Read Kaqchikel Job 36 Bible Online

Job 36 - Kaqchikel bible

Job 36

¹Ri Elihú kan k'a nich'on na k'a rik'in ri Job y nubij:

²Kinakoch'o' chik juba', roma k'a k'o na ri ninwajo' nink'ut chawech chirij ri Dios, kinawoyobej chik juba' roma k'a ninwajo' na ninbij ri nrajo' ri Dios chi nawetamaj.

³Yin kan xtink'ut k'a chawech ri janipe' etamabel ri k'o wik'in, richin chi tawetamaj chi ri Dios ri banayon wichin, xaxe rija' ri choj.

⁴Y yin kan qitzij k'a ri yich'on, ri nuch'abel man jun q'oloj chupan, roma yin re yich'on awik'in, kan ronojel etamabel ri ya'on-pe chuwe.

⁵Ri Dios kan janila nim, man rik'in ri' man yerumalij ta ri winaqi'; Rija' retaman ri achike nuben, roma janila nim rubanik ri ruchuq'a' ri retamabal.

⁶Rija' kan man nuya' ta q'ij chire ri maneq Dios chuwech, chi jebel nik'ase', jak'a chire ri wineq ri nutej poqon', kan nuya' ri nik'atzin y ri k'o ruq'a' chire.

⁷Kan beneq k'a ruwech yeruchajij ri winaqi' ri choj kik'aslen, kan yeruya-q'anej k'a kik'in ri rey ri ek'o pa taq kitz'uyubal, y kan jantape' k'a nunimirisaj kiq'ij.

⁸Jak'a wi re winaqi' re' nikina' chi e ximil kiq'a-kaqen pa ruk'ayewal, o nikina' chi e ximil roma ri tijoj-poqonal,

⁹jari' toq ri Dios xtuk'ut chikiwech, ri itzel taq kibanobal, roma kan janila xkinimirisaj-q'anej-ki'.

¹⁰K'ari' xtujeq ri kak'axabal, richin chi nikik'ul ri rutzijol ri nuya' chike y nubij chike chi titzolej-pe kik'u'x chire ri itzel taq kibanobal.

¹¹Wi ri winaqi' ri' kan nikak'axaj ri nibix chike y kan nikisamajij ri Dios, kan xkebe k'a pa jotol, chupan ri q'ij richin ri kik'aslen, kan rik'in kikoten xtikiq'axaj-el ri kijuna' chuwech re ruwach'ulew.

¹²Jak'a wi man nikak'axaj ta ri rutzijol ri niya'ox chike, roma ri' rije' xke'el-el chuwech re ruwach'ulew pa ruq'a' jun k'ayewalej kamik, roma man xketamaj ta xek'ase' achi'el ri xbix chike.

¹³Ri winaqi' ri maneq Dios chikiwech, kan nitike' ri koyowal ri pa taq kánima, y stape' ek'o pa ruk'ayewal, man nikik'utuj ta kito'ik chire ri Dios.

¹⁴Re winaqi' re' kan k'a e k'ajola' na yeken-el, nikik'uaj jun k'ixbel k'aslen, achi'el xa ta e kachibil ri yeya'on ruq'ij jun dios rik'in ri kich'akul, y keri' yeken-el.

¹⁵Ri Dios kan nukusaj k'a ri tijoj-poqonal richin chi nukol ri wineq, k'iy ruk'ayewal yeruya' pa rubey richin chi tik'astej y tutzu' ri akuchi k'o-wi.

¹⁶Y ri Dios xarukol-pe, rat Job, chupan ri ruk'ayewal ri akuchi xak'oje-wi, xaruya' pa kikoten, y k'ari' xana' chi kan utz atk'o; ri pa ruwi' ri a-mesa kan xenuk'e' ronojel ri xk'atzin chawe.

¹⁷Jak'a re wakami xa xq'at-tzij pan awi', roma ri ralal ri mak ri e abanalon.

¹⁸Kan tachajij k'a awi', richin chi man yapuaqix, chuqa' man taya' q'ij chi man yatzaq pa ruq'a' ri beyomel.

¹⁹Man nach'ob chi roma ri araqoj-chi'ij, yatak'axex, y chi ri aq'ij y ri awuchuq'a' xkarukol.

²⁰Man tarayij chi nok yan pe ri aq'a' toq yechap ri tinamit, y ri winaqi' yek'is jumul.

²¹Rat xa tachajij-awi', richin man yatzolin ta chik chupan ri itzel banobel; jak'a rat xa jare' ri acha'on chik y man ja ta ri yak'oje' pa tijoj-poqonal.

²²Ri Dios ja rija' ri tijonel ri más ruchuq'a' k'o, kan man jun chik tijonel ri nitikir ta nujunamaj-ri' rik'in rija'.

²³Kan man jun wi k'a ri nitikir ta nik'utu chuwech ri Dios ri achike ruk'amon chi nuben; chuqa' kan man jun ri nitikir ta nibin chire: Re' xa man ja' ta rubanik xaben chire.

²⁴Kan toqaqa k'a chi'ak'u'x rat chi nanimirisaj ruq'ij ri Dios, roma ri nima'q taq rubanobal, kan achi'el ri kibanalon-pe ri wineq, ojer ri'.

²⁵Konojel ri winaqi' kan kitz'eton k'a ri rusamaj ri rubanon ri Dios, ri winaqi' kan nikitz'et-wi stape' ta k'a nej ri nikitz'et-apo ri rusamaj.

²⁶Ri Dios kan nik'o ruwi' nim, y ri qach'obonik roj man nuq'i' ta nuch'ob ri rubanik rija', ni man yojtikir ta niqach'ob akuchi tikerineq-pe ri ruk'aslen, ni ri janipe' chik rujuna' rija'.

²⁷Ri Dios kan nuben chi niyakatej ri ruxla' ri ya' y nibek'oje-el chuwech ri kaj, y toq ri sutz' ri' nikitunula-ki', jari' ri nok job.

²⁸Ri sutz' ri' nuya-pe ya' y niqaqa-pe; y ri job ri' kan nich'orin k'a niqaqa pa kiwi' konojel winaqi'.

²⁹Kan man jun k'a wineq ri niq'ax ta chuwech ri nuben ri Dios, richin chi ri sutz' nibiyin chuwech ri kaj, ni man jun wineq ri niq'ax ta chuwech, toq ri Dios nuben chi niq'ax ri ruch'abel ri koqolajay chupan ri kaj, ri akuchi k'o-wi rija'.

³⁰Ri koyopa' ri nuben rija', kan nusaqirisaj ri ruwi' ri palou, jak'a ri akuchi k'o-wi-qa ri ruxe' ri palou xa nik'oje' kan pa q'equ'm.

³¹Ri Dios rik'in ri nuteq-pe janila chi job, nuq'et-tzij pa kiwi' ri winaqi', y rik'in chuqa' ri job yerutzuq ri winaqi' ri'.

³²Rija' kan yerumoq'ej k'a ri koyopa' ri pa taq ruq'a' k'ari' nuben chike chi keqaqa ri akuchi nubij-wi rija'.

³³Ri koqolajay nuya' rutzijol chi peteneq jun nimalej kaq'iq'-job, y ri chikopi' kan ketaman chi ri kaq'iq'-job noqaqa yan.