Read Kaqchikel Job 31 Bible Online

Job 31 - Kaqchikel bible

Job 31

¹Yin kan nujikiban nutzij, chi kan man jun bey xtinrayij ta ruwech jun xten.

²Roma, xa ta yin nubanon ri nurayibel ri', ¿achike ta kami ri nuteq-pe ri Dios ri k'o ronojel uchuq'a' pa ruq'a' richin nuya' ruk'exel chuwe?

³Roma ri wineq ri kan maneq Dios chuwech, kan k'o-wi k'a tijoj-poqonal nuq'axaj, kan nipe-wi ri wululen chirij roma kan itzel-wi ri ruk'aslen.

⁴Ri Dios kan retaman wi ri achike rubanik ri nuk'aslen yin, rija' kan retaman k'a chikijujunal ri nuxaka'l ri ninya' chuwech re ruwach'ulew.

⁵Wi ta yin yibiyin chuwech re ruwach'ulew y ja ri man qitzij ta ri ninben, o wi kan junanin yibe richin ninben richin nitzeqelibej ri q'oloj,

⁶kan kirupaja' k'a ri Dios rik'in jun etabel ri kan tz'aqet nipajon, richin keri' ri Dios kan nretamaj k'a chi yin kan choj wi ri nuk'aslen.

⁷Y wi ta yin ninjel ri nubey y ninchop chik el jun ri xa man k'utun ta chinuwech, wi ta yin kan nutzeqeliben ta ri yerutzu' ri wineq, y wi yin kan in tz'ilobitajineq chik k'a roma ri man utz ta yeruchop-el ri nuq'a',

⁸wi ta keri', utz ta nrelesaj ronojel ri nutikon-qa y nuya' chike ch'aqa' chik, y chuqa' ri nutikon-qa kan yek'uq-el chinuwech.

⁹Wi ta ri wánima ch'akon ta roma jun chik ixoq, o wi ta yin kan woyoben ri rixjayil ri wachpochel, jampe' nel pe,

¹⁰wi ta keri', ri wixjayil xa utz ta chi niberilij y nuben ta ri nrajo' jun chik achin, xa nibek'oje' ta pa ruch'at xabachike achin.

¹¹Roma xa ta jari' ri nubanobal, kan mak ta ri nubanon y kan ruk'amon ta richin yibepabex chuwech ri q'atoy-tzij y niya'ox ta ri rutojbalil ri numak.

¹²Ri mak ri' kan achi'el k'a jun nimalej y k'ayewalej k'atik ri kan nitikir nuporoj ronojel, y kan nuk'is ronojel ri k'o wik'in.

¹³Wi yin man ta xinchojmirisaj ri kich'ojinik ri nusamajela', wi man ta xinwak'axaj ri ruch'ojinik ri nusamajel achin y ri ruch'ojinik ri nusamajel ixoq, toq xe'oqaqa wik'in,

¹⁴wi man ta choj xinben kik'in ¿Achike ta kami ninben yin toq yibepa'e' chuwech ri Dios? Y ¿achike ta kami ninbij chire toq rija' nuq'et-tzij pa nuwi' roma ri nubanobal?

¹⁵Roma ¿man ja ta kami ri Dios ri xtz'ukun-q'anej wichin rik'in ri nte'? Y ri nusamajela', ¿man ja ta kami ri Dios ri' ri xtz'ukun chuqa' kichin rik'in ri kite' y junan qabanik xuben chiqe?

¹⁶K'ayew ta chuwe yin wi man ta xento' ri winaqi' ri xa man jun k'o kik'in, o man ta xinto' ri malka'n ixoq ri k'o nik'atzin chire y roma ri' e sipojineq ta chik runaq' taq ruwech roma oq'ej.

¹⁷Kan man jun bey k'a nubanon chi kan xaxe ta wichin yin, ri k'o wik'in richin nintej, xa kan nuya'on k'a chike ri maneq kite-kitata', richin man yewayjan yebe toq nikik'utuj chuwe.

¹⁸Yin, kan k'a pa nuk'ajolil-pe in okineq achi'el kitata' ri ak'uala' ri kan maneq chik kite-kitata'. y kan jantape' k'a in okineq-pe kito'onel ri ixoqi' e malkani'.

¹⁹Toq yin kan xintz'et k'a jun wineq ri xa niken yan roma tew, roma maneq rutziaq, kan xinya' rutziaq ri nik'atzin; toq xintz'et jun molonel ri man jun achoq ik'in nukuch-ri', kan xinya' chuqa' rutziaq ri nik'atzin chire.

²⁰Y rije' kan janila k'a xematioxin, roma xinya' pim y meq'en taq kitziaq ri kan banon rik'in ri rusumal ri nukarne'l yin.

