Read Kaqchikel Job 4 Bible Online

Job 4 - Kaqchikel bible

Job 4

¹K'ari' ri Elifaz aj-Temán xch'on-apo chire ri Job y xubij:

²Yin ninch'ob chi man utz ta xtana' ri yich'on-apo awik'in. Jak'a xa man ruk'amon ta chi ri ch'abel ri nuk'amon-pe pa wánima nitzolin chik el wik'in.

³Rat kan e k'iy k'a winaqi' ri e ato'on-pe rik'in tijonik, y ri maneq chik kuchuq'a' kan xe'ato' richin xk'oje' chik el kuchuq'a'.

⁴Rat kan rik'in ri ach'abel xe'atemela-wi toq xa yetzaq yan, y xaya' ruchuq'a' ri kaqen ri xa e lawaleq chik.

⁵Y re wakami toq xa ja rat ri atk'o chupan ri tijoj-poqonal, namalij ak'u'x. Toq xawil re tijoj-poqonal re' xa nisach ak'u'x.

⁶Rat kan kuqul-pe ak'u'x roma kan k'o rukiy ri Dios chawech. Rat kan k'o pe oyobenri'il pan ak'aslen, roma kan tz'aqet-wi rubanik ri ak'aslen.

⁷Wakami kan tach'obo' k'a jebel; ¿Banatajineq kami chi jun wineq ri man jun rumak nikamisex ta roma ri'? Ó ¿Banatajineq ta kami chi ri choj kik'aslen nelesex ta el kik'aslen?

⁸Roma ri nutz'eton chupan ri nuk'aslen yin, chi ja ri yetiko etzelal y ri yetiko oyowal, jari' ri nibanon chike chi k'o nikik'uluwachij.

⁹Y ja winaqi' re' ri xkerukamisaj ri Dios rik'in ri kaq'iq' ri nel-pe pa ruchi'; y kan xkeruk'is k'a el jumul rik'in ri xkeruxupuj-el rik'in royowal.

¹⁰Ri Dios kan xkeruk'is k'a ri achi'a', stape' kan yexibin achi'el nixibin jun koj toq niq'ajan y nureq ruchi'. Kan xtuben chike achi'el niban chire jun alaj koj; nitz'oq-el ri rey richin man jun chik nuben.

¹¹Ri achi'a' ri' kan xkeken k'a achi'el niken jun rijlej koj roma man nril ta chik ruway. Ri kalk'ual xketalutej-el, achi'el xketalutej-el ri alaji' taq koj chuwech ri kite', xcha' ri Elifaz.

¹²Jun chi'aq'a', pa nuwaran k'o k'a jun ri xbix chuwe pa ja's, y stape' man kan ta jebel q'alaj, kan k'o ri xinwak'axaj.

¹³Chupan k'a ri chi'aq'a' ri', toq konojel e kamineq chi waran; jari' toq yin xinben ri itzel achik' ri'.

¹⁴Kan xpe k'a jun xibinri'il chuwe y xiruyikikej, y kan xuk'ararej chijun nubaqil.

¹⁵Y xik'o k'a jun itzel kaq'iq' chinupalej, y kan xuben chuwe chi xpe tew chuwij.

¹⁶Xa jun xibinel ajk'a y xpa'e' chiri' chinuwech, jak'a yin man nintz'et ta achike rubanik. Xa achike na y pa'el chiri' chinuwech. Nabey xa man xch'on ta, k'ari', xch'on k'a y xubij:

¹⁷¿Kan k'o kami jun achin ri más choj ke chuwech ri chojmilej Dios? ¿Kan k'o kami chuqa' jun achin ri más ch'ajch'oj chuwech ri xbanon richin?

¹⁸Ri Dios kan man ruya'on ta ránima kik'in ri aj-ruwach'ulew rusamajela'. Y chuqa' kan keri' nuben kik'in ri ángel ri ek'o rik'in chila' chikaj.

¹⁹¡K'atala' chik k'a chi xtuya' ránima rik'in jun wineq ri xa ulew, ri xa man kow ta; ri xa kan tikirel chi nupach'ij, achi'el nuben jun wineq rik'in jun ti palamax!

²⁰Ri ruk'aslen k'a ri wineq xa man richin ta q'asen, xa achi'el ok jun q'ayis ri jebel rubanon ri nimaq'a', y toq nitzaq ri q'ij xa nichaqi'j-qa. Xa jari' xk'is y man jun chik xtinatan richin.

²¹Ri ruk'aslen ri wineq xa niraq'achitej achi'el jun betz'. Nibe y xa man xril ta el ri na'oj; keri' xubij chuwe ri xch'on wik'in.