Read Kaqchikel Sal 104 Bible Online

Sal 104 - Kaqchikel bible

Sal 104

¹Yin kan jantape' xtinnimirisaj ruq'ij ri Jehová. Jehová nu-Dios yin, rat kan janila at nim. Kan awiqon k'a awi' rik'in k'ojlemal y ruwaq'ijaj.

²Kan nabolqotij k'a awi' chupan ri saqil, achi'el xa ta atziaq abanon chire. Rat kan xarik' k'a ri kaj achi'el nirik' jun jay banon rik'in tzieq.

³Kan xajikiba' ri ruwi' ri awachoch pa ruwi' ri sutz'.*f99* Ri sutz' xe'ok achi'el jun carruaje uk'uey awichin. Rat kan yabiyin pa ruwi' ri kaq'iq'.

⁴Ri kaq'iq' kan jari' ri e ataqon. Ri koyopa' jari' k'a ri banoy asamaj.

⁵Ja rat xajikiban ri ruxe' ri ulew, richin kan man jun k'a xtisilon.

⁶Toq k'a man jani tach'er ri ruwach'ulew rik'in ri ya', ri nimalej taq palou kan rukuchun k'a ri ruwach'ulew achi'el jun tzieq. Ri ya' ri' kan rutz'apen k'a ruwi' ri nimalej taq juyu'.

⁷Jak'a toq rat xach'on kik'in, kan chi'anin xech'aratej. Xaxe xkak'axaj ri ach'abel ri kan achi'el koqolajay, chi'anin xebe pa taq kik'ojelibal.

⁸Ri ya' ri' xebebiyin-pe chuwech ri nima'q taq juyu'. Y kan xebiyin k'a pe chikikojol ri juyu'. Xapon k'a akuchi xabij-wi rat chi yek'oje-wi ronojel ri ya'.

⁹Xaya' k'a ruchi' ronojel ri ya' y kan man nel ta pe pa ruk'ojelibal, richin kan man jun bey chik k'a xtumuq ri ruwach'ulew.

¹⁰Jehová, ja rat ri xabanon ri tz'ukubel taq ya', y ye'ateq chupan ri kokoj raqen taq ya'. Ri raqen taq ya' ri' kan yeq'axlan k'a kojol taq juyu'.

¹¹Jari' ri nikiqum ri chikopi' richin pa taq juyu'. Jari' ri nik'owisan-qa ri chaqi'j kichi' ri taq bur richin pa k'echelaj.

¹²Chuchi' ri raqen taq ya' ri' yek'oje-wi ri aj-xik' taq chikopi'. Yek'oje' k'a pa ruq'a' taq che' y yebixan.

¹³Jehová, kan k'a chila' chikaj akuchi atk'o-wi, naya'aj-pe re ruwach'ulew. Rik'in k'a ri asamaj rat yech'uch'u' konojel ri ek'o chuwech re ruwach'ulew.

¹⁴Rat kan naben k'a chi nik'iy-pe ri q'os richin kiway ri chikopi'; ri tiko'n kan naben k'a chire chi niwachin richin chi nel-pe ruway ri wineq;

¹⁵naben chi k'o ri vino ri nibanon chi nikikot ri ránima ri wineq; ri aceite ri nibanon chi jebel nitzu'un ri wineq; keri' chuqa' ri wey ri chapayon richin.

¹⁶Jehová ja rat yabanon chi ri che' k'o kiya'al y jari' ri kik'aslen. Ri tiox-che' ri e tikil pa Líbano, kan ja rat xabanon chi yek'iy-q'anej.

¹⁷Pa kiwi' ri che' ri' nikiben-wi kisok ri kokoj aj-xik' taq chikopi'. Chupan ri nima'q taq che' nikiben-wi kachoch ri nima'q aj-xik' chikopi'.

¹⁸Chupan ri nima'q taq juyu' yek'oje-wi ri tzuntzun richin pa k'echelaj. Ri nima'q taq abej, kachoch ri umul.

¹⁹Jehová, rat kan xaben k'a ri ik' richin retal ri juna'. Ri q'ij kan xaben k'a chire chi retaman akuchi nibeqaqa-wi.

²⁰Naben k'a chi nipe ri q'equ'm y kan jari' nokoq'a-pe. Chupan k'a ri aq'a' ri' yebiyajilan ri k'uxunela' taq chikopi' richin pa k'echelaj.

²¹Jari' toq ri alaji' taq koj yewuyin roma nikikanoj ri kiway. Kan nikikanoj k'a ri kiway ri naya' chike rat.

²²Jak'a toq nel-pe ri q'ij, rije' nikik'ol-ki'. Rije' kan yebek'oje' k'a pa taq kijul.

²³Jari' toq nel-el ri achin richin nibe pa samaj. Nuben k'a ri rusamaj y k'a niqaqa na ri q'ij k'ari' nitane'.

²⁴Nimalej Jehová, ri asamaj rat kan man ajlatel ta k'a. Chikijujunal xe'aben k'a rik'in na'oj. Kan chijun ruwach'ulew nojineq rik'in ronojel ri xaben.

²⁵Niqatz'et k'a ri palou ri kan janila nim, ri akuchi yesilon-wi janila chi chikopi', ri kan man e ajlatel ta. Chiri' kan ek'o k'a jalajoj kiwech chikopi', chi ch'uti'q chi nima'q.

²⁶Pa ruwi' k'a ri nimalej palou ri' yebiyajilan-wi nima'q taq barco. Chuqa' xe'aben ri nimalej taq chikopi' richin yesilon chupan.

²⁷Konojel rije' koyoben richin naya' kiway toq k'atzinel.

²⁸Rat naya' chike y rije' nikimol kan. Najeq ri aq'a' richin naya' chike ri k'atzinel y rije' yech'uch'u' rik'in ri utzil ri'.

²⁹Wi rat nawewaj-awi', rije' kan nisach kik'u'x. Toq nawelesaj ri uxla' kik'in, rije' xa kan yeken-qa. Y xa kan yetzolej chik pa poqolaj.

³⁰Rat naya' k'a pe ri uxla' richin k'aslen, y ek'o ch'aqa' chik yetz'ukutej-q'anej. Keri' kan k'ak'a' naben chire ri ruwech ri ruwach'ulew.

³¹Ri ruq'ij-ruk'ojlen ri Jehová kan richin q'asen. Rija' kan nikikot rik'in ri rusamaj.

³²Rija' xaxe nutzu' ri ruwach'ulew y ri ruwach'ulew kan nik'ark'ot. Xaxe nuneq juba' kiwi' ri juyu' y ri juyu' ri' kan yebuqulin-pe sib chupan.

³³Kan chijun k'a ri nuk'aslen xkibixan chire ri Jehová. Kan chire k'a ri nu-Dios xtinya-wi ri nubix rokik in k'es.

³⁴Ri nuch'obonik rik'in rija', kan janila jebel, yin kan jantape' k'a xkikikot rik'in.

³⁵Jak'a ri e aj-maki' kan ta k'a xkek'is-el. Kan ta k'a xkek'is-el ri e banoy taq etzelal. Yin kan jantape' xtinnimirisaj ruq'ij ri Jehová. Kan xtinnimirisaj k'a ruq'ij ri nu-Dios yin.