Read Kaqchikel Job 19 Bible Online

Job 19 - Kaqchikel bible

Job 19

¹Y kan jari' k'a toq ri Job xch'on y xubij:

²¿Achike k'a roma toq kan man yixtane' ta chuwij richin niya' pa q'axo'n ri wánima? ¿Achike k'a roma kan jantape' yinisok rik'in ri ch'abel ri ye'ibila' chuwe?

³Janila mul yan iqasan nuq'ij, y kan man yixk'ix ta juba', xa kan nik'o ruwi' ri niben chuwe.

⁴Stape' ta kan qitzij chi yin ximakun, ri rutojbalil man xkixrumej ta rix, xa kan pa nuwi' yin xtiqaqa-wi.

⁵Rix kan nibananej k'a chi janila ix jebel, y roma ri' chiwech rix, ri ruk'ayewal ri nink'owisaj jare' ri nuya' chuwe ri numak.

⁶Rix xa kan man iwetaman ta k'a chi ja ri Dios ri banayon kere' chuwe, xa kan ja rija' ri xya'on ri pikbel richin chi yin xiqaqa chupan.

⁷Stape' yin kan xtinbij: ¡Yikamisex!, man jun xkinak'axan. Stape' kan rik'in ronojel wuchuq'a' yich'on rik'in jun q'atoy-tzij, man ninwil ta to'onik.

⁸Ri Dios xutz'apej k'a nubey richin chi yin man yiq'ax ta. Rija' kan xuq'equmarisaj k'a ri bey ri akuchi yiq'ax-wi.

⁹Rija' kan ronojel k'a ri nubeyomel xumajij-el chinuwech. Ri nuk'ojlen ri kan k'o chikiwech ri winaqi', kan xuyoj k'a chikiwech.

¹⁰Kan xiruchop k'a y xiruqasaj pan ulew jumul. K'iy k'a ri woyoben-pe richin ninben, y xa xrelesaj chuwe achi'el nik'uq-el jun che'.

¹¹Rija' kan xq'aq'er k'a roma royowal chuwij yin, y xuben chuwe chi in jun etzelanel richin.

¹²Kan xerumol k'a pe aj-labal richin xeruyek-pe chuwij. Xkisutij-rij ri wachoch richin nikoyobej jampe' yitzaq pa kiq'a'. Kan xekibanala' k'a q'anej tz'aq chirij ri wachoch richin yinkichop.

¹³Ri Dios kan xuben k'a chike ri wach'alal chi xkich'er-el-ki' chuwe yin, y ri e etamayon nuwech chi achi'el xa man jun bey xqachibilaj-qi' kik'in.

¹⁴Konojel ri e ach'alalri'il wik'in xa xebe, y ri e etamayon nuwech jebel, xinkimestaj kan.

¹⁵Ri kan jantape' ek'o-pe pa wachoch xinkimestaj. Ri e waj-ik' xtani' kibanon chuwe chi man ketaman ta nuwech. Wakami kan in okineq achi'el jun aj nej chikiwech konojel.

¹⁶Y toq ninwoyoj k'a jun nusamajel man nich'on ta pe chuwe. Y stape' yilokok-apo chuwech, achi'el xa man chire ta yich'on-wi.

¹⁷Ri wixjayil kan iretzelan k'a jumul roma xa kan itzel chik ri wuxla', y ri walk'ual xa xejel-el nej chuwe yin.

¹⁸Kan jajun chuqa' ri ak'uala' yinketzelaj, y kan xaxe yipa'e-el kan itzel k'a yech'on y yetze'en chuwij.

¹⁹Konojel k'a ri wachibil ri kan jantape' xek'oje' wik'in, wakami xa yinketzelaj. Kan konojel k'a ri janila e wajowan, xa xeyakatej chuwij.

²⁰Yin xa xik'is-xik'is yan qa jumul; xaxe chik ri nutz'umal ri k'o chirij ri nubaqil. Ri nutijul ri k'a k'o na, xaxe chik ri ti'ij ri akuchi e tikil-wi ri wey.

²¹Rix ri ix wachibil, xa tijoyowaj k'a nuwech. Roma re ruk'ayewal re qajineq pa nuwi', kan ja ri Dios yoyon-pe.

²²¿Achike k'a roma toq rix kan yiniya' chuqa' pa ruk'ayewal achi'el nuben ri Dios? ¿Kan man nik'o ta kami ruwi' niben chuwe rik'in re'?

²³¡Jebel ta ri' xa ta re nuch'abel yetz'ibex kan pa jun boton wuj!

²⁴Kan jebel ta ri' chi ri tz'ibabel kan ja ta rik'in q'eqapueq, y chuwech jun wuj ri banon rik'in chajipueq tz'ibatel kan. Kan jebel ta ri' chi nitz'ibex kan chuwech jun abej, richin kan tetamex koma konojel.

²⁵Jak'a yin kan wetaman chi k'o jun ri k'o chila' chikaj ri nito'on wichin, y kan xkiruya' chik chupan ri nuk'ojlen. Rija' kan k'o k'a jun q'ij xtitzolin-pe, y xkiruyek-pe ri pan ulew akuchi in muqul-wi.

²⁶Y toq xa k'isineq chik ri nutz'umal re nuk'uan, kan xkik'astej chik, y kan k'o chik k'a nuch'akul toq yin xtintz'et ruwech ri Dios.

²⁷Kan ja wi yin ri xkitz'eton richin, kan rik'in re runaq'-nuwech re' xtintz'et-wi. Y ja rija' ri xtintz'et y man jun ta chik. Y re wánima kan nurayij chi nutz'et yan ruwech.

²⁸Rix nibij: ¿Achike ta rubanik niqaben richin niqaya' más pa q'axo'n? Roma ronojel re' xa kan rik'in qa rija' peteneq-wi, yixcha'.

²⁹Wakami k'a, rix kan tixibij-iwi' chuwech ri espada richin ri ruq'atoj-tzij ri Dios, roma ri ru-espada rija' jari' ri nik'utu ri royowal pa ruwi' ri mak. Y kan tiwetamaj chi kan k'o jun ri niq'aton-tzij.