Read Kaqchikel Job 11 Bible Online

Job 11 - Kaqchikel bible

Job 11

¹K'ari' ri Zofar ri aj-Naamat xch'on y xubij chire ri Job:

²Ronojel ri wololinik ri xaben-qa kan k'atzinel nik'ulubex-pe. ¿Kan k'o kami chi ninimex ronojel ri ch'abel ri yerubila' jun achin ri achi'el rat?

³¿Nach'ob rat chi rik'in ri xe'awolola-qa, kan yatikir naben chike ri winaqi' chi man jun ti ch'abel ri yetikir nikibij? ¿Xatze'en-qa, y chij kan man jun ta k'a nitikir niya'on ak'ix rat?

⁴Rat kan man jun chawech toq xabij-qa chire ri Dios: Ri nubanik chawech kan ch'ajch'oj-wi. Rat kan atzuliben chi man jun itzel banobel nilitej ta chuwij, yacha' chire ri Dios.

⁵¡Jebel ta ri' xa ta ri Dios nich'on ta pe. y kan ta nubij-pe ri itzel rubanik ri ak'aslen rat!

⁶Kan nuq'alajirisaj ta chawech ri na'oj ri k'o rik'in rija', roma kan nitikir nuwulaj xabachike rubanik ruch'obonik jun wineq nowineq. Kan tawetamaj k'a chi ri Dios xa juba' ok ri tijoj-poqonal ri ruya'on pan awi', chire ri kan ruk'amon ta chi nak'ul.

⁷¿Yatikir kami nawetamaj rat ri achike ri qitzij rubanik ri Dios? ¿Yatikir kami rat yatapon rik'in ri ach'obonik k'a akuchi napon-wi ri ruchi' ri retamabal ri Dios, ri k'o ronojel uchuq'a' pa ruq'a'?

⁸Roma ri retamabal rija' más nej napon-wi ke chuwech ri kaj, y man jun yatikir naben richin naq'i' ri'. Chuqa' ri retamabal rija' más nej napon-wi-qa ke chuwech ri rupan-qa ri ruwach'ulew, y man jun yatikir naben richin nawetamaj ri'.

⁹Ri retamabal rija' más nim ruwech ke chuwech ruwech re ruwach'ulew. Chuqa' ri retamabal rija' más nim ruwech, ke chuwech ruwech ri palou.

¹⁰Wi ta nipe pa ránima rija' chi yaruchop y yarutz'apej pa cárcel, o yaroyoj richin nuq'et-tzij pan awi'. ¿K'o kami ri yatikir naben richin nato-awi'?

¹¹Roma rija' retaman kiwech ri winaqi' ri yetz'ukun-tzij xaxe richin nikil ri nikajo'. ¿Kan man kami nutzu' ta ri Dios ri itzel kibanobal ri winaqi'?

¹²Jun nakanik wineq man jun bey xtok ta aj-na'oj, achi'el jun ixoq bur richin pa juyu', man jun bey nralaj ta jun wineq.

¹³Xa ta rat najech jumul ri awánima chire ri Dios, y nayuq ri aq'a' richin naya-apo pa ruq'a' rija'.

¹⁴Wi kan ye'aben k'a ri itzel taq rayibel ri yepe awik'in, katane' chikibanik; y man taya' q'ij chi nuben-qa rusok chupan ri ak'aslen.

¹⁵K'ari' kan man xkak'ix ta chik; xa xkatikir k'a xtayek ri ajolon rik'in ch'ajch'ojil, y xtik'oje' awuchuq'a' y man xtaxibij ta chik awi'.

¹⁶Keri' kan xtamestaj k'a ronojel ri q'axomal ri xak'owisaj, roma xa kan xq'ax k'a achi'el niq'ax ri ya' richin jun raqen-ya', xa choj chik xtanataj.

¹⁷Ri ak'aslen kan más q'alaj ri xtuben, xa kan achi'el ri saqil ri pa nik'aj-q'ij. Y stape' niq'equmatej-pe chupan ri ak'aslen, rat kan xtana' chi achi'el xa niseqer-pe chawech.

¹⁸Kan man jun k'a xtibanon chawe chi axibin ta awi'. Xa kan kikoten awoyoben-apo ri peteneq. Kan ja ri Dios xtichajin awichin y kuqul ak'u'x xkawer.

¹⁹Xkakotz'e-qa y man jun xtaxibij ta awi' stape' ek'o ye'etzelan awichin. Y re' xtuben chike ri winaqi' chi xkatkikanoj y xtikik'utuj utzil chawe.

²⁰Jak'a ri runaq' taq kiwech ri e itzel taq winaqi' kan xtik'is kuchuq'a', y man jun akuchi xtikito-wi-ki'. Xaxe k'a ri kamik ri xtito'on-el kichin chuwech ri'.