Read Kaqchikel Job 2 Bible Online

Job 2 - Kaqchikel bible

Job 2

¹Pa jun chik q'ij ri aj-chikajil rusamajela' ri Dios xbekimolo' chik ki' chuwech ri Jehová. Chikikojol rije' beneq chik k'a jun bey ri Satanás.

²Y ri Jehová xch'on k'a rik'in ri Satanás y xuk'utuj chik k'a chire ri akuchi peteneq-wi. Rija' xubij chik chi peteneq chuwech chijun ri ruwach'ulew.

³K'ari' ri Jehová xubij chire: Yin wetaman chi rat atz'eton chik kan ri Job ri nusamajel. Rija' jun achin ri kan janila choj ri ruk'aslen, y man jun achike ta itzel nilitej chirij. Rija' kan k'o nukiy chuwech, nuya' k'a nuq'ij y kan man jun itzel ri nrajo' nuben. Rija' kan k'a jun chojilej achin na wik'in. Xa man jun k'a xach'ek rat rik'in toq xabij chuwe chi tinya' wululen pa ruwi' y rik'in ri' xkiruya' kan, xcha'.

⁴Xeri' ri Satanás xubij chire ri Jehová: Rija' nukoch' ronojel roma man jun yabil aya'on chire, jak'a wi naya' ta jun yabil pa ruch'akul, kan yaruya' kan.

⁵Taya' na pe jun yabil pa ruch'akul o pa rubaqil; q'alaj k'a ri' wi man kan chawech xkaruyoq', xcha'.

⁶K'ari' ri Jehová xubij: Pan aq'a' k'a k'o-wi. Xaxe k'a ri ruk'aslen man pan aq'a' ta rat k'o-wi, xcha'.

⁷Ri Satanás xel k'a el chiri' rik'in ri Jehová, y kan xuya' k'a pa tijoj-poqonal ri Job y xuya' k'a ch'a'k chirij chijun ruch'akul ri janila ruchikopil.

⁸Y ri Job xbetz'uye' k'a chiri' pa ruwi' ri chaj ri akuchi poron-wi q'ayis. Xuchop jun ruchi' xot, y rik'in ri' nuk'aqatij-wi rij.

⁹K'ari' ri rixjayil xubij chire: ¿Achike roma kan k'a janila at choj naben chuwech ri Dios? Más utz tayoq'o' ri Dios richin yaken, xcha'.

¹⁰Roma ri' ri Job xubij chire ri rixjayil: Rat yach'on achi'el ri yech'on ri ixoqi' ri maneq kina'oj. ¿Xaxe kami ri utz ri ruk'amon chi niqak'ul chire ri Dios y ri man utz ta man niqak'ul ta?, xcha'. Man rik'in ri' ri Job man xmakun ta rik'in ri ruch'abel.

¹¹Ek'o k'a e oxi' rachibil ri Job: Ri Elifaz aj-Temán, ri Bildad ri aj-Súah y ri Zofar ri aj-Naamat. Toq xkak'axaj k'a ri xuk'uluwachij ri Job, rije' xkiyala' kan ri kiruwach'ulew richin xebe chutz'etik y junan k'a xe'apon rik'in ri Job, richin nikachibilaj chupan ri ruq'axo'n y richin chuqa' nikikuquba' ruk'u'x.

¹²Toq rije' ye'apon yan k'a apo rik'in, kan man niketamaj ta chik ruwech roma ri ruk'uluwachin. Jari' toq xkoq'ej ruwech rik'in raqoj-chi'ij, y chikijujunal rije' xkiretz ri kitziaq chikij y xkijopij ulew chikaj y pa kiwi'.

¹³Y keri' xetz'uye' rik'in pan ulew, wuqu' q'ij y wuqu' aq'a', y man jun ch'abel ri xkibij ta, roma nikitz'et chi ri ruq'axo'n kan janila nim.