Read Kaqchikel Ex 40 Bible Online

Ex 40 - Kaqchikel bible

Ex 40

¹Xeri' ri Jehová xch'on chik jun bey rik'in ri Moisés y xubij chire:

²Chupan ri nabey q'ij chire ri nabey ik' chire ri juna', jari' toq xtapaba-q'anej ri wachoch richin molojri'il.

³Xtaya-apo ronojel re' chupan: Ri káxa richin ri nujikibel-tzij, ri peraj tzieq ri nich'aron rupan ri jay.

⁴Chuqa' xtaya-apo ri mesa y ronojel ri samajibel ri yek'atzin chire, ri candelabro y ri taq candil ri yetzije'.

⁵Xtaya-apo ri porobel-pom banon rik'in q'anapueq, chuwech-pe ri tzieq tasbel rupan ri wachoch akuchi k'o-wi ri káxa. K'ari' xtatzeqeba' ri peraj tzieq chuwech ri akuchi niban-wi oken chupan ri wachoch.

⁶Chirij ri' k'ari' xtaya-apo ri porobel richin ri poron chikop, chuwech-apo ri akuchi niban-wi oken chupan ri wachoch richin molojri'il.

⁷Xeri' xtaya-apo chuqa' ri yakbel-ya' chikikojol ri wachoch richin molojri'il y ri porobel y tanojisaj chi ya'.

⁸Chirij k'a ronojel re' xtaya' ri peraj tzieq richin ri ruwa-jay y chuqa' ri peraj tzieq ri nitzeqe' ri akuchi niban-wi-apo oken chupan ri ruwa-jay.

⁹Xeri' xtachop ri aceite richin cha'onri'il y xtaya' pa ruwi' ri wachoch y ronojel ri samajibel ri ek'o chupan, kan xke'ajech k'a chuwe yin ronojel y xke'ok ch'ajch'oj.

¹⁰Xtaya' chuqa' aceite pa ruwi' ri porobel richin niporox chikop y ronojel ri samajibel ri yek'atzin chire. Keri' kan xtajech k'a chuwe yin y xtok ch'ajch'oj.

¹¹Keri' chuqa' xtaya' aceite pa ruwi' ri yakbel-ya' y ri ruch'okolibal y xke'ajech chuwe yin.

¹²Xeri' xke'awoyoj ri Aarón y ri e ruk'ajol ri pan okibel chire ri wachoch, ri richin molojri'il y xke'ach'ajch'ojirisaj rik'in ya'.

¹³K'ari' xtawiq ri Aarón rik'in ri tzieq richin ri rusamaj y xtaqasaj aceite pa ruwi', richin nok nu-sacerdote y utz chik richin chi yirusamajij.

¹⁴Xeri' xtaben richin xkepe chuqa' chawech ri e ruk'ajol y kan xke'awiq chuqa' rik'in ri nim raqen kitziaq,

¹⁵y kan xtaqasaj k'a aceite pa kiwi' achi'el xaben chire ri Aarón, rik'in keri' kan xke'ok k'a nu-sacerdote, richin chi yinkisamajij. Y re' kan xtuben k'a chi xe'ok yan kan pa samaj ri e kijatzul ri xkepe chi wiq chi tanaj, xcha' ri Jehová.

¹⁶Ri Moisés kan xuben k'a ronojel ri xbix chire roma ri Jehová.

¹⁷Keri' xbanatej chupan k'a ri nabey q'ij chire ri nabey ik' richin ri ruka'n juna' chire ri ke'el-pe pan Egipto. Jari' toq xkipaba-q'anej ri rachoch ri Dios.

¹⁸Toq ri Moisés xupaba-q'anej ri rachoch ri Dios, xeruya' ri ch'okolibel, xerupaba-q'anej ri marco, xeruju' ri baloj y xeruya' ri xata't pa taq kik'ojelibal.

¹⁹K'ari' xrik'-q'anej ri tzieq kuchubel-ruwi' ri rachoch ri Dios y pa ruwi' chik ri' xrik'-q'anej nima'q taq peraj sale'y, achi'el rubin ri Jehová chire ri Moisés.

²⁰Y ri Moisés xberuk'ama-pe ri tz'alem taq abej ri k'o ri pixa' richin ri rujikibel-tzij ri Dios chuwech y xuya-qa chupan ri káxa ri xban. K'ari' xeruju' ri baloj taq che' ri yek'atzin richin uk'uabel ri káxa y xuya' kan ri tz'apebel-ruwi' ri niya'on kuyubel-mak.

