Read Kaqchikel Job 7 Bible Online

Job 7 - Kaqchikel bible

Job 7

¹Ri ruk'aslen ri wineq chuwech re chuwach'ulew xa kan janila k'ayew. junan rik'in ri ruk'aslen jun achin ri nitijox richin nibe pan oyowal; y kan junan chuqa' ruk'aslen rik'in jun aj-chiq'ij samajel ri k'o chi kow nisamej.

²Ri wineq xa achi'el ri loq'on samajel ri janila nurayij jun muj; y xa achi'el chuqa' ri aj-chiq'ij samajel ri kan royoben chi nuk'ul ri rajel, roma xa roma ri' nisamej.

³Ri k'ayewalej taq ik' ri e nuq'axan-pe xkiben chuwe chi numalin chik nuk'u'x, y ri chi'aq'a' ri e nuq'axalon-pe xa kibanon chuwe chi in jun achin ri man jun wejqalen.

⁴Toq yin yibekotz'e', ninch'ob: K'ate' ta niseqer yan. Jak'a toq yiyakatej ri ruka'n q'ij, rik'in bis ninq'axaj chijun q'ij kan k'a toq niqaqa na qa ri q'ij.

⁵Ri nuch'akul kan q'ayineq chik chijun y k'o k'a ruwech rubanon, ri nutz'umal xa kan yach' chik rubanon roma ri ruya'al ri nuyabil y kan nilojlo-el.

⁶Ri q'ij richin ri nuk'aslen xa juba' chik ok; xa anineq xinapon chuwech ri nukamik, achi'el toq nik'aq-ok ri ruway ri kem y nitzolix chik jun bey; y xa niq'ate' toq nik'is ri betz' chirij ri ti che'.

⁷Nu-Dios yin, toqaqa k'a chi'ak'u'x chi ri nuk'aslen xa achi'el kaq'iq' ri niq'ax; y kan man jun bey chik xtintz'et ri rutzil ri k'aslen.

⁸K'o k'a jun q'ij toq ri e etamayon nuwech man xkinkitz'et ta chik; y rat nu-Dios kan in atzuliben k'a toq yin xkiken-qa.

⁹Ri k'aslen xa achi'el ri sutz' ri xa chi'anin nik'is-el y nibe; keri' k'a nuben ri niken-el y xa pa jul nibek'is-wi;

¹⁰Ri niken-el man jun bey chik xtitzolin chirachoch, y konojel ri xe'etaman ruwech man jun bey chik xtikitz'et, xa xtikimestaj.

¹¹Roma ri', nu-Dios, kan man xkitane' ta k'a richin yich'on; xa kan xtinq'alajirisaj k'a ri q'axo'n ri k'o pa wánima. Kan rik'in k'a bis xkich'on awik'in roma ri nuk'aslen keri' nuben chuwe.

¹²Yin xa man in junan ta rik'in ri palou y rik'in ri nimalej chikop richin ya', richin kan yixibin; jak'a rat xa aya'on kan jun chajinel wichin richin chi man jun ch'a'oj ninben.

¹³Toq yin ninch'ob chi ri pa nuwarabel ninwil uxlanen, y ri nuwaran xtuben chuwe richin yich'uch'u' juba' chire ri nuq'axo'n,

¹⁴xa jari' toq rat kan naya' wachik' ri kan nuya' xibinri'il chuwe. Kan naben chuwe chi yepa'e' ri rusumal taq nuwi' rik'in ri k'o yek'utumej chinuwech.

¹⁵Más ta utz nipitz' chinuqul y yiken; más utz ri kamik ke chuwech re k'aslen re nuk'uluman wakami.

¹⁶Yin kan ninwetzelaj k'a re nuk'aslen; kan man ninrayij ta yik'ase' q'asen rik'in jun k'aslen kere'. Kinaya' k'a kan, roma xa man k'iy ta chik q'ij xkik'ase'.

¹⁷Nimalej Jehová: ¿Achike ta k'a wejqalen yin ri xa in jun achin, richin yinaquqa-pe? ¿In achike ta k'a yin richin yinak'uxla'aj-pe?

¹⁸Y kan aya'on-pe awech chuwij; in atz'elwachin-pe ronojel nimaq'a'. Chuqa' kan yinatejtobej k'iy bey pa jun q'ij.

¹⁹Man tikirel ta kami chi nawelesaj ta juba' ri atzubal pa nuwi', xaxe ta richin yinuxlan juba' chire ri atzubal. Roma yin kan nina' chi man naya' ta q'ij chuwe richin ninbeq' juba' nuchub.

²⁰Wi yin k'o ta numak nubanon chawech, xa ja yin k'ari'. ¿Kan xkarumej kami ri numak yin, rat ri yatikir nanik'oj ri k'o pa ránima ri wineq? ¿Y achike roma ja yin in aq'ijun-pe? ¿Y achike roma in jun ejqa'n chawe rat?

²¹¿Achike roma man yinakuy wi ximakun chawech, y namestaj chi kan in aj-mak-wi? Roma yin xa xkiken-el y xkibe kan pan ulew, y toq rat xkinakanoj, xa in maneq chik, xcha' ri Job.