Read Kaqchikel Job 29 Bible Online

Job 29 - Kaqchikel bible

Job 29

¹Ri Job xuchop chik jun rutzij y xubij:

²¡Janila ninrayij chi yitzolej ta chupan ri ka'i' oxi' ik' kan chuwij, chupan ri q'ij toq kan ja wi ri Dios ri chajiyon wichin!

³Rik'in ri rusaqil rija' ri k'o pa nuwi', yin kan xitikir k'a xiq'ax chupan ri ruq'equmal ri k'aslen re wawe'.

⁴Chupan ri q'ij ri' yin kan jebel nubanon, y ri Dios kan in rachibil rubanon chuwe, y ruchajin jebel ri wachoch.

⁵Y ri Dios ri k'o nimalej uchuq'a' pa ruq'a', kan k'a k'o na wik'in yin chupan ri q'ij ri'; y ri walk'ual kan ek'o chuqa' pe naqaj chuwe.

⁶Ri q'ij ri' ri waqen kan yech'eqe' rik'in ri janila chi leche ri nikiya' ri nuwákix y ri nuk'arnel. Chuqa' kan janila chi aceite richin olivo nibiyin-pe chikikojol ri abej ri akuchi niyitz'-wi.

⁷Noqaqa chinuk'u'x ri q'ij toq yin yibe k'a richin ninq'et-tzij, chiri' pan okibel richin ri tinamit.

⁸Toq niqamol-qi' chiri' richin niqaq'et-tzij, ri wachibil ri k'a e alaboni' na juba' kan nikijech'ej-ki' chinuwech. Y chuqa' ri wachibil ri kan k'o chik k'iy kijuna', kan yepa'e-q'anej toq yinapon kik'in.

⁹Toq ri e tata'al yinkitz'et chi yinapon, yetane-qa chi ch'owen. Rije' kan nikiben k'a retal chi man jun chik tich'on.

¹⁰Ri achi'a' ri kan k'o más kiq'ij yetane' richin yewolol. Y keri' man xkik'is ta rubixik ri kich'abel.

¹¹Ri winaqi' ri ye'ak'axan wichin kan janila k'a yekikot, y utz yech'on chuwij. Ri yetz'eton wichin rik'in ri nubanobal, kan nikiq'alajirisaj k'a chi utz ri ninben.

¹²Rije' kan ketaman k'a chi yin xinkol ri nuk'utuj to'onik. Y kan xenwilij k'a ri meba'i' ri man jun nito'on kichin.

¹³Roma ri nuto'onik, ri yeken yan kan xkoyoj k'a urtisanik pa nuwi'. Y ri malkani' kan xebixan k'a roma kikoten.

¹⁴Ri chojmilal k'a ri e nubanon ri pa nuk'aslen, kan yiruwiq k'a achi'el ri nutziaq. Y ri nubanobal e choj, kan yinkikuch k'a, achi'el nuben ri tzieq ri ninkusaj chuwij y ri pa nujolon.

¹⁵Yin kan xinok k'a achi'el kitzubal ri e moyi'. Chuqa' kan xinok achi'el kaqen ri e jetz'.

¹⁶Kan xinok k'a achi'el jun tata'aj pa kiwi' ri winaqi' ri man jun k'o kik'in. Kan xinok k'a chojmirisey richin ri k'o nikik'uluwachij ri winaqi' ri xa man e nuwinaq ta.

¹⁷Y chikikolik ri winaqi', yin kan k'o chi xench'ek ri maneq Dios chikiwech, kan xenmajij k'a kan ri winaqi' chikiwech.

¹⁸Chupan ri q'ij ri', yin kan xinch'ob wi k'a pa wánima: Pa buyul k'a ink'o pa nuch'at toq xkiken. Ri nujuna' kan achi'el chik k'a ri sanayi' ri k'o chuchi' ri palou, toq xkibe.

¹⁹Chinuwech yin kan in achi'el k'a jun che', y ri nuxe' kan jebel k'a nikiq'i-apo ri ya'. Ri pa taq nuq'a', kan chi junaq'a' k'a nilie' ri raxq'ab ri niqaqa.

²⁰Y ri nuq'ij y ri wejqalen, kan jantape' k'a beneq-q'anej pa jotol, y ri nuk'aqbal-ch'ab kan jantape' k'a k'o ruchuq'a' y man k'ayew ta chinuwech richin ninjik'.

²¹Chupan k'a ri q'ij ri', ri winaqi' kan in koyoben k'a richin nikak'axaj ri ninbij, kan yetane-qa chi ch'owen richin nikak'axaj ri nupixabanik.

²²Y toq yin xitane' chi ch'owen chikiwech ri winaqi', kan man jun achike ta ri xkibij chuwij, ri nuch'abel kan buyul-buyul k'a xapon pa taq kixikin.

²³Rije' kan yinkoyobej k'a, achi'el nikiben ri winaqi' toq nikoyobej ri nabey job, kan achike la k'a nuben ri kánima koyoben chi niqaqa ri job ri'.

²⁴Y toq yin kan xtze'en k'a nuwech kik'in, man k'a xinkinimaj ta. Man rik'in ri', roma xinkitzu' chi yikikot, kan k'o chuqa' kikoten xuk'en-pe chike rije'.

²⁵Y ri winaqi' ri' kan xkitaqej k'a ri ch'abel ri xinya' chike, y kan xitz'uye' k'a chikikojol achi'el jun aj-raqen. Xinok achi'el jun rey chikikojol ri aj-labal, y toq ek'o pa bis yin kan xinkuquba' k'a kik'u'x.