Read Kaqchikel Job 28 Bible Online

Job 28 - Kaqchikel bible

Job 28

¹Kan qitzij na wi chi ri saqipueq kan k'o ri akuchi nik'ot-wi, y chuqa' ri q'anapueq kan k'o ri akuchi nitzak-wi, richin nich'ajch'ojirisex,

²Ri q'eqapueq, nel-pe toq nitzak jun q'eq ruwech ulew, y ri kaqapueq nel-pe toq yetzak jujun ruwech abej.

³Chuwech ri achin ri q'equ'm xa man jun, roma rik'in ruq'aq' richin saqil, kan nitikir k'a nisamej k'a nej qa, chuxe' re ruwach'ulew y stape' k'a pa q'equ'm ek'o-wi-qa ri abej, yebekila-qa y yekelesaj-pe.

⁴Nej chire ri akuchi ek'o wineq, chiri' yekiwop jul chuxe' ulew richin nikikanoj q'eqapueq, rije' yek'oje' ri akuchi man jun wineq napon o niq'ax ta, y richin yesamej e tzeqel chutza'n kolo', yebe-kela' yebe-kela' nikiben.

⁵Re pa ruwi' re ruwach'ulew, chiri' nel-wi ronojel ri niqatej y jak'a ri pa ruk'u'x-qa, ri q'aq' kan niroqo.

⁶Ri relik taq abej kan ek'o k'a zafiro chupan, y chupan ri ulew kan k'o k'a q'anapueq.

⁷Ri bey ri napon chiri', kan man tz'eton ta ni koma ri aj-xik' taq chikopi' ri yetijo ti'ij, ri bey ri' ni ri xik kan man rutz'eton ta chuqa',

⁸Chiri' kan man jun bey k'a kiya'on ta kaqen ri k'uxunela' taq chikopi', chiri' kan man jun bey k'a q'axineq ta chuqa' ri koj.

⁹Jak'a ri achin roma ri rusamaj stape' nril ri abej más kow, nuwulaj richin chi niq'ax rija' kan nuwop ri kixe' ri juyu' y nitikir nupiskolij ri ulew kichin ri juyu' ri'.

¹⁰Kan nuben k'a rubey stape' kan chupan abej, y ri ruwech kan yeril k'a ri jebelej taq abej y q'eqapueq.

¹¹Kan nitikir k'a nril akuchi nitiker-wi-pe jun raqen-ya', y kan yerelesaj-pe chuwa saqil ronojel ri yeril, ri kan man jun bey e tz'eton.

¹²Jak'a ri na'oj, ¿akuchi kami nilitej-wi? y ¿akuchi kami nilitej-wi ri etamabel richin netamex ri rukojolil ronojel?

¹³Ri achin kan man retaman ta k'a achike bey ri nuk'uan k'a chiri', ri bey ri' kan man xtril ta re wawe' pa ruwi' re ruwach'ulew.

¹⁴Ri ruxe' ri nimalej taq palou kan nikibij chi man chiri' ta k'o-wi, y ri nimalej taq palou kan nikibij chuqa' chi man chiri' ta k'o-wi.

¹⁵Y stape' kan q'anapueq nawajo' naya' chuwech ri na'oj, man xtawil ta, ni stape' xtapej ta saqipueq richin nawil ri na'oj, man xtawil ta chuqa'.

¹⁶Ri na'oj janila rejqalen y stape' nawajo' natoj rik'in q'anapueq ri nipe pan Ofir, man nuq'i' ta ri rajel, chuqa' stape' nawajo' naya' cornalina o zafiro chuwech, kan man nuq'i' ta chuqa' ri rejqalen.

¹⁷Ni ta ri q'anapueq y ri leq ri e banon rik'in chay, junan ta kajel rik'in ri na'oj, y ni ta ri leq ri e banon rik'in q'anapueq ri más jebel, junan ta chuqa' rik'in ri na'oj.

¹⁸Kan más wi rejqalen ri na'oj ke chuwech ri wiqobel ri yeban rik'in jalajoj ruwech abej achi'el ri coral, ri abej chay yetzu'un y ri perla.

¹⁹Ri rejqalen ri na'oj man tikirel ta chi nijunamex rik'in rejqalen ri abej topacio ri richin pan Etiopía, ni rik'in ri q'anapueq man tikirel ta richin niloq' ri na'oj.

²⁰¿Kan akuchi kami nipe-wi ri na'oj? y kan ¿akuchi kami nilitej-wi ri etamabel ri nuya' rukojolil ronojel?

²¹Roma re' kan ewan k'a chikiwech konojel ri winaqi', y kan matzel chuqa' chikiwech konojel ri aj-xik' taq chikopi'.

²²Ri kamik y ri akuchi ye'apon-wi ri kaminaqi' nikibij k'a: Roj kan juba' ok qak'axan chi kan k'o-wi ri na'oj, yecha'.

²³Y xaxe k'a ri Dios etamayon ri bey ri nuk'uan k'a rik'in ri na'oj, xaxe rija' etamayon akuchi nilitej-wi.

²⁴Roma xaxe rija' nitikir nitzu'un k'a pa ruk'isibel chire ri ruwach'ulew, kan nutz'et k'a ronojel ri k'o pa ruwi' ri ruwach'ulew.

²⁵Roma rija' kan retaman ri janipe' ralal xuya' chire ri kaq'iq', y kan retan k'a jebel ri janipe' chi ya' k'o y kan k'o retabal.

²⁶Rija' kan xuya' k'a ruchojmilal chire ri job, y kan xuben ri retal-rubey ri koyopa' ri nuben ri koqolajay.

²⁷Y toq k'o chik ronojel re', kan xuya' wi k'a rejqalen ri na'oj; y ja rija' k'a xbin chi kan utz wi, roma kan xretamaj yan chi utz.

²⁸Roma ri' ri Ajaw kan rubin wi k'a chike ri winaqi': Jun wineq ri kan k'o rukiy ri Dios chuwech, kan q'alaj k'a chi k'o na'oj rik'in, y jun wineq ri kan nuch'er-pe ri' chike ri itzel taq banobel, kan q'alaj k'a chi k'o etamabel rik'in.