Read Kaqchikel Ex 5 Bible Online

Ex 5 - Kaqchikel bible

Ex 5

¹Y k'ari' ri Moisés y ri Aarón xe'apon chuwech ri rey y xkibij chire: Ri Jehová ri Dios richin ri Israel, kere' ri rubin-pe: Taya' q'ij chire ri nutinamit richin niberubana' jun nimaq'ij chuwe yin ri pa tz'iran ruwach'ulew, chayineq-pe, xecha' rije'.

²Jak'a ri rey xubij: ¿Achike chi Dios ri Jehová richin chi ninwak'axaj ri nubij y ninya' q'ij chire ri tinamit Israel richin nibe? Yin man wetaman ta ruwech ri Jehová, ni man xtinya' ta q'ij richin ri tinamit nibe, xcha' chike.

³Y rije' xkibij: Ri Dios ri richin ri tinamit Israel xuk'ut-ri' chiqawech; roma ri' nik'atzin chi roj yojbiyin oxi' q'ij k'a pa tz'iran ruwach'ulew y chiri' nibeqasuju' kamelabel chuwech ri Jehová ri qa-Dios. Roma wi man xtiqaben ta re', rik'in juba' xqojrukamisaj rik'in jun nimalej yabil, o yojken chi espada, xecha' chire.

⁴Jak'a ri rey xubij chike: Rix Moisés y Aarón ¿Achike roma toq niben chike ri iwinaq richin rije' nikipaba' ri kisamaj? Y rix tibana' ri isamaj ri k'o chi niben, xcha'.

⁵Y chuqa' xubij chike: Titzu' la iwinaq janila xewinaqir re wawe' pan Egipto. Y rix kan niwajo' richin man yesamej ta, xcha' chike.

⁶Y chupan ri q'ij ri', ri rey xubij chike ri achi'a' ri e pa'el pa kiwi' ri aj-raqen ri ek'o pa kiwi' ri israelita ri e yuqul pa samaj:

⁷Wakami k'a man niya' ta chik ri páxa chike ri winaqi', richin nikiya' chupan ri ch'abeq achi'el ri banon-pe chike. Wakami xa kan ja rije' xkebekanon.

⁸Y man tiqasaj ri rajlabal ri xan. Xa tikibana' achi'el ri kibanon-pe ronojel q'ij. Roma xa yalan kiq'oral, roma ri' yesik'in richin nibekisuju' kamelabel chire ri ki-Dios.

⁹Tinimirisaj k'a ri ilinri'il pa kiwi' richin nibe kik'u'x rik'in ri kisamaj y man tikak'axaj ri tz'ukun-tzij ri niban chikiwech, xcha' ri rey.

¹⁰K'ari' xebe k'a ri aj-raqen aj-Egipto kik'in ri e aj-raqen ri ek'o pa kiwi' ri kiwinaq israelita ri e yuqul pa samaj y rije' xkibij chike ri kiwinaq: Ri rey kere' nubij: Yin man ninya' ta chik ri páxa chiwe.

¹¹Wakami k'a ja rix ri xkixkanon y akuchi na xtiwil-wi, y man rik'in ri' man ninqasaj ta ri rajlabal ri xan ri k'o chi niben, nicha' ri rey, xecha' rije'.

¹²Y roma ri' ri israelita xkitaluj k'a ki' chijun ruwach'ulew Egipto chukanoxik q'ayis ri nikikusaj pa ruk'exel ri páxa.

¹³Ri aj-Egipto ri e pa'el pa kiwi' ri aj-raqen chikikojol ri israelita yekipararej, y nikibij k'a chike: K'o chi niben ri rajlabal ri xan, achi'el ri niben pa jun q'ij toq k'a niya'ox na ri páxa chiwe, xecha'.

¹⁴Y toq man xetikir ta xkiben, kan janila k'a xech'ay ri caporal koma ri aj-raqen ri e ruya'on ri rey, y xkik'utuj k'a chike: ¿Achike roma man xijech ta ronojel ri xan richin iwir y chuqa' re wakami man xijech ta achi'el ri ibanon-pe?, xecha' chike.

¹⁵Jari' toq xebe ri e aj-raqen israelita rik'in ri rey y xkibij chire: ¿Achike roma naben chiqe, richin niqatej poqon roj ri oj asamajela'

¹⁶richin man niya'ox ta chik ri páxa chiqe? ¿Achike roma nibix chi tiqabana', achi'el ri qabanon-pe ronojel q'ij? ¿Y chuqa' achike roma kan janila k'a yojch'ay, y chire re' ja ri winaqi' awichin rat ri k'o kimak?, xecha' chire.

¹⁷Jak'a ri rey xubij: Rix ix q'ori', ja', kan janila ix q'ori'. Roma ri' nibila' chi nibesuju' kamelabel chire ri Jehová.

¹⁸Kixbiyin, kixbesamej, y kan man xtiya'ox ta ri páxa chiwe y k'o chi nijech ri rajlabal ri xan, ri q'aton pan iwi', xcha' ri rey chike.

¹⁹Jari' toq ri e aj-raqen chikikojol ri israelita, xkina' chi ek'o pa latz', toq xbix chike chi man niqasex ta ruwi' ri rajlabal ri xan ri q'aton pa kiwi' richin chi nikijech.

²⁰Y toq xe'el-pe rik'in ri rey, jari' toq xkik'ul-ki' kik'in ri Moisés y ri Aarón; e koyoben-apo.

²¹Y ri aj-raqen ri' xkibij chike ri Moisés y ri Aarón: Ja ri Jehová xtuq'et-tzij pan iwi', roma ri yixajin chubanik roma ja rix ri k'o imak chi ri rey y ri e rusamajela', man yojqa' ta chik chikiwech, y kan jak'a rix ri xixbanon chi xkichop ri ki-espada richin yojkikamisaj, xecha'.

²²Toq xkak'axaj re', jari' toq ri Moisés xbech'on rik'in ri Jehová y xubij: Ajaw, ¿achike roma janila ye'aya' pa tijoj-poqonal re tinamit re'? ¿Roma re' toq xinateq-pe?

²³Roma xa kan xaxe toq xibe rik'in ri rey, richin yich'on pan abi' rat, kan jari' k'a toq xunimirisaj ri tijoj-poqonal pa qawi' roj ri oj atinamit y rat k'a man jani oj akolon ta el, xcha'.