²¹Chirij re' xukusaj-apo ri káxa chupan ri rachoch ri Dios y k'ari' xuya' ri peraj tzieq ri nich'aron rupan ri jay. Kan xuben k'a kan chire ronojel achi'el ri rubin ri Jehová.

²²Chuqa' xuya-apo ri mesa chupan y xuya' kan pa xaman chire ri jay ri'; k'a chuwech-pe ri peraj tzieq xuya-wi.

²³Y pa ruwi' re mesa re' xerunuk' kan ri kaxlan-wey chuwech ri Jehová. Kan xuben kan achi'el ri rubin ri Jehová chire.

²⁴Chuqa' xuya-apo ri candelabro chupan y xuya' pa xokon chire ri jay ri', k'a juk'an-pe chire ri akuchi k'o-wi ri mesa.

²⁵K'ari' xerutzij kan ri taq candil chuwech ri Jehová y kan xuben kan ri achi'el ri rubin chire.

²⁶Chuqa' xuya-apo ri porobel-pom ri banon rik'in q'anapueq chupan ri rachoch ri Dios, ri richin molojri'il y k'a chuwech-apo ri tasbel rupan chiri' xuya-wi.

²⁷Y xuporoj k'a kan pa ruwi' re porobel re' ri jubulej pom, roma keri' rubin ri Jehová.

²⁸Xeri' xtzeqebex-q'anej ri peraj tzieq ri nik'oje' ri akuchi niban-wi oken chupan ri rachoch ri Dios.

²⁹Y chuwech ri okibel xuya-apo ri porobel richin niporox chikop. Y pa ruwi' ri' xusuj jun kamelabel ri niporox chijun ri chikop y jun sipanik richin jalajoj ruwech ixin. Y ronojel k'a re' xban chire achi'el rubin ri Jehová chire ri Moisés.

³⁰Chuqa' xuya-apo ri yakbel-ya' y re' xuya' chukojol ri rachoch ri Dios, ri richin molojri'il y ri porobel, y xunojisaj chi ya' richin chi chiri' nikik'en-wi ri ya' ri nikikusaj ri Moisés, ri Aarón y ri e ruk'ajol richin nikich'ej ri kiq'a' y ri kaqen.

³²Ronojel mul toq ye'ok-apo chupan ri rachoch ri Dios y toq yejel-apo rik'in ri porobel, kan k'o chi nikich'ej ri kiq'a' y ri kaqen; roma kan keri' rubin ri Jehová chire ri Moisés.

³³Pa ruk'isibel xban-q'anej ri ruwa-jay ri nusutij-rij ri rachoch ri Dios y ri porobel, y xtzeqebex-q'anej ri peraj tzieq ri akuchi niban-wi oken chupan ri ruwa-jay. Y keri' ri Moisés xk'achoj chubanik ronojel.

³⁴Y toq xk'achoj ronojel re', jari' toq ri sutz' xumatzej rij ri rachoch ri Dios y ri ruk'ojlemal ri Dios kan xunojisaj ri rachoch.

³⁵Ri Moisés kan man nitikir ta k'a nok-apo chupan ri jay, roma ri sutz' ri' kan rumatzen k'a rij y ri ruk'ojlemal ri Jehová kan runojisan ri jay.

³⁶Chupan ronojel ri kibinen, toq ri sutz' ri' niyakatej-el pa ruwi' ri rachoch ri Dios, jari' toq ri israelita nikichop chik binen jun bey.

³⁷Wi ri sutz' man niyakatej ta el pa ruwi' ri rachoch ri Dios, kan man nikichop ta el ri binen y k'a ja ri q'ij toq niyakatej-el, k'ari' nikichop chik binen jun bey.

³⁸Ri sutz' ri richin ri Dios kan xk'oje' k'a pa ruwi' ri rachoch ri richin molojri'il y ri chi'aq'a', ri sutz' ri' nok ruxaq q'aq' chikiwech konojel ri e rijatzul kan ri Israel, chupan ri kibinen. Janipe' k'a juna' ri xebiyin ri israelita, xkitz'et ri sutz' jotol chikaj pa ruwi' ri rachoch ri Dios y ri chi'aq'a' ri sutz' ri' kan nok ruxaq q'aq'.