Read Kaqchikel Job 17 Bible Online

Job 17 - Kaqchikel bible

Job 17

¹Ri nuk'aslen xa napon yan pa ruk'isibel; ri q'ij richin ri nuk'aslen chuwech re ruwach'ulew xa juba' chik ok, xa kan iroyoben chik k'a ri jul ri akuchi xkibemuq-wi kan.

²Ri ek'o-pe wik'in xa winaqi' ri yekikot y yetze'en chuwij, ri chi'aq'a' ri nuwech xa man jun ti yup waran nuben roma ri q'axo'n.

³Nu-Dios yin kan tabana' chi awik'in ta rat ninwil-wi nuto'ik, roma xa kan man jun wineq ri nrajo' chi yiruto' ta rik'in ri ninbij yin.

⁴Rat kan abanon k'a chike ri winaqi' ri' chi ri kinojibal man yeruto' ta, roma ri', kan tabana' chi man ta yech'akon chuwij.

⁵Rije' xa nikiben achi'el nubij ri tzij: Ri achin k'o ri nutaluj chikiwech ri rachibil, rokik ri ralk'ual man jun nikik'ul y yewayjan.

⁶Xa banon k'a chuwe chi kan xaxe chik yin ri yinkitzijoj ri winaqi' y nuyek kitze'en, y chikiwech rije' xa kan ruk'amon chi yin nichubex ri nupalej.

⁷Ri runaq' taq nuwech xa e q'equmatajineq chik roma ri q'axo'n, y ri nuch'akul xa xbaqir yan qa.

⁸Y toq ri winaqi' choj kik'aslen xtikitz'et ri ruk'ayewal ri ninq'axaj, kan achike na xtikitz'et, y xtipe koyowal y xkeyakatej-pe chuwij richin nikibij chi yin maneq Dios chinuwech.

⁹Y ri yech'obon chi kan choj ri kik'aslen, kan keri' xtikiben-apo jantape'. Chuqa' roma kan nikich'ob chi ch'ajch'oj ri kik'aslen, xtipe y xtipe más kuchuq'a'.

¹⁰Wakami rix ri kan jantape' yixtze'en chuwij, kixanpe chik k'a jun bey y kixtzijon chik wik'in, y man jun k'a xtinwil chi'ikojol ri kan k'o ta runa'oj.

¹¹Ri nujuna' kan anineq k'a e q'axineq kan; ri nuch'obon chi ninben xa xyoj chinuwech. Keri' chuqa' ronojel ri rurayibel ri wánima.

¹²Rix kan paq'ij yixcha' chire ri q'equ'm richin ri chaq'a'. Y toq peteneq ri q'equ'm rix nibij chi jari' peteneq ri saqil.

¹³Jak'a yin, ri woyoben-apo, xaxe chik k'a yiq'ax akuchi ek'o-wi ri kaminaqi', akuchi xkibek'oje-wi, richin yibenuxlan chiri' pa q'equ'm.

¹⁴Yin, nata' k'a xtinbij chire ri jul ri akuchi xkibemuq-wi kan. Y chike ri jut ri xketijo wichin, kan xtinbij k'a nte' y wana' chike.

¹⁵¿Kan k'o ta kami k'a achike roma chi k'o ri ninwoyobej-apo? ¿Kan k'o ta kami jun wineq ri nitikir nitz'eto-apo chi k'o utz ri ruk'amon-pe chuwe ri q'ij ri e peteneq?

¹⁶Toq yin xkibe qa chupan ri jul chupan ri q'ij toq xkibemuq kan, ri oyobenri'il ri k'o wik'in toq k'a in k'es, xa xtik'oje' kan.