Read Kaqchikel Job 15 Bible Online

Job 15 - Kaqchikel bible

Job 15

¹K'ari' xch'on chik ri Elifaz ri aj-Temán y xubij chire ri Job:

²Jun wineq achi'el rat, ri k'o runa'oj, man yerubila' ta ch'abel ri maneq kejqalen. Man choj ta keri' xkerubila' ch'abel, achi'el xa ta e k'amon-pe roma ri kaq'iq' ri nipe kere' pa relebel-q'ij.

³Jun ri k'o runa'oj man xkerukusala' ta ch'abel ri man jun kejqalen, ni man xkerubila' ta tzij ri xa man jun utz nuk'en-pe.

⁴Y wi ri abey rat keri', man jun ri xtik'oje' rukiy ri Dios chuwech. Kan man jun chik ri xtikanon richin ri Dios richin nitzijon rik'in.

⁵Rat kan ja ri achi' ri niq'alajirisan ri itzel abanobal, roma xa ja ri kaq' ri itzel taq winaqi' ri xakusaj richin xach'on-qa.

⁶Xa kan ja ri achi' rat ri nisujun awichin, y man ja ta yin. Kan ja ri achi' rat niq'alajirisan ri achike abanikil.

⁷¿Kan ja kami rat ri nabey achin ri xalex chuwech re ruwach'ulew, richin chi más awetamabal? ¿Kan atk'o chik kami rat toq man jani ek'o ta ri nima'q taq juyu', richin chi k'o más ana'oj?

⁸¿Kan xak'oje' kami rat chupan ri molojri'il ri xuben ri Dios, richin awetaman ri nuch'ob rija'? ¿Ri na'oj xa kan xaxe kami chawe rat xjach-wi?

⁹¿Achike kami ri awetaman rat y roj kan man qetaman ta? ¿Xa kan xaxe kami awik'in rat k'o-wi ri kan niq'ax ronojel chawech y roj maneq qik'in?

¹⁰Tatzu' chiqakojol roj ek'o winaqi' ri seq chik ri rusumal taq kiwi' y ek'o achi'a' ri kan janila chik k'iy kijuna'. Kan más k'o chik kijuna' ke chuwech ri atata'.

¹¹Chawech rat, achi'el xa man jun rejqalen ri kuqubabel-k'u'x ri nuya' ri Dios chawe, ri kan rik'in ch'uch'uj taq ch'abel y ajowabel niqabij chawe.

¹²¿Achike roma toq kan naya' q'ij chi ja ri nuna' ri awánima ri nuk'uan awichin? ¿Achike roma toq la runaq' taq awech kan nuk'ut ri awoyowal?

¹³¿Achike k'a roma toq kan janila yakatajineq awoyowal chirij ri Dios, roma kan jebel q'alaj rik'in ri ch'abel ri ye'el pan achi'?

¹⁴Jun wineq xa man jebel ta rubanik ri ruk'aslen, richin chi kan ch'ajch'oj ta. Jun wineq kan etaman k'a ri' chi jun ixoq ri xalan richin chuwech re ruwach'ulew.

¹⁵Roma ri Dios ni kik'in ri rusamajela' ri ek'o rik'in man nukuquba' ta ruk'u'x, ni ri kaj man ch'ajch'oj ta chuwech rija';

¹⁶¡K'atala', chik jun achin ri kan man jun narayij chire ri ruk'aslen y chuwirineq chupan, ri kan jebel nuna' nuben ri itzel taq banobel, achi'el xa ta nuqum ruya'!

¹⁷Kinawak'axaj k'a, y kan xkatintijoj; kan xtink'ut k'a chawech ronojel ri nutz'eton;

¹⁸ri q'alajirisan kan chikiwech ri achi'a' aj-na'oj koma ri qati't-qamama', y rije' man jun nikewaj chire.

¹⁹Ri ruwach'ulew xa kan pa kiq'a' chuqa' rije' xjach wi kan. Ri na'oj ri xk'oje' kik'in kan kichin rije', roma kan man xkiya' ta q'ij chi ch'aqa' chik winaqi' xkixol-ki' kik'in.

