Read Kaqchikel Job 22 Bible Online

Job 22 - Kaqchikel bible

Job 22

¹K'ari' ri Elifaz xch'on chik y xubij:

²Jun achin xa man nitikir ta k'a nuto' ri Dios, stape' kan jun wineq aj-na'oj, man nik'atzin ta chire ri Dios.

³Kan man jun k'a nuk'en-pe chire ri Dios ri k'o ronojel uchuq'a' pa ruq'a'. chi rat kan ak'uan jun chojmilej rubeyal k'aslen.

⁴Ri Dios man nroyoj ta jun wineq roma kan k'o Dios chuwech, ni man roma ta ri' nuben chi nuq'et-tzij pa ruwi'.

⁵Xa kan roma k'a janila mak ri e abanalon, xa roma ronojel ri etzelal ri abanalon kan e ik'owineq ruwi'.

⁶Roma toq ri awach'alal xkiben jun kiqajo'n awik'in, kan k'o na chi k'o xkiyuquba' kan awik'in y xa maneq achike roma xaben keri', kan xawelesaj kan ri kitziaq ri nikiq'uj, kan xaben k'a chike chi tew xkina'.

⁷Rat kan man xasuj ta juba' ruya' ri wineq q'itajineq, y kan xak'ek'ej ruway ri xa niwayjan.

⁸Rat kan roma k'o abeyomel, k'o aq'ij y k'o awuchuq'a', xa xachop relesaxik kulew ri man jun yetikir nikiben chawe y xok awichin ronojel.

⁹Y toq ri ixoqi' malkani' xbekik'utuj to'onik chawe, kan man jun xaya' pe chike, kan xaben chike ri meba'i' ak'uala' chi xkitej poqon.

¹⁰Y roma re abanobal re', kan jantape' nana' chi k'o pikbel ri rusutin-pe awij, y toq nana' nibeyikik-pe tew chawij roma axibinri'il.

¹¹Xa maneq chik saqil awik'in, xa ronojel xq'equmatej chawech; xa kan achi'el at muqutajineq roma jun ya'.

¹²Ri Dios k'a más nej k'o-wi chire ri kaj akuchi ek'o-wi ri ch'umila'; y wi rat natzu' akuchi k'o-wi ri ruk'isibel ch'umil, natz'et chi kan nej-nej k'o-wi.

¹³Y roma ri' rat nach'ob: Wi k'a kela' k'o-wi ri Dios, man nretamaj ta achike nik'uluwachitej wawe', Kan man nitikir ta nuq'et-tzij pa ruwi' ri wineq, roma xa k'a chirij el ri sutz' k'o-wi,

¹⁴Rat nach'ob chi ri sutz' kan man nuya' ta q'ij richin chi rija' nitzu'un-pe, rokik niq'axlan chiri' chukojol ri sutz' y ri kaj.

¹⁵¿Kan nawajo' rat chi nak'uaj ri ojer bey, ri bey ri jantape' xkitzeqelibej ri itzel taq achi'a'?

¹⁶Rije' kan chi'anin yan k'a xeken-el, y xa man jani kiq'ij ta; achi'el xa ta xpe jun raqen-ya', xuk'ot-el ri ulew ri kipaliben y xeruk'uaj-el.

¹⁷Rije' kan kibin k'a chire ri Dios chi keruya' kan kiyon, roma ri Dios ri k'o ronojel uchuq'a' pa ruq'a', man jun ruk'ayewal nitikir nuya' pa kiwi'.

¹⁸Keri' nikibij, stape' kan ja rija' ri xnojisan ri kachoch, rik'in ri nik'atzin chike, y roma ri' yin kan man ninwajo' ta ninchop yich'obon achi'el ri itzel taq winaqi' ri'.

¹⁹Toq ri chojmilej taq winaqi' xkitz'et ri xkik'uluwachij-el ri itzel taq achi'a', xekikot, ri winaqi' ri kan maneq kimak kan xetze'en roma kikoten.

²⁰Y xkibij: Wakami, ri e etzelanel qichin xqaqa yan el ruk'ayewal pa kiwi', y ronojel ri kibeyomel xa xuk'is q'aq', xkecha'.

²¹Wakami k'a tijunamatej chik k'a awech rik'in ri Dios y xtuk'en-pe uxlanen chire ri awánima, y re' kan k'iy k'a utz xtuk'en-pe chawe.

²²Kan tawak'axaj k'a ri pixa' ri yarutijobej-wi ri Dios kan ronojel k'a ri ch'abel ri nubij, kan taya' pan awánima.

²³Y wi rat kan nitzolin-pe ak'u'x rik'in ri Dios, ri k'o ronojel uchuq'a' pa ruq'a', xkayakatej k'a, y keri' kan xtipa'e' rubanik ronojel ri man utz ta pan awachoch.

²⁴Y kan taya' k'a el pan ulew ri q'anapueq ri k'o awik'in, ri q'anapueq ri k'o awik'in xa tabeya' kan kojol abej ri pa raqen-ya' Ofir,

²⁵y keri' kan ja ri Dios ri k'o ronojel uchuq'a' pa ruq'a' ri xtok abeyomel; kan ja wi ri Dios ri xtok ri aq'anapuaq y ri asaqipuaq.

²⁶Jari' k'a toq xkakikot rik'in rija', y man xtapoqonaj ta k'a xkak'oje-apo chuwech ri Dios, rik'in jun ch'ajch'ojilej awánima.

²⁷K'ari' xkatikir k'a xkach'on rik'in, y rija' xkarak'axaj chuqa'; y man tamestaj taya' chire ri asujun chi naya' chire.

²⁸Ronojel k'a ri xtach'ob chi naben, kan utz xtel chawech; roma ri aj-chikajil saqil, kan xtusaqirisaj ri abey.

²⁹Roma ri winaqi' ri kan nim nikina-ki', ri Dios xa nuben chike chi maneq ok kiq'ij, man rik'in ri' ri Dios kan yerukol k'a ri winaqi' ri maneq ok kiq'ij.

³⁰Roma ri' ri Dios kan xkarukol k'a, wi kan maneq amak achi'el ri nabij, kan xkarukol k'a wi ri ak'aslen kan ch'ajch'oj chuwech Rija', xcha' ri Elifaz.