Read Kaqchikel Job 20 Bible Online

Job 20 - Kaqchikel bible

Job 20

¹Ri Zofar xch'on chik y xubij chire ri Job:

²Yin kan ninwajo' chi chi'anin yan nink'uluba' ri ach'abel, roma kan ja ri nuch'obonik ri nibanon chuwe chi ninwajo' yich'on chik.

³Yin xinwak'axaj yan qa chi itzel xach'on chirij ri nuch'abel, y roma ri' ri nuna'oj nuben chuwe chi yich'on.

⁴Yin ninbij chi rat kan awetaman ri achike rubanik rubanon-pe ojer ri', ri achike rubanik rubanon-pe pa rutikeribel, toq ri Dios xuya' ri wineq chuwech re ruwach'ulew.

⁵Kan awetaman k'a chi ri itzel taq winaqi' xa man niyaloj ta ri kikoten kik'in. Ri kan maneq Dios chikiwech, xa jun ok ti ramaj nuben ri kikikoten.

⁶Stape' ri runimirinen ri wineq kan nuq'i' ta el ri kaj, y roma ri rupalen kan nuq'i' ta q'anej ri sutz' rik'in ri rujolon.

⁷Jak'a k'o na jun q'ij toq ri wineq ri' xa xtiqaqa jumul k'a pan ulew, achi'el ri nupamaj rija' y ri xe'etaman ruwech xtikibij k'a: ¿Akuchi k'a xbe-wi ri achin ri'?, xkecha'.

⁸Ri wineq ri' kan xtibe k'a, achi'el nibe jun achik'. Kan xtuk'uluwachij achi'el toq nik'utumej jun achi'el achik' chuwech jun wineq.

⁹Ri runaq'-wachaj ri xetz'eton richin, kan man jun bey chik xtikitz'et, ni ri xek'oje' rik'in ri chiri' pa rachoch, kan man xtikitz'et ta chik.

¹⁰Ri e ralk'ual kan ri wineq ri' k'o chi xtikitzolij chike ri meba'i' ri keleq'an. Kan rik'in ri kiq'a' rije', nikitaluj-el ri rubeyomel kan ri kitata'.

¹¹Ri wineq ri maneq Dios chuwech kan k'a e kow ri rubaqil; toq kan ja yan ri' xtiken-el y xtibe kan pan ulew.

¹²Ri maneq Dios chikiwech, toq yemakun, kan ki' nuna' ri pa kichi', y kan nik'oje' kan ri ruki'il chuxe' ri kaq'.

¹³Kan niyaloj k'a ri ruki'il chuxe' ri kaq' y man nikibeq' ta qa chi'anin, richin kan niyaloj na nikina' ruki'il.

¹⁴Jak'a toq napon-qa pa kipan xa nik'eyur, y ri chiri' xa nupon-ri' y nok achi'el ri kamisanel ya' ri nel pa ruchi' jun itzel kumetz.

¹⁵Ri wineq ri nutej-qa ri beyomel ri xa releq'an, xa xtiberuxa-pe. Stape' kan pa rupan chik k'o-wi, ri Dios xtuben chire chi xtel-pe.

¹⁶Ri nubeq' qa ri wineq ri' xa achi'el ri ya' ri nel-pe pa ruchi' ri kumetz; kan niken k'a chi'anin achi'el xa ta purin roma jun itzel kumetz.

¹⁷Kan man xtutz'et ta chik kan ri aceite toq achi'el ti raqen-ya' nibiyin-pe. Chuqa' kan man xtutz'et ta chik kan ri beyomel ri nuya-pe ri Dios, ri kan nibiyin-pe achi'el leche y achi'el ri kab ri nikiya' ri taq chikopi'.

¹⁸Ri wineq ri' kan k'o chi nutzolij ronojel ri nubij chi ruch'akon rik'in ri rusamaj, y man xtuna' ta juba' ruki'il ri rubeyomel.

¹⁹Roma rija' kan xuben chike ri winaqi' ri man jun k'o kik'in chi nikitej poqon. Xa xerumajla' jay, pa ruk'exel chi xerubanala' ta q'anej richin rija'.

²⁰Rija' kan xrajo' k'a chi ronojel ta xok richin; ri rayinik ri k'o rik'in q'ij-q'ij más nim.

²¹Kan ronojel k'a ri nurayij, kan nok-wi richin rija'. Man rik'in ri', ronojel ri rubeyomel xa kan man xtiyaloj ta.

²²Roma toq xa kan k'iy chik k'a beyomel rilon, xa xtiqaqa k'a bis pa ruwi'. Xa kan xtiqaqa k'a jun nimalej wululen pa ruwi' y xtutej poqon roma ri'.

²³Y toq kan ruchapon k'a rumolik ri rubeyomel, jari' toq ri Dios xtuya-pe ruk'ayewal pa ruwi', roma q'aq'arneq roma royowal. Y ri ruk'ayewal ri', man xaxe ta xtumej rija', xa kan xtumej chuqa' ri ruway-ruk'ya'.

²⁴Wi ta nitikir nanimej chuwech ri kum ri q'eqapueq rutza'n, chuwech ri ch'ab q'enq'oj-pueq rutza'n, man xtikolotej ta.

²⁵Y ri ch'ab ri' xtuk'owisaj ri ruch'akul, y ri rutza'n ri ch'ab, ri nich'ich'an, kan xtuteq'uj ri ruk'ay. Kan jari' toq ri ránima xtuxibij-ri', roma kan jari' xutz'et ri rukamik.

²⁶Ri rubeyomel ri wineq ri', kan oyoben chik k'a roma ri q'equ'm ri xtik'ison richin, ri akuchi k'o-wi ri q'aq' ri man wineq ta boxoyon richin. Y re' kan xtuk'is k'a ronojel ri e kolotajineq chik kan, ri ek'o kan pa rachoch.

²⁷Ri kaj xtuya' chuwa saqil ri itzel rubanobal, y re ruwach'ulew xtiyakatej chirij.

²⁸Y toq ri Dios xtiyakatej royowal, kan xtrelesaj-el ronojel ri rubeyomel ri', ri kan rumolon pa rachoch.

²⁹Ri Dios kan nuben k'a chike ri winaqi' ri maneq Dios chikiwech, chi k'a chiri' ye'apon-wi. Kan nuben k'a chuqa' chike chi jare' ri nikichinaj.