²⁰Ronojel q'ij chire ri kik'aslen ri winaqi' ri maneq Dios chikiwech xa kan ruyon q'axo'n. Keri' chuqa' ri ruk'aslen jun ri kan yeruya' pa ruk'ayewal ri ch'aqa' chik wineq. Xa kan q'axo'n nik'oje' rokik k'es chuwech re ruwach'ulew.

²¹Xa kan ruyon k'a ch'abel richin xibinri'il ri yerak'axaj; toq jebel eleneq chuwech ronojel jari' toq yepe ri eleq'oma' chirij.

²²Man nril ta chik achike nuben roma nuch'ob chi man nel ta chik pe chupan ri ruq'equmal ri k'aslen ri akuchi k'o-wi. Nuna' chi kan xaxe chik ri kamik royoben.

²³Rija' xaxe chik royoben chi ri ruch'akul nok kiway ri k'ucha'; y rija' kan retaman chi ri q'ij ri' kan xtapon-wi.

²⁴Ri ruk'ayewal ri e yakatajineq chirij y ri ch'obonik ri yeruben; nuben chire ri ránima chi jantape' ruxibin-ri'. Kan nikisech ruk'u'x achi'el toq nisach ruk'u'x jun rey ri kan k'o chi nibe pan oyowal.

²⁵Jare' ri nuk'uluwachij jun ri kan rik'in k'olon-q'a' niyakatej chirij ri Dios, y kan janila nunimirisaj-ri' chuwech ri k'o ronojel uchuq'a' pa ruq'a'.

²⁶Jare' ri nuk'uluwachij ri kan rik'in k'a nimirisanen niyakatej chirij ri Dios, y kan kow nuna' roma rewan-ri' chirij ri pimilej rutobal.

²⁷Ri kan xaxe rija' ri nuch'ob-ri', roma ri' xaxe wi ti'oj ri rupalej; y e ti'oj ri tzan taq racheq y ri rupan; xaxe ri' ri nuch'ob.

²⁸Jak'a kan xtapon jun q'ij toq xa pa jun tolan y wuluwik tinamit xtk'oje-wi kan. ri jay ri ek'o chupan ri rutinamit xa xketole' kan y xaxe chik mulumik abej ri xkek'oje' kan.

²⁹Man jun bey xtik'iyer ta más ri rubeyomel, y chuqa' kan man xtiyaloj ta. Ni chuqa' ri rulew y ri ruxoral man xkenimer ta más chuwech re ruwach'ulew.

³⁰Kan man k'a xtikolotej ta chuwech ri kamik. Xa junan k'a xtuk'uluwachij kik'in ri ruq'a' taq che', ri kan k'o chi ye'apon pa q'aq'. Rik'in ri ruxla' ri Dios, xtibe achi'el nibe ri rusi'j ri che' roma ri kaq'iq'.

³¹Ri wineq kan man ta k'a xtiq'olotej rik'in ri xa maneq rejqalen, roma wi keri' nuben, xa ja ri maneq rejqalen ri xtuk'ul richin rajel ruk'exel.

³²Roma jun wineq ri nibanon keri', xa nuk'uluwachij achi'el ri che' toq man jani utz y ja ri' nichoy-el, ri rujotay kan man xkeraxer ta chik pe.

³³Xa xtok k'a achi'el juwi-uva ri xa yeruch'ototej-pe ri tzeqaj ruwech, ri man jani e cheq' ta. Y xa achi'el jun che' olivo ri xa man yepa'e' ta ri rusi'j y xa yebulul-pe.

³⁴Ri tzobaj ri kan kachibil-ki' y xa maneq Dios chikiwech, xa man xkek'oje' ta kan kimi'al kik'ajol. Ri e kipaban-q'anej kachoch rik'in ri méro kik'ulun pan ewel, xa xtuk'is q'aq'.

³⁵Xkiben k'a ch'a'oj y re' xuk'en-pe etzelal chike. Kan pa kánima rije' xalex-wi-pe richin nikiben q'oloj chike ri winaqi'.