²¹Yin kan man jun k'a ri welesan ta chuwi-kiq'a' ri xa maneq chik kite-kitata', stape' kan wetaman chi kan yinkito' ri yeq'aton-tzij chiri' pan okibel richin ri tinamit.

²²Wi k'o ta welesan chike, xa ketzaq-el ri nuq'a' rik'in ri ruwi-nutele'n xa keq'aj k'a el ri nuq'a' ri kitunun-ki' rik'in ri ruqul ri nuq'a'.

²³Yin kan man yitikir ta ninben keri', roma kan k'o xibinri'il richin ri Dios pa nuk'aslen, roma rija' kan nuya-wi ruk'ayewal; kan man jun k'a yitikir ninben chuwech ri nimalej rubanik ri ruchuq'a' ri Dios.

²⁴Yin kan man k'a xinkuquba' ta nuk'u'x rik'in ri q'anapueq, ri kan k'o-wi rajel, y kan man jun bey ri xinbij ta chirij ri q'anapueq chi kan ninya' ri wánima rik'in.

²⁵Ri nukikoten yin man xpe ta k'a roma ri nubeyomel, chuqa' man xpe ta roma ronojel ri xinch'ek rik'in ri nuq'a'.

²⁶Re' xa kan juba' man junan rik'in toq kan nintzu' ri nisaqirisan ri q'ij, y toq niq'alajin chuqa' ri ik' rik'in ri rusaqil y kan jebel ok nitzu'un,

²⁷yin kan man xinben ta k'a achi'el nikiben ri ch'aqa' chik winaqi' ri pan ewel, y man xintz'ubaj ta ri nuq'a', richin jari' ri ninteq-q'anej chike ri q'ij y ri ik'.

²⁸Wi ta kan xinben keri', kan mak ta chuqa' ri xinben y k'o chi xq'at ta tzij pa nuwi'; roma rik'in jun banobel keri', kan xink'ut ta chi maneq jun nimalej Dios ri k'o pa ruwi' ronojel.

²⁹Yin kan man jun bey xikikot ta chirij ri etzelanel wichin roma k'o pa tijoj-poqonal, kan man utz ta chuqa' xinna' toq xpe wululen chirij.

³⁰Yin kan ninna' wi jebel chi man jun bey ximakun ta rik'in ri waq', roma kan man jun bey xink'utuj ta kamik pa ruwi' ri etzelanel wichin.

³¹Konojel ri nusamajela' kan jebel xewa-xe'uk'ya' wik'in, y man jun xbin chi man ta xnoj rik'in ri ti'ij ri xutej.

³²Kan man jun chuqa' chike ri man e nuwinaq ta, ri xinya' ta q'ij chire chi pa bey ta xwer-wi kan, ri winaqi' ri kan nej kibey y k'o chi xe'uxlan-el, kan jantape' k'a xenk'ul rik'in kikoten ri pa wachoch.

³³Yin kan man jun bey nubanon ta chi wewan numak, achi'el nikiben ch'aqa' chik achi'a', chi wewan ta pa wánima ri itzel taq nubanobal.

³⁴Yin man nuxibin ta wi' chuwech ri achike nikibij ri winaqi', ni man jun bey nutz'apen ta wi' pa wachoch roma ninxibij-wi chire ri nikibij chuwij.

³⁵¡Kan ninrayibej k'a chi k'o ta jun ri nak'axan ronojel ri xinbij! Ronojel re' kan nuch'abel wi yin, y kan pa nubi' k'a yin nibe-wi. Wakami ja ri Dios ri k'o ronojel uchuq'a' pa ruq'a' ri tich'on pa nuwi', ja rija' ri tibanon jun wuj ri nuq'alajirisaj ri nubanon yin.

³⁶Y ri wuj ri' xtinya' chuwi-nutele'n y man xkik'ix ta xtink'uaj, xtintelej k'a el pa nujolon, achi'el ta jun corona ri kan nitz'etetej jebel.

³⁷Y yin kan xtinchol k'a chire ri Dios chikijujunal ri nubinibal chuwech re ruwach'ulew, kan man jun k'a xibinri'il wik'in xkijel-apo chuwech, roma choj ri nuk'aslen.

³⁸Ri wulew kan q'alaj chi man jun bey xe'oq' ta, roma man jun itzel banobel xinben. ri boloj ri ek'o pa wulew kan q'alaj chuqa' chi man xebison ta;

³⁹kan ronojel k'a ri xel chuwech ri wulew, man choj ta keri' xebe'el-pe, kan xentoj ri nusamajela' achi'el ri ruk'amon chi nikich'ek, richin chi man yeken roma wayjal.

⁴⁰Wi man ta keri' xinben, pa ruk'exel chi nel ta pe trigo pa wulew, xa kepe k'a k'ix, y pa ruk'exel cebada, tel k'a pe itzel q'ayis, xcha' ri Job. Ri Job nitane' chi ch'owen.