Read Kaqchikel Job 8 Bible Online

Job 8 - Kaqchikel bible

Job 8

¹Y xeri' ja ri Bildad ri aj-Súah ri xch'on rik'in ri Job y xubij:

²¿K'a janipe' k'a yatane' richin yach'on keri', roma ri ach'abel xa nutukukej ronojel achi'el nuben jun surkum?

³¿Nuben kami ri Dios chi nuxotoba' rubanik ri ruq'atoj-tzij? ¿Nuben kami rija', ri k'o ronojel uchuq'a' pa ruq'a', chi nuxotoba' rubanik ri chojmilal?

⁴Achi'el ta k'a xkiben ri awalk'ual ri', toq rije' xemakun, rija' kan xuya' ri rutojbalil ri kimak.

⁵Ri ruk'amon k'a chi naben rat wakami, ja ri nakanoj to'onik rik'in ri Dios. Kan tak'utuj k'a utzil chire rija' ri k'o ronojel uchuq'a' pa ruq'a' chi karukolo'.

⁶Xa ta rat ch'ajch'oj y choj ri ak'aslen, kan ja yan ta re' nuchop achajixik, y ronojel ta choj nel chawech, roma kan at choj chuwech rija'.

⁷Stape' ri abeyomel pa nabey kan ti juba' ok, ri xtibek'oje' awik'in kan más nim chuwech ri xk'oje' awik'in pa nabey.

⁸Tak'utuj k'a chike ri winaqi' ri achike xkiq'axala' ri sol winaqi' ri xeq'ax yan, kan taquqa' rij ri xkiq'axala' rije'.

⁹Roma roj xa oj richin ok iwir-kabijir k'a man jun ok qetaman, y re qak'aslen chuwech re chuwach'ulew, xa chi'anin niq'ax achi'el niq'ax jun muj.

¹⁰Jak'a ri kina'oj ri ojer taq winaqi' kan k'o ri nikik'ut chawech; kan k'a xkech'on na awik'in rik'in ri ketamabal ri k'o kan.

¹¹¿Nik'iy kami ri pop, ri akuchi xa maneq ch'abeq? ¿Nik'iy kami ri aj ri akuchi xa maneq ya'?

¹²Man rik'in ri' stape' k'a man jani e choyon ta, xa k'a e tikil na y rex kibanon, xa más chi'anin yechaqi'j-qa chikiwech ch'aqa' chik q'ayis.

¹³Kan keri' k'a nikik'uluwachij ri winaqi' ri nikimestaj kan ri Dios; ri kan maneq-wi Dios chikiwech kan man jun chik utz ri xtikoyobej-apo;

¹⁴Xa achi'el jun ti betz' ri oyobenri'il ri k'o kik'in. Chuqa' xa achi'el ok rurach'iyal ri rukem om keri' ri kikuqubabel-k'u'x rije'.

¹⁵Xtikajo' xtikito-ki' chiri', y xa man xtikikoch' ta; xtikajo' xkechake' chirij y man xtikowin ta.

¹⁶Ri itzel taq achi'a' xa e achi'el ri che' ri jebel rex kibanon; jebel kibanon stape' chuwa-q'ij ek'o-wi, y ri kiq'a' k'a nej yebe-wi, kan ye'el pa ruwi' ri qejoj.

¹⁷Ri achi'a' ri' xa e achi'el ri che' ri kan nukem-ri'. Ri kixe' ri pa taq abej kan nikikanoj ri kibey kojol taq abej.

¹⁸Jak'a wi ri che' ri' nik'uq-el ri akuchi xtike-wi, xa kan man xtiq'alajin ta wi xk'oje' chiri'.

¹⁹Keri' k'a ri jun che' ri', xtipune' pa bey y xtiq'ey-qa chiri'; y ri akuchi xtike-wi, kan xkebe'el chik pe ch'aqa' ruwech q'ayis.

²⁰Ri Dios kan man numalij ta kan ri choj ruk'aslen, y chuqa' man yeruyuqej ta ri yebanon etzelal.

²¹Rija' xtuben chawe chi kan xkatze'en, y kan xtuben chawe chi kan xkakikot.

²²Roma ri' ri xke'etzelan awichin kan janila xkek'ixbitej; y ri kixjayilal y ri kalk'ual ri itzel taq achi'a' xa xkek'is.