Read Kaqchikel Job 40 Bible Online

Job 40 - Kaqchikel bible

Job 40

¹Y ri Jehová xubij chik chire ri Job:

²Rat ri nawajo' yach'ojin wik'in yin ri in Dios ri k'o ronojel uchuq'a' pa nuq'a', ¿kan k'a k'o kami ri nawajo' nabij-pe chuwe?, xcha'.

³K'ari' ri Job xuk'uluba-apo ri ruch'abel ri Jehová y xubij:

⁴Yin xa man jun ok ri wetamabal, man ninwajo' ta chi nojin man nojin ri yenbij-apo chawe; xa más utz nintz'apej re nuchi' rik'in re nuq'a'.

⁵Toq yin xich'on, xa xinbij k'a ronojel ri xitikir xinbij. Wakami xa maneq achike ta chik ri xkitikir xtinbij, xcha'.

⁶Y ri Jehová xch'on chik k'a pe rik'in ri Job pa jun nimalej surkum y xubij:

⁷Wakami k'a, rat Job, kan tak'utu' k'a chi at achin, man taxibij-awi', roma yin kan k'o k'a xtink'utuj chawe y rat xtak'uluba-pe ri nuch'abel.

⁸¿Achike roma toq rat nabij chi ri nuq'atbel-tzij yin xa man utz ta ri nuk'en-pe, y xaxe richin chi niq'alajin chi rat xa man at aj-mak ta?

⁹¿Kan nawajo' nak'ut chi ri aq'a' rat kan k'o-wi ruchuq'a' achi'el ruchuq'a' ri nuq'a' yin? ¿Kan nawajo' nak'ut chi ri ach'abel rat kan niwajin achi'el niwajin ri nuch'abel yin?

¹⁰Wi keri', kan tak'utu' k'a chi k'o aq'ij y k'o chuqa' ak'ojlen. Kan tabana' k'a chi niq'alajin ri ak'aslen chi k'o ruchuq'a' y niyik'lun ri rusaqil achi'el ri wichin yin.

¹¹Wi rat kan najunamaj-awi' wik'in, kan taya' q'ij chi niq'alajin ri nimalej awoyowal kan katzu'un k'a pa kiwi' ri kan nikina' chi nima'q kiq'ij y taqasaj kiq'ij jumul.

¹²Kan katzu'un pa kiwi' ri kan nikina' chi nima'q kiq'ij y ke'aqasaj-pe ri akuchi ek'o-wi, Ri aj-maki' kan ke'ake'ej jumul, ri akuchi xke'awil-wi.

¹³Y ri nim kiq'ij y ri e aj-maki' ri' kan junan k'a ke'amuqu' kan ri pan ulew, kan tabana' chike chi ketz'ape' kan ri pa q'equ'm ri akuchi ek'o-wi ri kaminaqi'.

¹⁴Wi rat Job kan yatikir naben ronojel re', ja yin nabey ri xkinimirisan aq'ij, roma ri ruchuq'a' ri awijkiq'a' rat, kan nuben chawe chi kan at junan wik'in yin.

¹⁵Tatz'eta' chi ri hipopótamo ja yin ri xibanon richin; keri' chuqa' rat ja yin xibanon awichin. Jak'a ri hipopótamo, q'os ri ruway, achi'el ri ruwaybal ri bóyix.

¹⁶Tatzu' chi ri chikop ri' kan janila ruchuq'a' ri rij racheq, ri xerupan kan jebel niq'alajin chi janila ruchuq'a'.

¹⁷Ri rujey kan kow-kow achi'el ri tiox-che', y ri paten-iboch' ri e chapayon ri raqen, kan jebel kichapalon-ki'.

¹⁸Ri rubaqil achi'el kibanik ri bolobeq q'enq'oj-pueq, ri e ruq'a-raqen achi'el kibanik bolobeq q'eqapueq.

¹⁹Jare' ri chikop ri nabey xinben yin, chire ri ronojel ri nusamaj, y kan xaxe yin ri yitikir ninqasaj ruq'ij.

²⁰Y ri pa taq juyu' k'o q'os nuya' richin chi chiri' niwa-wi ri chikop ri', ri chuwi' taq juyu', akuchi ye'anin y yetzok'lan-wi ri ch'aqa' chik chikopi', roma ri kikoten.

²¹Rija' nik'oje' chuxe' ri rumujal ri q'ayis lóto, kan nrewaj-ri' chukojol ri pop y ri pa taq ch'abeq ri ek'o chuchi' taq ya'.

²²Kan ja wi k'a ri rumujal ri lóto ri nik'oje' pa ruwi'; y ri lama' ri yek'iy chuchi' taq ya', jari' ri yesutin rij.

²³Y toq ri raqen-ya' ninimer, man nuxibij ta ri' stape' ri raqen-ya' Jordán nibusku'l napon ri chi rutza'n, kan man jun numey.

²⁴¿K'o kami jun ri nitikir nuchob y numoyirisaj ri chikop ri'? ¿K'o kami jun ri nitikir nichapo richin, rik'in jun ch'ich' ri nuju' chi rutza'n?