Read Kaqchikel Job 38 Bible Online

Job 38 - Kaqchikel bible

Job 38

¹K'ari' ri Jehová xch'on-pe rik'in ri Job chupan jun surkum y xubij chire:

²¿At achike k'a rat richin chi nach'ob chi ri nuq'atbel-tzij yin xa man utz ta? Rat xaxe yach'on y man awetaman ta ri achike ninch'ob yin.

³Wakami k'a, kan at achin kapa'e-pe chinuwech; roma yin k'o ri xtink'utula' chawe y rat kan xtaq'alajirisaj chinuwech ri ninwajo' ninwetamaj.

⁴¿Akuchi atk'o-wi rat, toq yin xinben re ruwach'ulew? wi rat k'iy awetaman, kan taq'alajirisaj k'a chinuwech.

⁵¿Awetaman rat achike ri xch'obon, janipe' rubanik nuben chire ri ruwach'ulew? ¿Awetaman achike xuk'uan ri rutza'n ri k'an richin xetex?

⁶¿Achoq pa ruwi' tz'uyul-wi ri rupalibal re ruwach'ulew? y ¿achike xya'on-qa ri abej ri kow chapayon ri pa taq rutza'n re ruwach'ulew?

⁷Y rokik yin yinajin chubanik ri samaj ri', ri ch'umila' ri e q'alaj nimaq'a' yebixan k'a, y keri' chuqa' konojel ri ángel ri ek'o wik'in, kan yekikot k'a janila.

⁸¿Awetaman kami rat achike xbanon chi ri palou xtz'ape' kan pa ruk'ojelibal, richin man nel ta pe chiri', toq kan nibulbu'x xel-pe pa ruk'u'x re ruwach'ulew y xunojisaj ri ruwi'?

⁹Re palou re' kan xinya' k'a rutziaq y ri' ja ri sutz', kan xinya' chuqa' ximibel-rupan y ri' ja ri q'equ'm.

¹⁰¿Akuchi k'a atk'o-wi rat toq yin xinchojmirisaj kan ri ruk'ulba't ri palou toq yin kan xintz'apej kan ri ruchi', richin man nel ta pe?

¹¹Y yin kan xich'on k'a rik'in ri palou y xinbij chire: Rat xaxe k'a wawe' ri utz yatoqaqa-wi y man xkaq'ax ta el, xaxe k'a wawe' xtorupaxij-ri' ri ruwi-ya' ri nibolqo't, xicha' chire.

¹²¿Rat, Job k'o kami jun bey chupan ri ak'aslen abanon chi roma ri atzij rat roma ri' xseqer-q'anej? ¿O abin ta kami chire ri saqil richin ri nimaq'a' yan chi ja ri chiri' k'o-wi ri ruk'ojelibal,

¹³o kan yatikir ta chuqa' nasaqirisaj ruchi' chijun re ruwach'ulew, y rik'in ri saqil yatikir naben chike ri banoy etzelal, chi nibekewaj ki' pa q'equ'm?

¹⁴Toq nibek'ulun-pe ri rusaqil ri q'ij, kan jebel yeq'alajin-pe ri juyu' y ri kojol taq juyu', kan jebel nibeq'alajin-pe achi'el nuwiq-ri' rik'in jun tzieq ri jebel ok.

¹⁵Ri rusaqil ri q'ij man nuya' ta q'ij chike ri maneq Dios chikiwech chi nikiben ri nikajo'.

¹⁶¿Rat Job, at beneq kami chuxe' qa ri palou, ri k'a akuchi nalex-wi-pe? ¿Kan at qajineq-qa k'a chuxe' richin nawetamaj ri rubanik?

¹⁷¿Awetaman akuchi k'o-wi ri okibel richin ri kamik? ¿Atz'eton chik kami rat ri q'equ'm richin ri jul ri'?

¹⁸¿Kan ach'obon k'a ri achike rubanik re ruwach'ulew y ri k'a akuchi napon-wi? wi kan awetaman ronojel, tatzijoj k'a chuwe.

¹⁹¿Awetaman rat ri bey ri nuk'uan k'a akuchi k'o-wi ri rachoch ri saqil, akuchi k'o-wi ruk'ojelibal ri q'equ'm?

²⁰¿Yatikir kami rat nak'uaj ri saqil y ri q'equ'm k'a akuchi k'o-wi ri kachoch? ¿Awetaman kami rat ri bey ri napon k'a akuchi ek'o-wi rije'?

