Read Kaqchikel Job 35 Bible Online

Job 35 - Kaqchikel bible

Job 35

¹Ri Elihú kan xubij chik k'a chire ri Job:

²¿Nach'ob rat chi kan utz ri xabij chi rat más at choj chuwech ri Dios?

³Roma rat kere' xabij chire ri Dios: ¿Kan yarumej kami rat ri numak yin? Roma xa ja yin ri yinejqalen wi k'o mak ri nubanon.

⁴Wakami k'a, xtink'uluba-apo ri ach'abel y chuqa' kich'abel ri awachibil.

⁵Rat Job, katzu'un na pe el chikaj y tatzu' k'a akuchi k'o-wi ri kaj tatzu-q'anej ri sutz', y xtatz'et chi kan k'a nej k'o-wi el chawe.

⁶Wi rat yamakun, chire ri Dios xa man jun nuben, o wi rat jantape' naq'ej ruwi' ri rutzij ri Dios, rik'in re abanobal re', man jun nuben chire rija'.

⁷Y wi kan ja ri utz naben, chire ri Dios man jun nuk'en-pe, rik'in ri utzilej abanobal rat, ri Dios xa man jun nuk'ul roma ri'.

⁸Jak'a toq rat yamakun, chike ri winaqi' ri e achi'el rat kan itzel nuben, y toq choj ri k'aslen ak'uan, chuqa' chike ri winaqi' ri' kan utz ri nuk'en-pe.

⁹Ri winaqi' xaxe ok toq nipe ruk'ayewal chikij ye'oq', kan nikajo' k'a chi k'o ta jun ri yekolon pa kiq'a' ri yeya'on kichin pa ruk'ayewal.

¹⁰Man rik'in ri' man nikikanoj ta ri Dios ri k'iytisayon kichin, ri nitikir nuben chire jun wineq, chi nibixan stape' k'o chupan ri más q'equ'm chire ri ruk'aslen.

¹¹Ri Dios nitikir chuqa' nuya' más etamabel chire ri wineq, ke chuwech ri ruya'on chike ri chikopi' ri yebiyaj pa ruwi' ulew, y ri aj-xik' taq chikopi'.

¹²Y stape' ek'o winaqi' ri yech'on-q'anej rik'in ri Dios, richin nikik'utuj kito'ik, jak'a ri Dios man yerak'axaj ta, roma rije' kan kinimirisan-ki' chuwech y kan e aj-maki'.

¹³Man nik'atzin ta k'a chi rije' kan rik'in oq'ej yech'on-q'anej rik'in, roma ri Dios ri k'o ronojel uchuq'a' pa ruq'a' kan man xkerutzu' ta y ni man xkerak'axaj ta pe.

¹⁴Stape' rat man natzu' ta ruwech ri Dios, rija' kan yarak'axaj-pe. Ri ach'ojinik kan k'o chik k'a q'anej rik'in rija'; roma ri' rat xaxe k'a tawoyobej ri achike xtuben awik'in.

¹⁵Rat nabij chi ri Dios kan nipe-wi royowal, jak'a xa man nuya' ta rutojbalil ri mak, y man nuya' ta rejqalen ri kibanobal ri e aj-maki'.

¹⁶Rik'in re' niq'alajin chi rat Job, yach'on xaxe richin nabananej, janila k'iy ch'abel ye'abila' y xa man awetaman ta ri achike ye'abila'.