Read Kaqchikel Job 30 Bible Online

Job 30 - Kaqchikel bible

Job 30

¹Jak'a re wakami ri kan k'a más e ak'uala' na chinuwech yin, xa yetze'en chuwij, ri e kalk'ual kan ri achi'a' ri man xeqa' ta chinuwech; y kan man xenwajo' ta xenkusaj ni richin chi junan ta kik'in ri nutz'i' xekichajij ta ri wawej.

²Yin xa man jun ta xinch'ek xa ta xe'ok nusamajela' ri achi'a' ri', roma xa kan maneq ruchuq'a' ri kiq'a'.

³Rije' kan janila k'a e rukajman y yewayjan roma ri' kan k'o k'a chi ye'eleyaj ri chaq'a' y yebe pa taq juyu' y ri pa tz'iran taq ulew, richin chi yekikanola' chaqi'j ruxe' taq q'ayis y jari' yekijuk' pa ruk'exel ri kiway.

⁴Ri chiri' pa taq juyu', ri kojol taq q'ayis nikikanola' k'a ri q'ayis malwa, y jari' ri nikitej rije' richin nikich'uch'urisaj ri kiwayjal; y chuqa' nikikanola' ri ruxe' ri q'ayis retama, roma ri kiwayjal kan janila nim y richin chi yerumeq'.

⁵Re winaqi' re' kan ye'elesalox k'a pe koma ri ch'aqa' chik winaqi' ri pa taq tinamit, kan chi raqoj-chi'ij k'a ye'elesex-pe, kan achi'el niban chike ri eleq'oma'.

⁶Y xa roma ri', rije' kan k'o k'a chi ja ri raqen taq jul ri nok kachoch, y ri pa taq jul ri e k'oton chuxe' taq juyu' chiri' yek'oje-wi.

⁷Rije' ye'oq' k'a ri chiri' chuxe' taq q'ayis ri k'o kik'ixal, rije' ja ri chiri' chikixe' taq q'ayis ri nikimol-wi-ki' y nikimeq'-ki'.

⁸Rije' xa e junan k'a kik'in ri itzel taq winaqi', ni maneq rubi' kite-kitata' kik'uan, rije' xa e elesan-el chupan ri kiruwach'ulew.

⁹Jak'a re wakami, re winaqi' re' kan xaxe yinkitzu' xa yetze'en chuwij, kan pa kichi' k'a ink'o-wi, y jantape' yinkitzijoj.

¹⁰Kan janila itzel yinkitz'et y k'a nej yek'oje-wi chuwe yin, y kan man nikiq'et ta juba' ki' richin nikichubaj nupalej.

¹¹Y wakami toq ri Dios xrelesaj ri wuchuq'a' y kan xuqasaj ri nuq'ij jumul, kan man jun chik ri yitikir ninben, y roma ri' re winaqi' re', kan achi'el e solkopitajineq-pe chuwij y kichapon nikiben etzelal chuwe.

¹²Re achike na ok chi winaqi' re' kan e yakatajineq k'a chuwij, kan nikajo' k'a yinkitzeq y nikikanoj rubanik richin yinkikamisaj.

¹³Rije' kan nikiq'atala' k'a ri bey richin ri nuk'aslen, kan e tikirineq k'a chuwij richin chi in kiya'on pa tijoj-poqonal y man jun achike ta ri yito'on chikiwech.

¹⁴Xe'ok k'a pe k'a re akuchi ink'o-wi, achi'el xa ta xkiteq'uj-pe jun wopol chire ri wachoch, kan e yakatajineq k'a chuwij rik'in kuchuq'a'.

¹⁵Y jari' toq xpe jun nimalej xibinri'il chuwe y xusech nuk'u'x y ri nuq'ij ri k'o, xa xq'ax-el, achi'el toq nijumin niq'ax ri kaq'iq'; ronojel ri nubeyomel ri kan jebel beneq chinuwech, xa xbe achi'el niyakatej-el ri sutz'.

¹⁶Wakami kan maneq chik rayibel wik'in richin chi in k'es, roma kan q'ij-q'ij chik ink'o pa ruq'a' ri tijoj-poqonal.

¹⁷Ri chi'aq'a' kan yirukamisaj ri ruq'axomal ri nubaqil, ri q'axomal kan nuk'ux ri nubaqil y kan man nisiliso' ta juba'.

¹⁸Ri Dios kan rik'in k'a ronojel ruchuq'a' xiruchop chi nutziaq kan xumajij k'a chi ruqul ri nutziaq y nujitz'aj yan wuxla'.

¹⁹Toq ri Dios xiruchop kan xuqasaj nuq'ij jumul, kan achi'el xiruk'eq pa ch'abeq, xa kan xuben chuwe chi in achi'el ulew o in achi'el chaj.

²⁰Nu-Dios yin, kan rik'in k'a uchuq'a' yatinwoyoj y rat xa man yinawak'axaj ta, kan yinapon k'a chawech y rat man yaniman ta chuwe.

²¹Rat kan xajalatej k'a wik'in yin, kan at yakatajineq k'a chuwij y man najoyowaj ta nuwech, kan rik'in k'a ronojel awuchuq'a' naben chuwe chi nintej poqon.

²²Kan naben chuwe chi ri rukaq'iq'al ri k'aslen kan yiruk'uaj-el, chi ri surkum richin ri k'aslen kan yirusututej.

²³Roma yin wetaman chi jare' yatajin chinuk'uaxik k'a pa nukamik, yinak'uaj k'a ri akuchi ye'apon-wi konojel ri winaqi' ri xek'ase-el chuwech re ruwach'ulew.

²⁴Xaxe k'a toqaqa chi'ak'u'x, chi yin kan nuto'on wi ri wineq ri k'o ruk'ayewal nuq'axaj, toq kan xuk'utuj ruto'ik toq k'o chupan ri ruk'ayewal.

²⁵Yin kan xinwoq'ej ruwech ri poqonatajineq, ri wánima kan xbison k'a janila roma ri wineq ri kan man jun k'o rik'in.

²⁶Toq yin kan woyoben chi ronojel utz nel chinuwech, xa jari' toq xqaqa ri tijoj-poqonal pa nuwi'; toq yin kan ninkanoj chi ronojel nisaqir ta chinuwech, xa jun q'equ'm ri xqaqa pa nuwi'.

²⁷Yin kan jantape' k'a nupiskolila-ri' ronojel ri nupan, roma ri ninch'ob, kan q'ij-q'ij k'a nink'ul xabachike ruwech tijoj-poqonal.

²⁸Kan xiq'eqer yan k'a pa ruq'a' ri yabil y man roma ta in ruk'aton ri q'ij, y k'iy bey taq ink'o chikikojol ri winaqi' kimolon-ki', yiyakatej-q'anej y nink'utuj to'onik chiri'.

²⁹Yin xa kan in achi'el chik k'a kach'alal ri utiwa', kan achi'el kachibil ri avestruz.

³⁰Ri nutz'umal kan xq'eqer yan roma ri yabil, y kan yetzaqilan chik el, ri nubaqil kan yerepo y yeq'aq'an pa ruq'a' ri nimalej k'aten.

³¹Ri ruch'abel ri arpa ri nuq'ojom, kan bis-bis k'a ninwak'axaj yin, y ri niq'ajan ri nuxul, xa achi'el nujililej oq'ej.