Read Kaqchikel Sal 111 Bible Online

Sal 111 - Kaqchikel bible

Sal 111

¹Tinimirisex ruq'ij ri Jehová. Yin xtinya' ruq'ij ri Jehová rik'in ronojel wánima. Beneq ruwech keri' xtinben chupan ri molojri'il kichin ri choj kik'aslen.

²Kan janila k'a e nima'q ri samaj ri e rubanalon ri Jehová. Kan k'uxla'an k'a koma konojel ri ye'ajowan richin.

³Chijun ri rusamaj kan janila ruq'ij-ruk'ojlen. Y ri ruchojmilal ri nuben kan richin q'asen.

⁴E nima'q taq banobel yeruben ri Jehová richin natabel richin. Rija' kan joyowanel y koch'onel.

⁵Konojel k'a ri nikiya' ruq'ij rija', kan yerutzuq k'a. Ri jikibel-tzij ri rubanon, kan jantape' k'o chuk'u'x.

⁶Ri nimalej ruchuq'a' nuk'ut k'a chikiwech ri rutinamit. Nuya' k'a chike richin nikichinaj kan ri ruwach'ulew kichin ch'aqa' chik winaqi'.

⁷Ronojel ri nuben rija', jari' ri qitzij y kan pa ruchojmilal. Ri nubij chupan ri rupixa' kan jari' k'a ri nuben.

⁸Ronojel re' kan e jikiban k'a kan richin q'asen. Kan e qitzij y pa ruchojmilal.

⁹Xuteq k'a pe ri kolotajik chire ri rutinamit; ri jikibel-tzij ri rubanon, kan jari' ri k'o jantape'. Ri rubi' rija' kan loq'olej-wi y kan k'o rukiy.

¹⁰Wi k'o ta jun nrajo' nok aj-na'oj, k'atzinel chi tik'oje' rukiy ri Jehová chuwech. Roma ri' konojel ri nikitaqej ri rupixa', kan e aj-na'oj. Kan jantape' k'a tiya'ox ruq'ij ri Jehová.