Read Kaqchikel Job 23 Bible Online

Job 23 - Kaqchikel bible

Job 23

¹Ri Job xch'on k'a y xubij:

²Wakami k'a, yin yijilo chuwech ri Dios roma ri ruk'eyul ri nuk'aslen, roma rija' kan rubanon chuwe chi ink'o pa ruk'ayewal y roma ri' yin yijilo k'a.

³Xa rik'in ta ninwetamaj akuchi ninwil wi ri Dios, yin yinapon ta k'a rik'in richin chi kirak'axaj, ri chiri' ri akuchi nuq'et-wi-tzij.

⁴Y kan ninya' ta apo chuwech rija' ri nuk'uluwachin, y kan ninchol ta apo ronojel chuwech rija', richin chi ninto-wi'.

⁵Kan ninwajo' k'a ninwetamaj, achike ta ri xtubij-pe chuwe o achike ta ch'abel nukusaj richin nuk'ulubej-pe ri nuch'abel.

⁶Rija' kan man xtiyakatej ta pe chuwij rik'in ri nimalej ruchuq'a', rija' kan xkirak'axaj ta chi utzil, toq xkich'on rik'in.

⁷Roma yin in jun achin ri man nintz'uk ta ri ninbij y yitikir ninchol chire ri nuk'uluwachin, y kan jumul chiri', rija', ri q'atoy-tzij kan xtuq'alajirisaj chi yin xa man jun numak.

⁸Xa ta yin yibe k'a chukanoxik ri Dios re kere' pa relebel-q'ij, man xtinwil ta, roma man chiri' ta k'o-wi, xa ta yibe chukanoxik re kere' pa qajbel-q'ij, kan man chiri' ta k'o-wi.

⁹Y chuqa' xa ta yibe k'a kela' pa xaman xa man xtintzu' ta kan ruwech ri chiri' y xa ta yibe re kere' pa xokon, xa man xtintz'et ta chuqa' kan.

¹⁰Jak'a rija' kan retaman achike bey ri nuchapon-el, y toq yiruya' pa tejtobenik, kan yinok k'a achi'el ri q'anapueq toq nich'ich'an.

¹¹Ri nubinibal yin kan rutzeqeliben wi k'a naqaj ri rubinibal rija'; kan nuchajin k'a wi' jebel chupan ri rubey rija', y man nujech'en ta kan wi' chire ri rubey.

¹²Kan man jun bey k'a ri nujech'en ta el wi' chire ri pixa' ri rubin, kan nubeyomel k'a nubanon chire ri ch'abel ri e eleneq-pe pa ruchi', más ke chuwech ri nuway.

¹³Xaxe k'a ri Dios ri pa'el pa ruwi' ronojel y man jun chik ri achi'el ta rija'. Man jun ri nitikir ta nupaba-ri' chuwech y nujel ta ri nuch'ob. Roma kan achike k'a ri nrajo' ri ránima rija', jari' ri nuben.

¹⁴Ri ruch'obon ri Dios chi kan nuben wik'in, kan xtibanatej-wi, y re nuben wik'in yin, xa jun ok chike ronojel ri nuch'ob chi nuben rija'.

¹⁵Y xa roma ri' toq yin kan janila ninxibij-wi' chuwech rija'. Y toq kan ninch'ob rij ronojel ri', yik'ark'ot k'a chuwech.

¹⁶Ri Dios kan rubanon chik k'a chuwe chi in jun achin xibiy-wi', y roma rija', ri k'o ronojel uchuq'a' pa ruq'a', kan achike na nuben ri nupan roma xibinri'il.

¹⁷Jak'a man ja ta ri q'equ'm ninxibij-wi chuwech, stape' nuben chuwe chi man yitz'u'n ta.