Read Kaqchikel Job 6 Bible Online

Job 6 - Kaqchikel bible

Job 6

¹Y xeri' ri Job xuk'uluba' k'a ri rutzij ri Elifaz y xubij:

²Xa ta tikirel nipaj pa jun etabel ri nuq'axo'n, y keri' ta chuqa' niban chire ri ruk'ayewal ri qajineq pa nuwi'.

³Xa más ta yepajon ke chuwech ri sanayi' ri k'o chuchi' ri palou; y xa roma ri' nojin man nojin ri e nubilon.

⁴Kan in sokotajineq k'a roma ri ch'ab ri e richin ri Dios ri k'o ronojel uchuq'a' pa ruq'a'. Ri nuk'aslen kan nuk'ul k'a ri kamisanel aq'om ri ek'o-pe chikitza'n ri ch'ab ri'. Kan ronojel k'a ri xibinri'il ri nuya' ri Dios kan kisutin-wij.

⁵¿Noq' kami pe ri bur, ri richin pa juyu', toq xa kan kojol rex q'os k'o-wi? ¿Noq' kami pe ri bóyix toq xa k'o-apo ri ruq'os chunaqaj?

⁶¿Man niya'ox ta kami atz'an rik'in ri xa yax? ¿Man xex ta kami ri rusaqil ri saqmolo'?

⁷Ri pa nuchi' man nurayij ta ronojel ri'; y wakami xa jari' ri nintej y xa ninyabij.

⁸¡Jebel ta ri' xa ta ri Dios nuya' ta chuwe ri nink'utuj chire; jebel ta ri' xa ta kan nuya' chuwe ri woyoben-pe!

⁹¡Jebel ta ri' xa ta ri Dios nrajo' chi yiruk'is-el jumul; nuyek ta ruq'a' chuwij richin yirelesaj-el jumul!

¹⁰Xa ta keri' nuben wik'in nukuquba' ta nuk'u'x. Nuya' ta kikoten chuwe chupan re nimalej xibinri'il re'; y man ta itzel yan xich'on chirij ri Loq'olej Dios ri yoyon nuk'aslen.

¹¹¿K'o kami akuchi nipe-wi más wuchuq'a' richin ninwoyobej-apo? ¿K'o kami ri nutzuliben-apo richin k'a ninwajo' na yik'ase'?

¹²¿Ri rukowil ri nuk'aslen achi'el kami rukowil ri abej? Y ri rukowil ri nuch'akul, ¿achi'el kami ri rukowil ri q'enq'oj-pueq?

¹³Yin xa maneq chik wuchuq'a' richin yirukol; xa maneq chik uchuq'a' wik'in, xa xk'is yan ronojel.

¹⁴Y ri Job chuqa' xubij: Ri k'o pa tijoj-poqonal kan k'atzinel nikuqubex ruk'u'x koma ri rachibil; stape' maneq chik rukiy ri Dios chuwech.

¹⁵Jak'a rix wach'alal xa xixpiskolin chuwij. Xa ix achi'el ri ya' ri nibiyin ri richin job; xa ix achi'el taq raqen-ya' ri man yeyaloj ta.

¹⁶Xa ix achi'el ri tz'ilolej ya' richin ri tew ri ch'ubneq chik; ri ya' ri' xa jari' ri tew ri ch'ubneq-pe y man q'alaj ta chik.

¹⁷Y toq napon k'a ri q'ij richin saq'ij, jari' toq niyakatej-el. Kan jak'a toq nimeq'e', jari' toq nik'is-el.

¹⁸Yin in junan k'a kik'in ri ula'i' kik'uan ki-camello, ri kimolon-el-ki' e beneq. Nikijel ri kibey richin chi nikil ta kiya', y xa roma ri' yebe más chupan ri tz'iran ruwach'ulew.

¹⁹Ri ula'i' ri yepe chuqa' ri pa Temán kan ja ri ya' ri nikikanoj. Y ri aj-Sabá kan kikuquban kik'u'x kik'in rije' chi nikil ya', y xa man keri' ta nibanatej.

²⁰Jak'a ri aj-Sabá nisach kik'u'x toq ri aj-Temán man nikil ta ya', y xa kan kikuquban kik'u'x kik'in. toq rije' ye'apon kik'in ri aj-Temán, k'ayew nikina' roma man xkil ta ri nikajo'.

²¹Y rix ri ixk'o wik'in wakami xa ix junan kik'in ri aj-Sabá. Xa ixibin-iwi' yinitzu-pe, y niwajo' yiniya' kan nuyon.

²²Jak'a yin k'a man jun ri nuk'utun ta chiwe. Man nuk'utun ta méro chiwe; ni man nuk'utun ta chiwe ri ibeyomel chi'ijujunal.

²³Man nuk'utun ta chuqa' chiwe, chi kinikolo' pa ruq'a' ri etzelanel wichin, ni man nuk'utun ta chiwe chi kinito' pa ruq'a' ri in yoyon pa tijoj-poqonal.

²⁴Kan tik'utu' k'a chinuwech achike man utz ta nubanon, y kan man jun xtinbij. Tik'utu' k'a chinuwech achike mak in qajineq-wi.

²⁵Ri ch'abel ri pa rubeyal yebix-wi kan nujel k'aslen. Jak'a ri ch'abel ri nikusaj rix, xa yiruya' pa q'axo'n.

²⁶Rix xa nich'ob niwetzelaj ri ruch'abel jun ri xa k'o pa q'axo'n, roma chiwech rix ri ch'abel utz tuk'uaj-el kaq'iq'.

²⁷Rix kan in iwichin ibanon chuwe roma man yitikir ta ninto-wi', chuqa' xixpiskolin chuwij yin ri in iwachibil.

²⁸Ri ixk'o wik'in wakami kan titzu' k'a ri nuq'axo'n, tijoyowaj nuwech; y kan xtiwetamaj chi kan man nintz'uk ta tzij chiwech.

²⁹Tijunamatej chik iwech wik'in yin roma yin kan in choj-wi. Tijunamatej k'a iwech wik'in yin, roma yin kan in choj achi'el ri rubanon kan.

³⁰¿K'o kami mak chupan ri nuch'abel ri nubin-qa chiwe? ¿Nich'ob rix chi yin man wetaman ta ri rukojol ri utz y ri itzel?