Read Kaqchikel Job 21 Bible Online

Job 21 - Kaqchikel bible

Job 21

¹K'ari' ri Job xch'on chik y xubij:

²Xa rik'in ta niwak'axaj ri tzij ri ninwajo' ninbij chiwe, rix kan nikuquba' ta nuk'u'x.

³Rokik k'a yich'on iwik'in, kan kinikoch'o' k'a juba' y toq nubin chik qa ronojel ri ninwajo' ninbij, wi niwajo' yixtze'en roma ri', kixtze'en k'a.

⁴Ri nuch'ojinik yin man chuwech ta k'a jun wineq, y roma ri', kan k'o k'a roma toq ri wánima man nril ta achike nuben.

⁵Kan tiwak'axaj k'a jebel re xtinbij chiwe, y rix kan xtiya' ri iq'a' chuwech ri ichi', roma kan xtimey ri xtiwak'axaj.

⁶Toq kan noqaqa chinuk'u'x ronojel ri nuq'axan-pe, nipe tewulej-ya' chuwij, ninxibij-wi' y nibeyikik-pe ri nuch'akul.

⁷¿Achike kami roma toq ri winaqi' ri maneq Dios chikiwech, más yeyaloj yek'ase'? Kan yerijix na el jebel y jebel yebe pa jotol.

⁸Kan k'a yekitz'et na kan ri kalk'ual, ri yek'iy-q'anej y jebel chik kibanon kan; kan yekitz'et na chuqa' kan ri kiy-kimam toq yek'iy-q'anej.

⁹Ri pa taq kachoch ri winaqi' ri' kan ronojel utz y man jun ri achike ta nikiq'axaj, y ri Dios kan man jun chuqa' ruk'ayewal ri nuya' ta pa kiwi'.

¹⁰Ri achija' kiwákix kan jikil chi ye'alk'ualan; ri ixoqi' taq kiwákix kan yeyawej kan y jikil chi ye'alex ri taq kal.

¹¹Ri kalk'ual ri winaqi' ri' kan e achi'el jumolaj alaji' taq karne'l, kan yetzok'lan k'a yebe achi'el nikiben ri taq karne'l.

¹²Ri ak'uala' ri' kan yebixan y yekikot rik'in ri ruch'abel ri q'ojom, ri arpa, y ri xul ri banon rik'in aj.

¹³Konojel ri winaqi' ri', kan ronojel q'ij chire ri kik'aslen, nikiq'axaj rik'in beyomel; y kan rik'in k'a uxlanen yeken y yemuq-el.

¹⁴Rije' kan nikibij k'a chire ri Dios chi keruya' kan kiyon, roma man nikajo' ta nikak'axaj chirij ri rubeyal ri k'aslen ri nrajo' rija'.

¹⁵Y chuqa' nikibij: ¿Achike ta k'a ri Dios, ri k'o ronojel uchuq'a' pa ruq'a', richin chi niqasamajij? ¿Kan k'o ta kami k'a ri niqach'ek, ri yojch'on-q'anej rik'in?, yecha'.

¹⁶Kan pa kiq'a' k'a rije' k'o-wi, chi utz nel chikiwech y pa jotol ek'o-wi. Stape' ri kich'obonik y ri nikibij rije', nej k'o chire ri nubij ri Dios.

¹⁷Man rik'in ri', chikikojol rije' man q'ij-q'ij ta ri k'o ta niken-el, y maneq ruk'ayewal ri niqaqa ta pa kiwi'. Ri Dios kan man nuben ta k'a chire ri kibeyomel chi k'o ta ri nuk'uluwachij.

¹⁸Rije' kan man e achi'el ta ri páxa ri man k'ayew ta nuk'uaj-el kaq'iq', chuqa' man e achi'el ta ri solot ri man k'ayew ta chi nuyek-el ri surkum.

¹⁹Rix kan niq'ax k'a chiwech chi ri rutojbalil ri kimak rije', yakon-apo roma ri Dios chi pa kiwi' ri ralk'ual niqaqa-wi. Man keri' ta. Ri Dios xa kan pa kiwi' ri aj-maki' xtuya-wi ri rutojbalil, richin chi kan tiketamaj na.

²⁰Ri aj-mak kan tutz'eta' na ri ruk'ayewal ri xtipe pa ruwi', kan tuqumu' na ri royowal ri Dios ri k'o ronojel uchuq'a' pa ruq'a'.

²¹Toq jun wineq xa kamineq chik el, man xkeruch'ob ta chik kan ri ralk'ual; kan man jun chik k'a xtuch'ob kan, toq xtiqupix-el ri ruk'aslen chuwech re ruwach'ulew.

²²Kan man jun k'a ri nitikir nibin chire ri Dios ri achike utz nuben, roma rija' kan nuq'et-tzij pa kiwi' konojel, jajun pa kiwi' ri ek'o chila' chikaj.

²³Ek'o chike ri winaqi' ri', toq yeken-el stape' e rijita'q chik kan k'a e jebel na, k'o kikoten kik'in ri yeken-el, y man jun ri nibanon ta chike chi yebison yebe.

²⁴Kan yebe k'a toq kan k'a janila jebel e ti'oj, y ri rupan ri kibaqil kan k'a utz na.

²⁵Jak'a ek'o ch'aqa' chik winaqi' ri janila nibison ri kánima yeken-el, roma kan man jun bey xkina' ta juba' ruki'il ri kik'aslen.

²⁶Ri wineq beyom y ri meba', chi e ka'i' yebelie' chuxe' ulew, y kan xtinoj k'a kij chi jut, ri yetijo kichin.

²⁷Yin kan wetaman k'a ri achike itzel taq ch'obonik ri k'o iwik'in, y chuqa' wetaman ri achike niwajo' niben richin yitzaq.

²⁸Rix kan nibij k'a: ¿Achike k'a xtikik'uluwachij ri e aj pa rachoch ri nimalej achin aj-mak? ¿Y achike xtikik'uluwachij ri ek'o rik'in ri xa maneq Dios chuwech?, yixcha'.

²⁹Rix xa kan k'o ta chik iwetaman kan kik'in ri yeq'ax ri yebe juk'an chik tinamit, xa ta ik'utun chike. Rije' kibin ta chik kan chiwe ronojel ri e kitz'etelon chik ri pa kik'aslen,

³⁰chi ri wineq banoy etzelal kan jebel nitz'et, roma toq k'o ruk'ayewal man jun nuk'uluwachij; y toq ri Dios nuteq-pe ruk'ayewal roma ri royowal, ri wineq banoy etzelal xa nikolotej chuwech ri'.

³¹Xa man jun wineq ri nitikir ta nibin chupalej ri rubanikil ri ruk'aslen chikiwech ri winaqi'. Y kan man jun chuqa' ri nitikir ta niya'on rutojbalil chire roma ri e rubanalon.

³²Y toq rija' xtuk'uex-el richin nibemuq kan, kan e k'iy k'a xkemuqun richin, y ri akuchi xtimuq-wi, ri winaqi' kan xkekiya' chuqa' chajinela'.

³³Ri k'olok'eq ulew ri ek'o pa jul ri akuchi xtili'e-wi kan, kan buyul k'a xtuna' rija'; e k'iy k'a winaqi' ri xkemuqun richin, ek'o ri e nabeyajineq-el, y ek'o ri e xambey kan.

³⁴Ronojel ch'abel ri ibin-qa chuwe, richin chi nikuquba' nuk'u'x, xa man jun xuk'en-pe chuwe. Ronojel ri ch'abel ri xe'ibij, xa xe'itz'ukula-pe chinuwech, xcha' ri Job.