Read Kaqchikel Sal 10 Bible Online

Sal 10 - Kaqchikel bible

Sal 10

¹Jehová, ¿achike k'a roma k'a nej atk'o-wi, y nawewaj-awi' toq k'o ruk'ayewal?

²Ri banoy etzelal rik'in nimirisanen rutzeqeliben ri k'o pa meba'il. Ri pikbel ri rubanon xa ja rija' ri xtitzaq chupan.

³Kan nikikot k'a rik'in ri rurayibel ri ránima, nikikot chuqa' kik'in ri yebanon etzelal y kan yaretzelaj rat.

⁴Roma nim nuna-ri', kan man yarukanoj ta rat, kan man yarunataj ta k'a chupan ronojel ri nuch'ob.

⁵Man rik'in ri', ronojel ri nuben, utz nel chuwech. Chuwech rija' ri aq'atbel-tzij rat Jehová kan nej k'o-wi. Rija' kan nitze'en k'a chikij ri ye'etzelan richin.

⁶Kan nubij k'a qa pa ránima: Yin man jun xtitzaqon wichin; stape' xtibe-q'ij xtibe-seq, man jun ruk'ayewal xtinwil, nicha-qa.

⁷Ri pa ruchi' kan xaxe etzelanik, yoq'onik y q'oloj k'o; ri ruch'abel kan ruyon tz'ukun-tzij y ya'ol q'axo'n.

⁸Niq'eleben k'a chikinaqaj ri ko'ol taq tinamit; pan ewel k'a yerukamisaj ri maneq kimak; Kan rutzuliben k'a ri man nitikir ta nuto-ri'.

⁹Niq'eleben achi'el nuben jun koj toq k'o pa rusok; chiri' k'a nichajin-pe, royoben chi napon ri wineq pa ruq'a'; y toq k'o chik pa ruq'a', nuk'uaj chupan ri pikbel ri rubanon kan.

¹⁰Ruwononen-ri' y rewan-ri', y kan e k'iy k'a yeqaqa pa ruq'a'.

¹¹K'ari' nubij chik qa pa ránima: Ri Dios xa numestaj ronojel; rija' man nitzu'un ta pe, man jun bey xtutz'et re', nicha-qa.

¹²¡Wakami, kayakatej k'a nimalej Jehová Dios! Tayaka' ri aq'a' y man ke'amestaj ri ek'o pa meba'il.

¹³¿Achi'el toq nakoch' chi yatkixowaj ri e banoy etzelal, y nikibij-qa pa kánima chi rat xa man naq'et ta tzij pa kiwi'?

¹⁴Rat kan atzuliben ri tijoj-poqonal ri nikik'owisaj ri winaqi', kan ach'obon chik richin xke'ato'. Ri man jun nito'on kichin, kan awik'in rat kikuquban-wi kik'u'x; rat kan at to'onel kichin ri meba'i'.

¹⁵Jehová, tawelesaj kuchuq'a' ri e banoy etzelal; kan taya' k'a ri rutojbalil ri kimak, kan man jun mak tik'oje' kan ri maneq ta rutojbalil.

¹⁶¡Jehová, ja rat at qa-rey richin q'asen! ri man yatkitzeqelibej ta, xa xkek'is jumul.

¹⁷Ri kirayibel ri kiqasan-ki' chawech, kan jantape' nawak'axaj; kan naya' ruchuq'a' ri kánima y ye'ato'.

¹⁸Taq'ata-tzij pa kiwi' ri meba'i' y ri yetz'ilox, richin chi ri banoy etzelal man ta chik xtuben etzelal chike.