ruch'akulan-ri'.

¹⁸Re candelabro re' xuben chire chi nel-el waqi' ruq'a', oxi' ri juk'an y oxi' ri juk'an chik.

¹⁹Chikijujunal k'a ri ruq'a' xkik'uaj oxi' kiwachibel rusi'j ri almendro, jak'a ri rox rusi'j ri k'o pa taq kitum chike chikijujunal ri ruq'a', ek'o taq k'ojelibel kik'uan.

²⁰Y ri raqen ri candelabro ri akuchi ye'el-el ri ruq'a', xuk'uaj jujun kiwachibel rusi'j almendro. Kaji' k'a rusi'j almendro xuk'uaj.

²¹Richin chi ri jujun k'ulaj ruq'a' xbe jun ruwachibel rusi'j ri almendro chikixe'. Kan keri' xuben chire ri chi oxi' k'ulaj ruq'a'.

²²Ri raqen, ri ruq'a' y ri ruwachibel ri rusi'j ri almendro kan ruch'akulan-ri' xuben chire. Y re' xuben rik'in q'anapueq jebel ch'ajch'oj y xuben rutzil rik'in bajibel.

²³Chuqa' xuben wuqu' taq candil y xeruch'okobala' jujun pa kiwi' ri k'ojelibel ri ek'o pa kitum chike chikijujunal ri ruq'a' ri candelabro y chuqa' ja rija' ri xbanon ri kichojmirisabal ri ruxaq-q'aq' kichin ri taq candil y ri k'ojelibel chaj, kan rik'in k'a ch'ajch'ojilej q'anapueq xeruben-wi.

²⁴Richin chi xuben ri candelabro y ronojel ri samajibel ri nik'atzin, xukusaj jubama oxi' arroba ch'ajch'ojilej q'anapueq.

²⁵Keri' chuqa' ri Besalel xuben ri porobel-pom rik'in che' acacia. Ri retabal ka'i' q'a'aj ri ruwech y kan keri' chuqa' ri raqen y wo'o' q'a'aj rujotolen. Chuqa' xuben kaji' achi'el uk'a', ri pa taq rutza'n, ri pa ruwi-q'anej y re' ruch'akulan-ri' rik'in ri porobel-pom.

²⁶K'ari' xuq'olij rij rik'in q'anapueq ri jebel ch'ajch'oj. Xuq'olij ri ruwi', ri pa taq ruxikin y ri taq uk'a'. Y xuben chik q'anej jun ti ruchi' rik'in q'anapueq ri jebel ch'ajch'oj.

²⁷Chuqa' xuben ka'i' argolla rik'in q'anapueq, richin xebe chuxe' ri ruchi' ri porobel, jun pa jun rutza'n y jun ri juk'an chik. Chuqa' xuben chik ka'i', richin chi xebe ri juk'an chik. Richin chi chupan ri argolla ri' yeju'ux ri baloj che', richin chi nitelex-el.

²⁸Ri baloj che' ri' rik'in k'a ri che' acacia xeruben-wi y xuq'olij-kij rik'in q'anapueq.

²⁹Chuqa' xuben ri aceite richin ri cha'onri'il. Y xuben chuqa' ri jubulej pom ri jebel ch'ajch'oj rubanik. Y re' kan achi'el ri nuben jun banoy jubulej aq'om, kan keri' rubanik xuben chire.