Read Kaqchikel Job 12 Bible Online

Job 12 - Kaqchikel bible

Job 12

¹K'ari' ri Job xch'on chik kik'in ri yeq'ejelon richin y xubij:

²Kan qitzij na wi ja rix ri ix ruch'abel ri tinamit; y toq xkixken rix, jari' chuqa' toq xtik'is ri na'oj chuwech re ruwach'ulew.

³¿Y xaxe kami rix ri k'o inojibal? Ni, yin chuqa' k'o nunojibal. Yin man más ta in ko'ol ke chiwech rix. ¿Achike ta k'a man ta etamayon ronojel ri xibij-qa?

⁴Yin in jun chike ri xa nitze'ex koma ri rachibil; jun ri xch'on-q'anej rik'in ri Dios, y xk'ulubex-pe ri ruch'abel. Man rik'in ri', ri choj y tz'aqet ruk'aslen kan nitze'ex koma ri rachibil.

⁵Ri kan utz ek'o man nikajo' ta jun ri xa k'ayew rubanon, y kan man jun nuben chike chi nikitzeq ri xa nijilil beneq richin nibetzaq.

⁶Ri kachoch ri eleq'oma' kan beneq pa jotol, y ri nikiyek royowal ri Dios kan jikil ek'o. Rije' kan kibanon k'a chire ri kuchuq'a' y ri kina'oj chi jari' ri e ki-dios.

⁷Ronojel kan ja ri Dios ri niya'on q'ij richin chi nibanatej, roma xa ta yech'on ri chikopi' ri yebiyin pa ruwi' ulew, yixkitijoj ta chi keri'. Y xa ta yech'on ri aj-xik' taq chikopi', rije' nikichololej ta chuqa' chiwe.

⁸Keri' xa ta nik'utuj chire ri ruwach'ulew y nich'on ta pe, kan nuk'ut ta chiwech. Chuqa' xa ta yixtikir nik'utuj chike ri ker ri ek'o chupan ri palou kan nikiq'alajirisaj ta chiwe.

⁹Chike konojel re' ¿k'o kami jun ri man retaman ta chi ja ri Jehová banayon richin?

¹⁰Kan ja wi ri ruchuq'a' ri Dios ri xya'on kik'aslen konojel ri ek'o chuwech re ruwach'ulew. Kan ja rija' ri xya'on ri uxla' richin k'aslen chike konojel ri winaqi'.

¹¹Ri qak'axabal kan richin k'a chi nrak'axaj, y nuya' rukojolil ronojel ruwech ch'abel, kan achi'el ri qaq' nuna' ri ki' y ri k'ey.

¹²Kan tikanoj na'oj kik'in ri e rijita'q taq achi'a' chik. Chupan ri juna' e kiq'axalon chik, k'o k'iy na'oj ruya'on kan chike.

¹³Jak'a ri na'oj y ronojel ri uchuq'a' kan richin ri Dios; kan retaman y kan nutzu' chik apo ri peteneq.

¹⁴Roma ri' toq rija' k'o ri nuwulaj, man jun chik nitikir nipaban-q'anej. Toq rutz'apen jun wineq pa jun tijoj-poqonal, man jun ri xtisq'open-el richin.

¹⁵Wi rija' nuq'et ri job, ronojel nichaqi'j-qa; y wi nuteq-pe janila job, numuq ri ruwach'ulew.

¹⁶Ri uchuq'a' y ri ch'akonik kan richin k'a ri Dios. Kan ja chuqa' rija' ri niq'aton-tzij pa ruwi' ri wineq ri niq'ol, y pa ruwi' ri niq'olon jun chik wineq.

¹⁷Rija' kan nuben k'a chike ri yepixaban chi nik'is ch'abel kik'in, y nuben nakaneq chike ri to'onela'.

¹⁸Rija' nuben chike ri e rey chi nrelesaj ri q'atbel-tzij pa kiq'a', y nuben chike chi yexim xekipan rik'in kolo'.

¹⁹Kan yerelesaj k'a el ri sacerdote ri ek'o pa taq kisamaj y choj keri' yebe. Kan yerelesaj-el ri nikina' chi k'o uchuq'a' pa kiq'a'.

²⁰Rija' nutz'apej kichi' ri kan banon chike chi ja ri qitzij ri nikibij, y nrelesaj ri utzilej nojibel chike ri rijita'q taq achi'a'.

²¹Nuben chike ri tata'al chi maneq chik kiq'ij, y ri k'o janila kuchuq'a' kan nrelesaj ri uchuq'a' kik'in.

²²Rija' nuq'alajirisaj ri kan man e tz'etel ta ri ek'o pa q'equ'm, y kan nrelesaj chuwa saqil ri rumujal ri kamik.

²³Rija' yeruwinaqirisaj ri tzobaj winaqi' richin ri ruwach'ulew, y rija' chuqa' nik'ison kichin. Yerutaluj-el y k'ari' yerumol chik.

²⁴Rija' nuben chike ri aj-raqen kichin ri tinamit ri ek'o ketamabal chi man yech'obon ta chik. Nuben chike chi yebe-kela', yebe-kela' achi'el xa ta e beneq pa jun tz'iran ruwach'ulew ri akuchi xa maneq bey.

²⁵Yemaqaqlan k'a e beneq, achi'el pa q'equ'm e beneq-wi y maneq saqil. Nuben chike chi yetzalima'y yebiyin achi'el nikiben ri q'abarela'.