Read Kaqchikel Sal 102 Bible Online

Sal 102 - Kaqchikel bible

Sal 102

¹Nimalej Jehová tabana' utzil tawak'axaj ri nuch'owen. Toq yin yisik'in-q'anej awik'in kan ta xtawak'axaj.

²Man tawewaj-awi' chinuwech toq yin ink'o pa q'axo'n. Tabana' utzil taya' axikin chire ri nuch'abel. Kan ta chi'anin xtak'uluba-pe ri nuch'abel toq yin yich'on awik'in.

³Ri q'ij richin ri nuk'aslen xa kan chi'anin k'a beneq achi'el nuben ri sib. Ri nubaqil kan achi'el k'a ri rutza'n si' ri k'atineq chik.

⁴Yin kan ninna' chi xinkibech kan chi'aqen, achi'el niban rik'in ri q'ayis toq xchaqi'j yan qa. Roma ri nuq'axo'n kan man jun nuwayjal k'o,

⁵roma ri' kan janila yijilo. Xa kan in baq in baq chik.

⁶Yin xa kan in achi'el chik jun túkur ri ruyon k'o pa tz'iran ruwach'ulew. In achi'el jun túkur ri xa ruyon nik'oje' pa taq jay ri xa e tolan chik kan.

⁷Xa kan maneq k'a nuwaran. In achi'el k'a jun aj-xik' chikop ri ruyon nik'oje' pa ruwi' jay.

⁸Q'ij-q'ij k'a yinkik'ixbisaj ri e etzelanel wichin. Y ja ri nubi' yin nikikusaj richin etzelanik.

⁹Ronojel ri nintej, xa nuxol-ri' rik'in chaj. Y ronojel ri ninqum, xa kan nuxol k'a ri' rik'in ri ruya'al runaq'-nuwech.

¹⁰Ronojel re' nink'owisaj roma ri awoyowal ri yakatajineq chuwij. Rat xinachop richin xinak'eq pan ulew.

¹¹Ri q'ij richin nuk'aslen xa kan achi'el k'a ri muj ri xa niq'ax. Xa kan beneq k'a nuchaqirinen, achi'el jun q'ayis.

¹²Jak'a rat Jehová kan jantape' k'a atk'o tibe-q'ij tibe-seq. Ri utzilej atzijol kan jantape' k'a xtinatex koma ri chi wiq chi tanaj winaqi'.

¹³Ri q'ij richin najoyowaj chik ruwech ri Sión kan xapon k'a. Y kan xtz'aqet yan k'a ri q'ij ri abin-pe. Roma ri' kan xkayakatej k'a pe y xtajoyowaj chik ruwech.

¹⁴Roma ri asamajela' kan janila nikajo' ri atinamit, stape' wulatejineq kan.

¹⁵Toq xtikiben keri', ri winaqi' ri man yatkitzeqelibej ta xtikiqasaj-ki' chawech. Konojel k'a ri rey kan xtikiya' aq'ij.

¹⁶Roma rat kan xtapaba' chik q'anej ri tinamit Sión. Kan k'a chiri' k'a xtiq'alajin-wi-pe ri ak'ojlemal.

¹⁷Xtawak'axaj ri ruch'owen ri asamajel. Kan xtawak'axaj k'a ri kich'abel ri kan man jun nito'on kichin.

¹⁸Ronojel re' k'o chi xtitz'ibatej kan, richin tiketamaj konojel ri sol winaqi' ri e peteneq; richin chi ri winaqi' ri xkebe'alex kan xtikibixaj k'a chuqa' ri abi' rat Jehová.

¹⁹Roma kan k'a chila' chikaj ri akuchi atk'o-wi xatzu'un-pe. Rat Jehová kan k'a chikaj k'a xatzu-pe ri ruwach'ulew.

²⁰Roma ri' kan xtawak'axaj k'a ri kijiloj ri ek'o pa ximonri'il. Xa xke'awisq'opej k'a el ri ye'apon yan pa kamik,

²¹richin chi tikitaluj rubixik ri abi' rat Jehová chupan ri tinamit Sión. Xtikiya' aq'ij rat chiri' pa Jerusalem,

²²toq xtikimol-ki' konojel ri tinamit y konojel ri ajawaren richin yatkisamajij.

²³Jehová, rat kan xawelesaj k'a wuchuq'a' toq k'a in ala' na. Xaben k'a chi xa ti juba' ok ri nuk'aslen.

²⁴Roma ri' xinbij k'a chawe chi man yinak'uaj-el chupan ri nik'aj chire ri nuk'aslen. Ri juna' chawech rat xa kan man e k'isel ta k'a.

²⁵Rat kan xajikiba' k'a ri ruwach'ulew pa rutikeribel. Chijun ri kaj kan ja rat ri xabanon richin.

²⁶Ronojel re' xa xkek'is, jak'a rat kan beneq k'a ruwech atk'o. Ronojel xa xkerijix, achi'el nuben jun tzieq. Rat kan naben k'a chire ronojel chi achi'el jun tzieq ri xa nijal kan y kan yejalatej k'a el.

²⁷Jak'a rat nimalej Dios kan man yajalatej ta k'a. Rat kan man jun bey k'a xkak'is.

²⁸Ri e kijatzul ri yesamajin awichin kan kuqul k'a kik'u'x xkek'ase'. Kan chawech k'a rat xkek'oje-wi ronojel sol winaqi' ri'.