Read Kaqchikel Job 41 Bible Online

Job 41 - Kaqchikel bible

Job 41

¹Rat Job, ¿kan yatikir kami nachop ri chikop cocodrilo,*f2* rik'in ri ti baq chapbel ker? ¿O yatikir kami naxim ri ruchi' rik'in jun kolo'?

²¿Yatikir rat naq'axaj jun kolo' pa rujulil ri rutza'n ri chikop ri'? ¿O yatikir naq'axaj jun ch'ich' chupan ri rukaxtate'?*f3*

³¿Xtuk'utuj kami utzil chawe rat chi utz tabana' rik'in? ¿Xtich'on kami awik'in rik'in ch'uch'uj y ki' taq ch'abel richin chi tajoyowaj ruwech?

⁴¿Xtubij kami chawe chi nuya' rutzij, chi rija' kan xkarusamajij chupan chijun ri ruk'aslen?

⁵¿Xkatikir kami xtaxim betz' chi raqen, achi'el naben chire jun ti tz'ikin richin nawetz'abe'j? ¿Utz kami chi naya' chire jun xten, richin chi tuchajij ri chikop ri'?

⁶¿Yetikir kami ri winaqi' nikiqasaj ri rajel ri pa k'ayibel? ¿Nikiqupij kami richin nikik'ayij?

⁷¿Yatikir kami rat nach'ik ri kum chupan ri rutz'umal? ¿Yatikir nach'ik pa ruwi' rija', jun achi'el kum, kamisabel ker?

⁸Wi ta rat nachop ri chikop ri', niyakatej chawij chi oyowal. Xtawetamaj y man jun bey xtamestaj; y man jun bey chik xtajeluj ri aq'a' chirij.

⁹Roma xaxe rik'in xtatzu' ri chikop ri', xtak'en rukiy, y roma ri' xabachike wineq niken roma xibinri'il chuwech.

¹⁰Y wi man jun wineq ri nitikir ta nupaba-ri' chuwech ri chikop ri', k'a ta la' chik nupaba' ta ri' jun wineq chinuwech yin ri in Dios.

¹¹Kan man jun k'a wineq ri k'o ta pe nabey chinuwech yin, richin chi kan ruk'amon ta chi k'o nuk'as rik'in. xa kan ronojel k'a ri k'o chuwech chijun re ruwach'ulew, kan ja yin ri ink'o pa ruwi'.

¹²Wakami kan xkich'on chuqa' chirij ri kibanik ri raqen ri cocodrilo, xkich'on chirij ri kuchuq'a' ri raqen y chuqa' chirij ri achike kibanik yetzu'un ri raqen.

¹³Y kan man jun k'a wineq ri nitikir ta nich'olo ri pimilej y kowilej rutz'umal ri k'o chirij, kan man jun ri nitikir ta nijel-apo rik'in richin chi nuya' ri rubosal.

¹⁴¿Kan k'o ta kami jun wineq ri man nuxibij ta ri' nujoq' pa ruchi' ri chikop ri', ri akuchi e cholan-wi ri kamisanel y xibinel taq rey?

¹⁵Ri rutz'umal richin ri chirij kan pim-pim, Yecholol rusolotal chirij ri janila e kow ri e achi'el baq.

¹⁶Ri rusolotal ri ek'o chupan ri rutz'umal ri chikop ri', kan kojqalon-ki' jebel, kan man jun k'a kikojol y roma ri' kan niq'alajin chi ni ta ri kaq'iq' niq'ax chikikojol.

¹⁷Kan kitunulun-ki' jebel ri solotal ri', kow kichapalon-ki' y man tikirel ta chi nikisq'opela-ki'.

¹⁸Y toq nat'ixem ri chikop ri', kan jun saqil k'a ri niq'alajin chi nel-pe ri pa rutza'n, y ri runaq' taq ruwech kan e keq e keq achi'el toq nel-pe ri q'ij, ri nimaq'a'.

¹⁹Ri pa ruchi' kan q'aq' ri niq'alajin chi nel-pe, chuqa' kan niq'alajin chi jun koyopa' ri nel-pe ri pa ruchi'.

²⁰Y ri pa rutza'n k'a ri chikop ri' kan sib k'a ri niq'alajin chi nel-pe, achi'el ri ruxla' ri ya' ri nel-pe pa jun bojo'y ri niroqo pa ruwi' q'aq'.

²¹Xaxe rik'in ri ruq'aq'al ri kaq'iq' ri nel-pe pa ruchi', ri aq'a'l yek'a'on-q'anej, y ri pa ruchi' kan nimalej taq ruxaq-q'aq' ri ye'el-pe.

²²Ri ruchuq'a' ri chikop ri' kan ja ri chirij ruwi' k'o-wi, y xabachike k'a wineq ri niberuk'ulu-pe-ri' rik'in, re wineq re' nuxibij-ri' janila.

²³Ri rutijul rija', achi'el yochoyik nitzu'un y toq nikijik'-ki', kan che-che' nikiben y kan man yesilon ta.

²⁴Ri ránima ri chikop ri', kan janila rukowil, achi'el rukowil jun abej, kan janila kow achi'el ri abej jok'bel-trigo.

²⁵Y toq rija' nibepa'e-pe, ri achi'a' ri kan más kuchuq'a' kan nikixibij-ki' y roma ri' rije' junanin ye'animej-el chuwech.

²⁶Roma kan man jun k'a kamisabel ri nitikir ta nisokon richin y nukamisaj ta, ni ta ri espada, ni ta ri ch'ab y ni ta chuqa' ri kum ri nim y ko'ol raqen, kan man jun ri nitikir ta chirij.

²⁷Chuwech ri chikop ri' ri kamisabel banon rik'in q'eqapueq, xa achi'el ok k'im, y ri kamisabel ri banon rik'in ri q'enq'oj-pueq, xa achi'el che' q'uma'r chik.

²⁸Toq rija' nik'aq chi ch'ab, kan man nuxibij ta el juba' y nanimej ta, y toq nik'aq chi ikeq', ri abej kan man jun ri nuben chire, xa achi'el ok páxa chuwech rija'.

²⁹Wi k'o jun ri niya'on jun che' chire, chuwech rija' xa man jun ok, xa achi'el q'ayis ri nitzaq chirij y toq nik'aq ri ko'ol kum chirij, man niniman ta chire, xa achi'el nitze'en chirij.

³⁰Ri xerupan ri chikop ri' kan k'o rey, ri baq ri', achi'el kibanik ruchi' xot, rija' kan nujososej-el ruwi' ri ulew, achi'el nuben ri rastrillo.

³¹Y toq rija' nibe chuxe' ya', achi'el xa ta niroqo ri ya' niq'alajin; toq nisilon k'a ri ya' ri', nuben achi'el ri jubulej aq'om toq niroqo chupan ri ruk'ojelibal.

³²Y jak'a toq rija' nibe pa ruwi' ri ya', kan nuben kan rubey y nich'ich'an nitzu'un; ri woqoq ri' kan lox-lox k'a nitzu'un, achi'el ri rusumal-wi'aj ri seq chik.

³³Kan man jun chik k'a chikop chuwech re ruwach'ulew ri achi'el ta rija'; roma rija' kan xban chire chi man jun xibinri'il chuwech.

³⁴Chike konojel chikopi' ri maneq xibinri'il chikiwech, ja rija' ri más rejqalen; chikikojol ri k'uxunela' taq chikopi', ja rija' ri rey, xcha' ri Dios chire ri Job.