Read Kaqchikel Job 5 Bible Online

Job 5 - Kaqchikel bible

Job 5

¹Wakami k'a Job, kan kasik'in k'a richin nak'utuj to'onik; rik'in juba' roma ri kan nakanoj ri achike nito'on awichin, k'o ta jun ángel ri nik'uluban-pe ri ach'abel ri chila' chikaj.

²Kan qitzij na wi chi ri chi'anin niyakatej royowal jari' ri nikamisan-el richin, y ri k'o rayinik rik'in jari' chuqa' ri nikamisan-el richin.

³Yin nutz'eton k'a chi ri k'o rayinik rik'in, kan rujikiban-qa-ri' chupan ri rachoch, y xa jari' toq ri Dios nuya-pe ruk'ayewal pa ruwi' ri rachoch.

⁴Roma ri' ri ralk'ual kan man jun xtito'on kichin; kan xkeya'ox k'a pa tijoj-poqonal ri chiri' chuchi' ri tinamit, y kan man jun k'a xtikolon kichin.

⁵Y ri ruwech ri kitiko'n, ja ri winaqi' ri k'o kiwayjal ri xkek'ison, y stape' chukojol k'ix k'o-wi xtikelesaj-el richin nikik'uaj. Ri winaqi' ri k'o rayinik kik'in xtikik'uaj k'a el; y ri winaqi' ri nik'at kánima chirij ri beyomel xtikik'uaj-el ronojel.

⁶Kan man ja ta k'a ri ulew richin tiko'n ri niya'on-pe ri tijoj-poqonal ni ri ruwach'ulew man nuwachij ta pe ri ruk'ayewal ri nipe chirij jun wineq.

⁷Ri wineq kan nalex k'a chuwech re ruwach'ulew richin chi nutej poqon kan junan k'a rik'in ri rubix q'aq' ri kan k'o chi niyakatej pa kaq'iq'.

⁸Xa ta yin yik'owisan ronojel ri'. Yin kan ninkanoj ta ri Dios, y kan ninya' ta pa ruq'a' rija' ronojel ri poqonal ri nink'owisaj.

⁹Kan pa ruq'a' ta ri Dios ninjech-wi, roma rija' kan yeruben nima'q taq banobel ri man yeq'ax ta chiqawech, y kan meyel taq banobel ri yeruben, y man e ajlatel ta.

¹⁰Ja rija' ri niya'on-pe ri job pa ruwi' ri ruwach'ulew. Nuteq k'a pe ri ya' pa ruwi' ri ulew ri yetikonej chuwech.

¹¹Ri winaqi' ri xa man jun ok kejqalen, rija' nuya-q'anej kiq'ij, y ri yebison kan nukuquba' kik'u'x.

¹²Rija' nuyoj ri kinojin nikiben ri itzel taq achi'a', nuben chike chi man jun yetikir nikiben chire ri kich'obon.

¹³Rija' kan nuben k'a chike ri aj-na'oj chi yetzaq chupan ri yekinojij, y ri kinojin richin nikiben xa man nichojmir ta chikiwech.

¹⁴Y stape' jebel rubanon ri rusaqil ri q'ij, chikiwech rije' xa q'equ'm; rije' yemaqeq yebiyin ri pa nik'aj-q'ij, achi'el xa ta chi'aq'a'.

¹⁵Kere' rubanik nuben ri Dios richin yerukol ri nikitej poqon koma ri achi'a' ri'. Kan yerukol ri meba' taq winaqi' pa kiq'a' ri beyoma'.

¹⁶Rik'in ri keri' ri winaqi' ri maneq ok kejqalen xa xtitzolin chik pe ri oyobenri'il chupan ri kik'aslen, y ri man pa ruchojmilal ta e banon-pe xa xkechame'.

¹⁷Jebel ruwa-ruq'ij ri wineq ri nijich'ex roma ri Dios; roma ri', rat Job, kan tak'ulu' ri tijoj-poqonal ri nuya' ri Dios chawe, ri Dios ri k'o ronojel uchuq'a' pa ruq'a'.

¹⁸Roma rija' nisokon, y nupis chuqa' ri sokotajik; rija' nich'ayon rik'in tijoj-poqonal y nuya' ri raq'omal.

¹⁹Ronojel mul xkarukol chuwech ri ruk'ayewal, y man xtuya' ta q'ij chi ri etzelal xtapon awik'in.

²⁰Toq k'o wayjal man xtuya' ta q'ij richin chi yaken, y toq k'o labal xkaruto' chuwech ri kamik.

²¹Rija' xtuya' jun atobal richin chi ri itzel nich'on chawij, man jun nuben chawe; y man xtaxibij ta awi' toq xkatapon chuwech jun wululen.

²²Y man xkaniman ta chire toq xtipe jun wayjal o jun tijoj-poqonal, y man xtaxibij ta awi' chikiwech ri k'uxunela' taq chikopi'.

²³Ri abej ri ek'o pan awulew xa xke'ok awachibil; y ri k'uxunela' taq chikopi' kan xke'ok chuqa' awachibil.

²⁴Kan k'o k'a uxlanen awik'in chupan ri awachoch ri banon rik'in tzieq, y toq xtanik'oj achike kibanon ri awawej, xa konojel e tz'aqet.

²⁵Tatz'eta' na pe chi ri awijatzul kan pa ruk'iyal ri xkek'oje'; ri awijatzul ri' kan xkek'iyer achi'el nuben ri q'ayis ri pa juyu'.

²⁶K'iy k'a juna' xkak'ase' y kan k'a k'o na awuchuq'a' toq xkaken; achi'el toq ri trigo q'en-q'en rubanon richin niq'at.

²⁷Roj kan qatz'eton-wi-pe, chi kan keri'. Kan tawak'axaj k'a y re' k'o xtuk'en-pe chawe, xcha'.