Read Kaqchikel Job 3 Bible Online

Job 3 - Kaqchikel bible

Job 3

¹K'ari' ri Job xch'on k'a, y rija' kan xretzelaj k'a ri q'ij toq xalex;

²Roma ri' xubij:

³K'ate' ta man ta k'o ri q'ij toq yin xinalex, y maneq ta chuqa' ri itzel aq'a' toq xbix chi jun ti ala' ri xtz'ukutej rik'in ri nte',

⁴k'ate' ta ri saqil richin ri qij ri' xq'equmatej ta, y ri Dios man ta xoqaqa chuk'u'x ri q'ij ri' y kan man ta xseqer chuqa' ri q'ij ri'.

⁵Jebel ta ri', xa ta ri q'ij ri' xqa' ta q'equ'm y muj pa ruwi', kan ta xmuqutej ri q'ij ri' roma ri q'equ'm; y ri rumujal ri ik' xuk'en ta pe xibinri'il pa ruwi' ri q'ij ri'.

⁶Ri chi'aq'a' toq xitz'ukutej rik'in ri nte' más ta utz man ta xk'is; richin chi ri q'ij toq xinalex man ta q'alaj chupan ri juna', richin chi ri q'ij ri' man ta q'alaj chupan ri ik'.

⁷Ri chi'aq'a' ri' man ta jun ixoq xyawej kan, y keri' man ta k'o kikoten.

⁸Jebel ta ri' xa ta ri aj-itza' xkiya' ta etzelanik pa ruwi' ri q'ij ri', y achi'el ri etzelanik ri nikiya' pa ruwi' ri cocodrilo.*f1* Keri' ta xkiben pa ruwi' ri chi'aq'a' ri'.

⁹Xa man ta xebeyik'ulun-pe ri ch'umila' ri nimaq'a' ri'; xa man ta xbek'ulun-pe ri saqil ri oyoben, y xa man ta xtzu'un-pe ri q'ij.

¹⁰Itzel k'a ri q'ij ri' roma kan man xuben ta chire ri nte' chi man ta xinalex, y man xuben ta chire ri runaq' taq nuwech chi man ta nintz'et re tijoj-poqonal re'.

¹¹¿Achike roma man in kamineq xinalex, ó xiken ta chupan ri walaxik?

¹²Ri nte' xa man ta na xiruk'ul, y ri ruwa taq ruk'u'x rija' xa man ta xkiya' nutz'um.

¹³Richin keri' in kamineq ta y yinuxlan ta chik. Keri' nuchapon ta waran y in li'an ta.

¹⁴Xa in li'an ta chik junan kik'in ri e rey ri xeken yan el. Chuqa' junan ta chik ink'o kik'in ri xepixaban ojer, ri xepaban chik q'anej tzaqineq taq tinamit.

¹⁵Kan yinuxlan ta chuqa' kik'in ri tata'al ri e rajaw ri q'anapueq, ri kinojisan ri kachoch chi saqipueq.

¹⁶¿Achike roma man ximuq pan ewel achi'el ri ak'ual ri man nril ta ruq'ijul, ri kan man jun bey xutz'et ta ruwech ri saqil?

¹⁷Chiri' chuxe' ulew man yenaqon ta chik pe ri e banoy taq etzelal, y chiri' chuqa' ye'uxlan-wi ri xk'is-el kuchuq'a'.

¹⁸Chiri' ye'uxlan-wi ri xkitej-el poqon pa taq samaj, y man nikak'axaj ta chik ri kiraqoj-chi'ij ri xek'oje' pa kiwi'.

¹⁹Chiri' ye'uxlan-wi chi ch'uti'q chi nima'q, y chiri' ri samajel xa xkolotej yan k'a chuwech ri rajaw.

²⁰¿Achike na roma toq ek'o ri k'a e k'es na y xa nikitej poqon, y k'a e k'es na chuqa' ri k'eyurneq kik'aslen?

²¹¿Achike na roma ri koyoben kikamik y xa man yeken ta, stape' kan nikikanoj kikamik achi'el ta nikikanoj jun beyomel?

²²Rije' yekikot k'a ja toq yebemuq kan.

²³¿Achike roma toq k'o ruk'aslen jun achin ri xa man nril ta el rubey, ri banon chire roma ri Dios chi q'aton rubey?

²⁴Y keri' yin, roma ri nuq'axo'n, xa man yiwa' ta. Ri ruya'al nuwech nibiyin y nich'otot-qa pan ulew.

²⁵Xa kan xoqaqa k'a wik'in ri nuxibin-wi' chuwech. Kan xink'uluwachij k'a ri nupoqonan yinapon chupan.

²⁶Yin man yich'uch'u' ta, ni man yinuxlan ta juba'. Xa pa ruk'exel ri' xa ruyon q'axo'n ri wilon, xcha' ri Job