Read Kaqchikel Job 34 Bible Online

Job 34 - Kaqchikel bible

Job 34

¹Ri Elihú xch'on chic y xubij:

²Tiwak'axaj k'a ri nuch'abel, rix aj-na'oj taq achi'a'; kan jebel k'a tiya' ixikin, rix ri kan k'o etamabel iwik'in.

³Achi'el ri qak'axabal kan nuya' wi kikojolil chikijujunal ri ch'abel, keri' chuqa' ri qaq' kan nuya' kikojolil chikijujunal ri nitij.

⁴Wakami, kan ja roj k'a qojya'on rukojolil ri chojmilal, kan qonojel k'a roj qojetaman ri rukojolil ri utz.

⁵Roma ri Job kan rubin k'a: Yin kan man jun mak nubanon, ri Dios kan relesan k'a chuwe ri chojmilal.

⁶Stape' yin kan choj ri nuk'aslen, xa banon chuwe chi in jun tz'ukuy-tzij. stape' kan maneq numak, re nusokotajik man nutz'apej ta ri' y yiruk'uaj pa kamik, nicha'.

⁷Man jun chik achin achi'el ri Job roma rija' kan nitze'en chirij ri Dios.

⁸Rija' kan junan rubey ruk'uan kik'in ri winaqi' itzel taq kibanobal, y junan nuben kik'in ri achi'a' e aj-maki'.

⁹Ri Job kan rubin k'a: Ri wineq xa man jun nuch'ek chi kan utz nuben chuwech ri Dios, chayineq.

¹⁰Roma ri' rix nowineq taq achi'a', kan kiniwak'axaj k'a: Ri Dios kan man jun bey k'a xtuben ta jun itzel banobel; ri Dios ri k'o ronojel uchuq'a' pa ruq'a' man jun bey xtuben ta jun banobel ri man pa ruchojmilal ta.

¹¹Roma rija' kan nuya' rutojbalil chire ri wineq roma ri rubanik ri rusamaj, kan nuben chuqa' chi niqaqa rutojbalil pa ruwi', ri ruk'amon chi nuk'ul roma ri rubanik ri ruk'aslen.

¹²Kan qetaman k'a ri' chi ri Dios kan man jun etzelal ri nuben ta, ri Dios ri k'o ronojel uchuq'a' pa ruq'a' kan man jun bey k'a nuben ta ri xa man pa ruchojmilal ta.

¹³Kan chuxe' k'a rutzij ri Dios k'o-wi re ruwach'ulew, y pa ruq'a' rija' k'o-wi ronojel ri nikiben ri ek'o chuwech.

¹⁴Roma ri' xa ta nipe pa ránima ri Dios chi nuben chike ri winaqi' chi nroyoj-el ri kánima y nuq'et ri kaq'iq',

¹⁵xa kan konojel k'a pa jun bey yeken-el, y konojel ri winaqi' ri', xa kan xke'ok chik ulew jun bey.

¹⁶Wi rat, Job, kan niq'ax chawech ronojel ri nubin-qa, kan tawak'axaj k'a ri ch'aqa' chik ch'abel ri xtinbij chawe.

¹⁷Xa ta ri Dios man ta niqaqa chuwech ri utzilej ruchojmilal, man ta nitikir ruk'uan jebel re ruwach'ulew rik'in utzilej q'atbel-tzij. Y ¿achike roma toq rat naya' rejqal ri Dios ri kan choj nuben?

¹⁸Roma xaxe k'a ri Dios ri nitikir nibin chire jun q'atoy-tzij: Rat xa maneq awejqalen, xaxe chuqa' rija' ri nitikir nibin chire jun wineq ri kan k'o ruq'ij: Rat xa at aj-mak.

¹⁹Chuwech rija' qonojel oj junan, man xaxe ta kik'in ri achi'a' e tata'al k'o-wi, chuqa' man xaxe ta ri beyoma' ri yeruto', xa kan yeruto' chuqa' ri man jun k'o kik'in, roma kan qonojel roj winaqi' kan ja ri ruq'a' rija' ri banayon qichin.

²⁰Ri wineq xabachike k'a ramaj noqaqa ri kamik rik'in, rik'in juba' pa nik'aj-aq'a', o xabachike ri noqaqa chikij ri chi'aq'a' y xkek'is konojel, ri winaqi' ri kan k'o janila uchuq'a' pa kiq'a' xa xkeken chuqa' y man ruq'a' ta wineq ri xtibano-el chike.

