Read Kaqchikel Job 24 Bible Online

Job 24 - Kaqchikel bible

Job 24

¹¿Achike roma ri Dios, ri k'o ronojel uchuq'a' pa ruq'a', man ruch'aron ta ruq'ijul richin chi nuq'et ta tzij pa kiwi' ri aj-maki', richin chi ri yeniman richin rija', kan nikitzu' ta toq nuq'et-tzij?

²Ri achi'a' ri' yekijuk' k'ulba't, richin ninimer ri kulew, yekeleq'ala' awej y man jun kik'ix yebe chikiyuq'uxik.

³Yekeleq'aj-el ri taq kibur ri meba'i', y kan yekimej ri kibóyix ri malkani', ri e yuqul kan roma k'as.

⁴Rije' kan yekinimila' kan ri e molonel ri ek'o pa taq bey, roma ri' konojel ri winaqi' ri kan man jun k'o kik'in, nikewala-ki' chikiwech.

⁵Ri winaqi' ri man jun k'o kik'in, yebe pa taq tz'iran ruwach'ulew, kan nikiben k'a achi'el nikiben ri taq bur toq nibekikanoj kiway; rije' xaxe ok keri' yetikir nikil kiway ri kalk'ual.

⁶Rije' kan k'a ja na toq nok aq'a', k'ari' yebe chuk'amik ri trigo ri nik'atzin chike, y chuqa' kan k'a jari' toq yebe chuwuxik uva pa taq kulew ri achi'a' e aj-maki'.

⁷Rije' kan man nikik'uaj ta kiq'u' y keri' yeq'ax ri junaq'a', kan man jun ri nikikusaj richin nikikuch-ki' chuwech ri tew.

⁸Kan nik'o chuqa' kiya'al roma ri job richin k'echelaj, roma ri' rije' nikimol k'a ki' chikij abej, nikikanoj juba' ti meq'en.

⁹Y kan ek'o k'a chike ri itzel taq achi'a' ri kan yekimajila-el ri taq ak'uala' maneq chik kitata', chikiwech ri teja', stape' k'a yetz'uman na. kan ja ri ak'uala' yekik'en chuwech ri kik'as ri winaqi' ri man jun k'o kik'in.

¹⁰Ri winaqi' ri' kan nikiben chike ri kisamajela' chi yebe pa taq samaj y q'alaj chik pe ri kich'akul roma maneq kitziaq, ri samajela' ri' yeken roma wayjal y pa q'etaj trigo e kejqalon-el.

¹¹Kan yekisiloj ri abej richin nikiyitz' ri aceite, kan janila k'aten nikina' toq nikipitz' ri uva richin nel pe ri ruya'al, y kan man niya'ox ta chike richin nikiqum.

¹²Jak'a ri pa tinamit ek'o-wi ri yeken yan, kan rik'in k'a jiloj nikik'utuj to'onik, y ri kánima ri e sokotajineq, kan yesik'in nikik'utuj chuqa' to'onik, jak'a ri Dios kan man nrak'axaj ta ri kich'owen.

¹³Ri aj-maki' ri' kan yeyakatej chirij ri saqil, kan man ketaman ta nikitzeqelibej ri utzilej rubey ri Dios, y man yebiyin ta chupan ri bey ri'.

¹⁴Jun kamisanel kan k'a nimoymot na toq kan ja yan ri' niyakatej-el, richin nukamisaj ri man jun k'o rik'in, y ri chaq'a', ja ri eleq' ri nuben.

¹⁵Jak'a ri achin k'ulan y nukanoj jun chik ixoq, kan nroyobej chi k'a nok na aq'a', k'ari' nel-el, y nuch'ob-qa chi man jun achike ta nitz'eton richin; y kan nujel k'a el ruwech.

¹⁶Ri eleq'oma', k'a ja ri chi'aq'a' yekiteq'ula' ri jay richin ye'ok-apo, ri jay ri kan kiq'ijun chik kan ri paq'ij; kan man jun bey ye'eleq' ta toq k'o ri saqil, roma kan itzel nikina' chire.

¹⁷Chikiwech ri winaqi' ri', toq niseqer-pe, kan ruq'equmal ri kamik nikina' rije', roma rije' xa kan ruk'ulun chik chike ri xibinri'il ri richin ri chaq'a', xcha' ri Job.

¹⁸Ri itzel taq achi'a' yeq'ax-el chi'anin achi'el ri raqen-ya'; ri kulew kan k'o ruk'ayewal ya'on pa ruwi' roma ri Dios, y man jun chik nisamej chupan ri kitiko'on richin uva.

¹⁹Y kan achi'el nikiben ri k'aten y ri saq'ij toq nikibeq'-qa ri pim chuma-tew ri niqaqa, keri' chuqa' nuben ri jul richin kamineq chike ri e makuwineq.

²⁰Rije' kan man xkenatex ta chik koma ri kite'; jak'a ri jut kan ki' xtikina' toq xke'apon pa kichi'; rije' kan man jun chik k'a xtinatan kichin, xa kan jumul k'a xke'elesex-el, achi'el toq nichoy-el jun che'.

²¹Rije' kan xekiya' pa tijoj-poqonal ri ixoqi' ri man e alanel ta. y chuqa' kan man jun bey ri utz ta juba' xkiben kik'in ri malkani' taq ixoqi'.

²²Jak'a ri Dios, rik'in ri ruchuq'a' yerutzeq ri k'o janila kiq'ij; y stape' kan kow ek'o, kan man xkekolotej ta chuqa' pa ruq'a'.

²³Rija' nuben chike chi jikil y kuqul kik'u'x e k'es; jak'a ri bey ri kik'uan kan tzuliben roma rija'.

²⁴Rije' kan chi'anin k'a yebe-q'anej pa jotol y k'a juba' ri' xa e man jun chik, yetzaq y yeken k'a achi'el nikik'uluwachij konojel, niqupix-el ri kik'aslen, achi'el niq'at ri ruwi' ri trigo.

²⁵Y wi man keri' ta, ¿k'o kami jun ri nitikir nibin chuwe chi man qitzij ta ri ninbij? ¿Kan k'o kami jun ri nitikir nuk'ut chi yin xa in sachineq rik'in ronojel ri xinbij?, xcha' ri Zofar.