²¹Wi rat Job, awetaman ronojel re', xa atk'o chik k'a rat toq yin xinben ronojel, wi keri' xa kan janila chik k'iy juna' atk'o-pe pa ruwi' re ruwach'ulew.

²²¿At apowineq rat ri akuchi nuyakon-wi yin ri pimilej-tew, y atz'eton kami ri akuchi nuyakon-wi ri saqboch,

²³ri e nuyakon richin ri q'ij richin tijoj-poqonal, y e nuyakon richin ri q'ij richin ri labal y toq nikichop-ki' chi kamik ri tinamit?

²⁴¿Awetaman chik achike bey nuk'uaj ri saqil toq nutaluj-ri', y awetaman akuchi k'o-wi ruk'ojelibal ri kaq'iq' ri nitiker-pe pa relebel-q'ij y nutaluj ri' pa ruwi' re ruwach'ulew?

²⁵¿Awetaman rat achike ri nijaqon-pe ri job richin chi niqaqa-pe, y achike nibanon ri rubey ri koqolajay?

²⁶¿Awetaman chi ri job kan nuya'aj ri ulew ri akuchi xa e maneq winaqi', kan nuch'eqeba' k'a ruwi' ri tz'iran ruwach'ulew,

²⁷y kan nuya'aj-wi jebel chaqi'j ulew, ri man jun nuya', y kan nuben chi yebejinijo-pe q'ayis?

²⁸¿Achike kami tata'aj pa ruwi' ri job, y ri taq tz'uj richin ri raxq'ab ri niqaqa-pe pa ruwi' re ruwach'ulew?

²⁹¿Achike kami xalan richin ri ya' ri nikowir?

³⁰¿Achike kami nibanon chi ri ya' nikowir achi'el abej, y chi nikowir ruwi' ri palou?

³¹¿Yatikir kami rat ye'axim ri tzobaj ch'umila' ri nibix pléyades chike? ¿Yatikir kami ye'ach'er ri ch'umila' ri nibix Orión chike?

³²¿Yatikir kami rat naben chike ri ch'umila' chi kan ja toq ruk'amon jari' yebek'ulun-pe? ¿Yatikir nak'uaj kibey ri tzobaj ch'umila' kibini'an nima-osa y ri ko'ol-osa?

³³¿Awetaman rat ri chojmilal, ri uk'uayon kichin konojel ri ek'o chupan ri kaj? ¿Ja rat ri yaya'on ri chojmilal pa ruwi' re ruwach'ulew?

³⁴¿Yatikir kami rat chi kan yach'on-q'anej chire ri sutz' chi tuya-pe job, richin chi ri job ri' kan numuba' jebel ri ulew y kan nik'iy-q'anej?

³⁵¿Yatikir naben chire ri koyopa' chi tibe y tiqaqa akuchi nawajo-wi rat? y toq kan yach'on rik'in ri koyopa' ri', ¿kan nubij kami chawe chi jari' k'o chiri' y achike nawajo' chi nuben?

³⁶¿Awetaman rat Job, achike chi na'oj nibanon chire ri awánima chi nisamej jebel, y achike xya'on ri ch'obonik chire ri anojibal?

³⁷¿K'o kami jun ri kan k'o na'oj rik'in richin nitikir yerajlaj janipe' sutz' ri k'o chikaj? ¿K'o ta kami chuqa' jun ri kan nitikir nuben chike ri sutz' chi nibekiq'eja-pe ri job,

³⁸y richin chi toq niqaqa-pe ri job ri' ri poqolaj niqaqa ruwi' y nubajij-ri' jebel; chi ri k'olok'eq ulew nikichop-ki' jebel, y nikowir ruwi' ri ulew?

³⁹¿Ja kami rat yatel pa kanonik, richin natzuq ri ixoq koj, richin ye'atzuq ri taq alaji' koj y man yewayjan ta?

⁴⁰¿Yatikir kami rat naben chike ri koj richin chi yebe pa taq kijul y yejupe' chiri', richin nikewaj-ki', richin yeberopin-pe chikij ri chikopi' richin yekik'ux?

⁴¹Rat Job, ¿yatikir kami ye'atzuq ri qo'ch? Roma ri taq alaji' xa kow yeq'ajan y chuwe yin nikik'utuj-wi kiway. Rije' kan yebe-kela' yebe-kela' nikiben roma maneq kiway.