²¹Roma ri Dios kan rutzuliben k'a ri achike rubanik ruk'aslen ri wineq, kan rutzuliben chuqa' chikijujunal ri ruxaka'l ri nuya' chuwech re ruwach'ulew.

²²Ri ruchuq'a' ri ruwech ri Dios, kan maneq k'a q'equ'm ni muj chuwech, roma ri' ri winaqi' ri e banoy taq etzelal kan man yetikir ta nikewaj-ki' chuwech.

²³Ri Dios kan k'a man jani k'a tucha' jun q'ij richin nuq'et-tzij pa kiwi' ri aj-maki', richin chi yebepa'e' chuwech y nuq'et-tzij pa kiwi'.

²⁴Rija' kan man nuk'utuj ta na achike kibanik ri achi'a' ri k'o uchuq'a' pa kiq'a', rija' k'a yerumututej y yerelesaj-el y yeruch'okoba' chik kan ch'aqa' pa kik'exel.

²⁵Roma rija' kan jebel-wi retaman ri achike ri yekiben rije'; chi'aq'a' toq nipe, yerelesaj-el, nuqasaj kiq'ij jumul y man yeq'alajin ta chik.

²⁶Rija' kan nuya' k'a ruk'ayewal pa kiwi' ri itzel taq kibanobal ri akuchi kan yetz'etetej koma konojel winaqi'.

²⁷Ri Dios kan kere' k'a ri nuben chike, roma xa xkich'er kan ki' y man xkitzeqelibej ta chik rija', roma man xkich'ob ta juba' rij ri ruchojmilal ri kik'aslen.

²⁸Rije' kan man xekito' ta ri winaqi' ri man jun k'o kik'in y roma ri' ri koq'ej ri winaqi' ri' xapon k'a rik'in ri Dios; y rija' kan xrak'axaj k'a ri koq'ej ri kan k'o nik'atzin chike.

²⁹Wi ri Dios nik'oje' kan choj keri' y man jun nuben richin yeruto' ri winaqi', ¿k'o kami nitikir nich'ojin chire? Wi ta nrewaj ruwech, ri winaqi' kan man jun chik xtito'on kichin. Rija' kan rutz'uliben k'a stape' ta jun tinamit o xaxe jun wineq.

³⁰Kan ja ri Dios ri nicha'on kichin ri q'atoy taq tzij, y man nuya' ta kan jun ri maneq Dios chuwech. richin chi man yeruya' pa k'ayew ri winaqi'.

³¹¿Abin kami rat chire ri Dios? Yin kan qajineq ruk'ayewal pa nuwi' roma ri numak, y wakami k'a, kan xtintej nuq'ij richin chi man yimakun ta chik.

³²Kan taq'alajirisaj k'a chinuwech ri numak, ri xa man ninna' ta chi nubanon, y wi k'o itzel taq banobel ri e nubanon, kan man xtinben ta chik, at chayineq.

³³Rat, Job, nawajo' chi ri Dios nuya' rutojbalil chawe achi'el ri nawajo' rat, y rat xa man nawajo' ta nitzolin-pe ak'u'x. Y roma kan ja rat ri nawajo' yabin ri achike ri nawajo', y man ja ta yin. Tabij k'a pe chiqe ri nach'ob.

³⁴Roma ri' rix achi'a' ri kan yixtikir niya' rukojolil ri niwak'axaj, kan tibij k'a chuwe, rix ri ix aj-na'oj taq achi'a' kixch'on k'a pe y tibij pe chuwe,

³⁵roma ri Job man rik'in ta etamabel nich'on, ri ruch'abel xa nuq'alajirisaj chi rija' man nich'obon ta jebel.

³⁶Kan k'atzinel chi nich'ob rij jebel chikijujunal ri ch'abel ri yerubij, roma ri ch'abel ri yerubij, xa achi'el kichin ri achi'a' e aj-maki'.

³⁷Roma rija' man xaxe ta k'a jun aj-mak, pa ruwi' ri', rija' kan yakatajineq chirij ri Dios, kan chiqawech k'a roj nretzelaj y nitze'en chirij ri Dios, kan janila nich'on y nich'ojin chire rija'.