Read Kaqchikel Job 14 Bible Online

Job 14 - Kaqchikel bible

Job 14

¹Roj winaqi' xa maneq k'a quchuq'a' y nik'atzin qato'ik, y chuqa' xa ka'i' oxi' ok q'ij nuben ri qak'aslen. Man rik'in ri' kan nojineq chi ruk'ayewal.

²Ri k'aslen nik'ulun-pe, achi'el nik'ulun-pe jun kotz'i'j, y xa chi'anin nimayer-qa. Chuqa' achi'el ri muj ri xa junanin niq'ax-el.

³¿Achike k'a roma toq xa pa ruwi' jun ti achin achi'el yin ach'ikon-pe ri runaq' awech, y kan yinawoyoj chawech richin naq'et-tzij pa nuwi'?

⁴Roma kan man tikirel ta k'a chi k'o ta jun ri kan ch'ajch'oj, toq xa wineq y k'a k'o na chuwech re ruwach'ulew. Kan man jun.

⁵Kan ja rat k'a ri yabin ri janipe' q'ij ruk'aslen naya' jun wineq. Ja rat chuqa' yabin janipe' ik' nik'ase' ri wineq. Kan ja rat yabin akuchi napon-wi ri ruk'aslen, y ri wineq man nitikir ta niq'ax jun ti ramaj chire ri ruk'aslen ri abin rat.

⁶Kan taya' k'a q'ij chi yinuxlan ta juba' pan aq'a' chi kan man ta chik chi jantape' k'o ri runaq'-awech pa nuwi'. Xa taya' q'ij chi nink'is na el ri q'ij richin ri nuk'aslen y yikikot ta, achi'el nikikot jun ri nisamej chiq'ij.

⁷Yin man in junan ta k'a rik'in ri jun relik che', roma jun che' nijotayin, stape' niqasex-qa kan k'a tikirel na chi ye'el-pe ralajul y yek'iy.

⁸Y man rik'in ri ruxe' ri che' nipe rurijixinen chuxe' ri ulew, y ri rukuta'm ri k'o chuwa-kaq'iq' xa niq'ey-qa.

⁹Jak'a wi nuk'ul ri ya' xa kan niberaxer-pe, y kan nibe-el chik pe ruq'a' achi'el jun che' ri kan k'a alaj na.

¹⁰Jak'a toq ri wineq niken, kan jumul nik'is ri ruchuq'a'. Toq nitane' richin nujiq'aj ri ruxla', jari' xk'is chiri'.

¹¹Roj winaqi' xa oj achi'el k'a ri ruxla' ri ya' ri niyakatej-pe pa ruwi' ri palou; xa oj achi'el ri ruxe' jun raqen-ya' ri xa chaqi'j chik.

¹²Roj kan yojtzaq pa ruq'a' ri kamik y kan man yojtzolin ta chik pe, toq kan k'a q'axineq chik na ri kaj.

¹³¡Tabana' utzil nu-Dios, kinaya-qa k'a chuxe' ulew, richin yinewatej chawech. Toq ik'owineq chik ri awoyowal chuwij, yinoqaqa ta chik chi'ak'u'x y yinabekolo' ta pe chiri'!

¹⁴Wi ri wineq niken, y nik'ase' ta chik jun bey, yin kan ronojel ta q'ij chire ri nuk'aslen xtinwoyobej-apo. Xtinwoyobej k'a toq xtoqaqa na ri q'ij richin yinok-el jun wineq k'ak'a'.

¹⁵K'ari' xkinawoyoj, y yin kan xtink'uluba-apo ri ach'abel, roma rat kan janila nawajo' natzu' chik ri abanon rik'in aq'a'.

¹⁶Kan atzuliben ri nubinibal chuwech re ruwach'ulew, y aya'on ri awech pa nuwi'. Jak'a ri ninwajo' yin, chi man ta atzuliben chuqa' ri numak.

¹⁷Ri nuxolq'otij ri atzij rat, xa kan yatikir naben chire chi achi'el najitz' ruwi' pa jun costal; xa kan yatikir namatzej ruwi' ri numak.

¹⁸Jak'a kan tikirel chuqa' chawech chi achi'el naqasaj jun juyu' y nak'ajij jumul. Naben chuqa' chire jun ruwech siwan ri kan abej, chi nawelesaj ri akuchi k'o-wi.

¹⁹Kan yatikir chuqa' naben achi'el nuben ri ya' toq nuk'uaj ri abej ri k'o pa rubey, y naben chuqa' achi'el nuben ri ya' richin job toq nuch'ej-el ri ulew. Kan keri' chuqa' yatikir naben rik'in ruk'aslen ri wineq chi man jun chik nroyobej-apo.

²⁰Rat kan naya' k'a pe ronojel ri awuchuq'a' pa ruwi' y yach'akon-el chirij. Kan k'a nayoj na el rubanik ri nitzu'un y k'ari' naben chire chi nibe.

²¹Y ri chiri', kan man chik xtretamaj ta wi ri e ralk'ual kan, nimirisan kiq'ij, y chuqa' ri chiri', kan man chik xkerutz'et ta pe ri e ralk'ual kan, wi xa ek'o pa jun meba'il.

²²Ri chiri' xa kan xaxe k'a ri ruq'axo'n ri ruch'akul rija' ri nuna'; xa kan xaxe chuqa' ri rubis rija' ri nuna'.