Read Kaqchikel Job 16 Bible Online

Job 16 - Kaqchikel bible

Job 16

¹K'ari' ri Job xch'on chik y xubij:

²Kan k'iy k'a mul wak'axan ch'abel re achi'el nibij rix wakami. Chi'iwonojel rix xa man nikuquba' ta nuk'u'x; xa ruyon ch'abel ri nupaxij wánima ri ibin-qa.

³¿Kan xtibe ta k'a ruwech ri tzij ri niben y man jun bey xkixtane'? ¿Ri nabij rat kan ja ri' kami ri ruk'amon chi niban?

⁴Yin chuqa' yitikir ta yich'on achi'el ri yixch'on rix, xa ta yin ink'o ta pan ik'exel y rix ixk'o ta pa nuk'exel yin. Kan yitikir ta ninbij ronojel ri ch'abel ri xibij yan qa rix, y kan ninsiloj ta apo nujolon chiwech roma ninna' chi wetaman ronojel.

⁵Jak'a yin man ta keri' ch'abel ri yenbij chiwe; ri nuchi' kan man ta nitane' richin chi ninya' iwuchuq'a' chupan ri iq'axo'n.

⁶Wi yich'on, ri nuq'axo'n man nik'is ta el; y wi yitane-qa, ri nuq'axo'n man xkiruya' ta kan.

⁷Ri Dios kan rubanon k'a chuwe chi xiq'itej yan; kan xuya' q'ij chi xa nuyonin chik kan, roma xa e maneq chik wachibil.

⁸Kan yakatajineq k'a chuwij, achi'el jun sujunel. Xuben chi kan xibaqir-qa y xaxe chik ri nutz'umal k'o chuwij, ri winaqi' kan jari' ri kichapiben-wi-ki', chi yin in jun aj-mak.

⁹Ri Dios roma ri royowal, chi wech' chi wech' yiruk'is-el. Kan achi'el nuqach'ach'ej rey chuwij; y kan ruch'ikon ri runaq'-ruwech chuwij, achi'el jun etzelanel wichin.

¹⁰Ri winaqi' xkijeq k'a pa kichi' chuwij yin; xkaqer k'a ri nupalej roma xinkik'ixbisaj. Kan konojel k'a xkimol-ki' chuwij.

¹¹Ri Dios xiruya' k'a pa kiq'a' ri winaqi' ri xa maneq Dios chikiwech. Kan xirujech k'a pa kiq'a' ri itzel taq winaqi'.

¹²Kan ronojel k'a utz eleneq chinuwech toq rija' xuwulaj ronojel chinuwech. Xiruchop k'a chirij nuwi' y xiruq'ututej, y kan ja yin k'a ri xiruq'ijuj richin yirutzeq.

¹³Ri ruch'ab rija', kan man jun k'a ti nuq'ij chuwech. Kan xiruq'ijuj y xuteq'uj nupan; y ri nuk'ay kan xbiyin pan ulew.

¹⁴Kan jantape' in ruya'on-pe pa tijoj-poqonal. Kan jantape' yakatajineq chuwij, achi'el nuben jun achin richin oyowal.

¹⁵Y jari' xbanon chuwe chi janila yibison y nukusan ri tzieq richin bis. Xa maneq chik nuq'ij; xa jare' nutikiliben nik'aj-nuwech pan ulew.

¹⁶Ri runaq' taq nuwech kan e sipojineq chik k'a roma oq'ej. Ri nutz'ubal kan xeq'equmatej yan k'a.

¹⁷Keri' nuk'uluwachin man rik'in chi yin kan man jun bey nuyakon ta nuq'a' richin ninben ri itzel, y ri nuch'owen rik'in ri Dios kan ch'ajch'oj-wi.

¹⁸Kan ek'o-wi k'a ri ye'ajowan nukamik, jak'a rat ruwach'ulew man taya' q'ij chi ri woq'ej nichup ruwi', y man nak'axex ta ri nink'utuj.

¹⁹Jak'a ri etamayon ri qitzij chuwij, kan ja ri k'o chila' chikaj, y ja rija' ri nito'on wichin.

²⁰Stape' ri wachibil kan janila yinketzelaj, yin kan chuwech ri Dios yinoq'-wi, richin chi kiruto'.

²¹Ja rija' ri nich'ojin chuwech ri Dios pa nuk'exel, achi'el nuben jun wineq ri nich'on pa ruk'exel ri rachibil.

²²Ri rajlabal ri nujuna' xa juba' chik ok, y yin xtinchop-el bey ri akuchi man xkitzolin ta chik pe.