Read Kaqchikel Job 18 Bible Online

Job 18 - Kaqchikel bible

Job 18

¹Y kan jari' toq ri Bildad xch'on y xubij chire ri Job:

²¿K'a janipe' k'a yatane-qa chi ch'owen? Katane' k'a chire ronojel ri nach'ob, y taya' q'ij chiqe roj richin yojch'on.

³¿Achike roma rat kan xojakusaj yan chikopi', y kan yojatzu' chi kan maneq qana'oj?

⁴Xa ayon k'a rat natej poqon roma ri awoyowal. Y xa man ruk'amon ta k'a chi awoma rat, ri Dios nuben chike ri winaqi' chi ke'el-el chuwech re ruwach'ulew. Y chuqa' xa awoma ta rat, ri Dios yerunim-el ri juyu' k'a juk'an chik.

⁵Kan qitzij chi ri kik'aslen ri winaqi' ri maneq Dios chikiwech, kan achi'el jun q'aq' y k'o jun q'ij xa xtichup; y ri ruxaq ri kiq'aq' ri' man xtisaqirisan ta chik.

⁶Y keri' ri pa rachoch xa xtiq'equmer kan roma xchup ri saqil; ri ruq'aq' ri nisaqirisan xa xtiken-qa.

⁷Ri maneq Dios chikiwech xa kan man xketikir ta chik xtikiya' nima'q taq kixaka'l, y ronojel ri ch'abel ri nikibij richin yekito' ri wineq, xa jari' ri xtibanon chike chi xketzaq.

⁸Kan roma k'a ri rubanik ri rubinibal chupan ri ruk'aslen, xtiqaqa pa jun ya'l pikbel Ri rubinibal kan choj k'a xtuk'uaj k'a pa ruwi' jun jul-pikbel.

⁹Ri pikbel kan xtuchop k'a chi ruqul-raqen, y chiri' xtujitz' kan ri'.

¹⁰Ri pikbel kan jebel muqun kan rij, y k'o kan chiri' pa bey ri akuchi niq'ax-wi.

¹¹Xabakuchi k'a nibe-wi; kan jantape' ruxibin-ri'; y kan nuna' chi k'o tzeqelibeyon richin.

¹²Ri ruchuq'a' xa kan xtik'is y xtilawalo', y ri rutijoj-poqonal kan xtok k'a achi'el jun rachibil ri k'o-apo naqaj chire.

¹³Y ri ruyabil kan xtutaluj-ri' chupan chijun ri ruch'akul, y ri yabil ri' kan richin kamik; kan xkeruk'is ruchuq'a' ri ruq'a-raqen.

¹⁴Ri kamik kan xtrelesaj k'a pe ri wineq ri' pa rachoch, y xtuk'uaj k'a rik'in ri rajawal kamik.

¹⁵Ri rachoch ri wineq ri' kan xtiya'ox k'a ruq'aq'al, y xtijopix ri chuwilej-abej pa ruwi' richin nich'ajch'ojirisex.

¹⁶Kan xtuk'uluwachij k'a achi'el nuk'uluwachij jun che', toq nichaqi'j-qa ri ruxe', y keri' k'a pa rutum-el.

¹⁷Ri wineq ri' kan jumul man xtinatex ta chik chuwech chijun re ruwach'ulew, y ri rubi' kan jumul xtimestex.

¹⁸Kan jumul k'a xtelesex-el chikikojol ri kan k'a k'o na kik'aslen; kan xtelesex k'a el ri akuchi k'o saqil y xtiq'axex akuchi ruyon q'equ'm k'o.

¹⁹Kan ni xa ta jun rijatzul ri xtik'oje' kan chikikojol ri winaqi' ri pa rutinamit, ni xa ta jun ri xtik'ase' kan y nik'oje' ta kan ri pa rachoch.

²⁰Y ronojel k'a ri xuk'uluwachij ri wineq ri' kan xtetamex k'a koma konojel ri ek'o pa qajbel-q'ij y ri ek'o pa relebel-q'ij, y kan xkebaybot k'a roma xibinri'il.

²¹Keri' xtibek'is ri ruk'aslen jun wineq ri maneq Dios chuwech. Kan k'a chiri' k'a xtapon-wi ri kan man xukanoj ta ri Dios.